Urwego rw’igihugu rw’imiyoborere (RGB) rwagaragaje uko abaturage babona imiyoborere n’imitangire ya serivise hakurikijwe uturere,gusa ikibabaje nuko usanga hari uturere dufatwa nk’inkingi ariko ugasanga dufite amanota macye kuburyo natwo dukwiye kwisubiraho.
Urutonde rwuko uturere duhagaze ku miyoborere n’imitangire ya serivise,Akarere ka Gasabo kaza mu mwanya wa Nyuma,intara y’iburasirazuba by’umwihariko niyo igaragaza gusubira inyuma bikabije kuko mu myanya icumi ya nyuma ifitemo uturere 4 muri 7 tugize iyi ntara,Nyagatare iri ku mwanya ubanziriza uwanyuma (umwanya wa29),Gatsibo kumwanya wa 27,Akarere ka Kirehe ku mwanya wa 26,naho Kayonza ku mwanya wa 25,ibi bikaba ari umukoro utoroshye ku buyobozi bw’intara y’iburasirazuba ndetse nutwo turere turi mu myanya ya nyuma.
Kuri uyu wa Kabiri nibwo Umukuru wa RGB, Dr Usta Kaitesi, yagejeje ku Nteko Ishinga Amategeko Imitwe yombi, Raporo y’Ibikorwa y’Umwaka wa 2019/2020 na Gahunda y’Ibikorwa y’Umwaka 2020/2021. Ireme ry’Imitangire ya Serivisi ryagize amanota 78.31 % bivuye kuri 70.54 % , aho akarere ka Gasabo kaje ku mwanya wanyuma n’amanota 63,9%
Avuga ku bipimo by’Imiyoborere, Dr Kaitesi yagaragarije abagize inteko ko inkingi y’Umutekano yakomeje kuza ku isonga aho ifite amanota 95,44% mu mwaka wa 2020, yavuye kuri 94.29% yariho mu 2019.
Dr Kaitesi yagize ati “Umutekano wongeye kuza ku isonga ku nshuro ya gatandatu yikurikiranya, bigaragaza icyizere Abanyarwanda bafitiye uru rwego.’’
Ugereranyije ubushakashatsi bwa Gatandatu n’ubwa Karindwi habayeho izamuka ry’amanota mu byiciro bitandukanye ariko ku isonga Inkingi y’Imiyoborere abaturage bagizemo uruhare kandi idaheza (Participation and Inclusiveness) niyo yazamutseho amanota menshi (8,96%) ugereranyije n’izindi.
Ibipimo byakozwe hibanzwe ku nkingi umunani, zirimo iy’Iyubahirizwa ry’amategeko iri kuri 87.86% ivuye kuri 84.70 % umwaka ushize; Uburenganzira mu bya Politiki n’Ubwisanzure bw’abaturage bwagize amanota 85.76 % bivuye kuri 85.17 %; Imiyoborere abaturage bagizemo uruhare kandi idaheza yagize 81.96% ivuye kuri 73 % yariho umwaka ushize.
Inkingi yo kuzamura Imibereho myiza y’Abaturage yagize amanota 73.32% bivuye ku kigero 68.53%; Kurwanya ruswa no gukorera mu mucyo biri kuri 86.28% bivuye kuri 84.28% umwaka ushize; Ireme ry’Imitangire ya Serivisi ryagize amanota 78.31 % bivuye kuri 70.54 % naho Imiyoborere mu Bukungu n’Ubucuruzi bigira amanota 78.14% rivuye kuri 76.43% umwaka ushize.
Aya makuru yakusanyijwe binyuze mu ijwi ry’umuturage, ubushakashatsi bukorwa n’imiryango Nyarwanda na Mpuzamahanga guhera muri Nzeri 2019 kugera mbere ya COVID-19.
Abagize Inteko Ishinga Amategeko bagaragaje ko banyuzwe na raporo y’ibikorwa bya RGB ariko bagaragaza ko hari aho bagifite impungenge by’umwihariko kuri serivisi zihabwa abaturage.
Depite Mpembyemungu Winfrida yabajije icyo RGB yitegura gukora ku gukemura ibibazo by’abaturage bagihohoterwa.
Yagize ati “Iyo urebye impuzandengo y’uburyo abaturage bishimira serivisi bahabwa n’inzego zibegereye ndetse n’uruhare babigiramo turishimira ko yazamutse kuko yavuye kuri 70.4% byariho mu 2019 igera kuri 71.3%. Hari igihe usanga mu nzego z’ibanze hari abaturage bahura n’ikibazo cy’ihohoterwa ku rwego rw’utugari [ukabibona mu itangazamakuru cyangwa mu murenge runaka], ugasanga hari umuturage wahohotewe bigaragara.’’
“Ese RGB nk’urwego rubishinzwe kandi rwigenga rukora iki muri iki gihe, mufite izihe ngamba ngo niyo umuyobozi yaba mubi atazanduza abandi?’’
Dr Usta Kaitesi yasubije ko nubwo abaturage bishimiye imitangire ya serivisi hari ahagaragaye intege nke.
Yakomeje ati “Igikomeye ni uko iyo bibaye inzego zisumbuyeho, iz’umutekano n’izigenza ibyaha zifata ibyemezo ku buryo bituma abaturage bakomeza kugira icyizere bafitiye inzego z’ubuyobozi. Mu rwego rw’imiyoborere hakenerwa inzego zituma ibyo bikorwa [by’ihohoterwa] bitaba umuco. Aho byagaragaye, inzego zishinzwe gukurikirana ibyaha zirabikora. Ntidusimbura izindi nzego ahubwo dufite ubushobozi bwo gukorana hanyuma uwahohoteye umuturage agakurikiranwa.’’
Mu bindi, Depite Munyangeyo Théogène we yasabye ko uburezi bwagirwa inking yihariye aho kubarirwa mu yo Kuzamura Imibereho myiza y’Abaturage.
Yagize ati “Ubutaha Uburezi twabufata nk’inkingi yihariye kuko ariho tugiye gushingira muri byose. N’iterambere ry’ubuhinzi n’ubworozi tuvuga byose usanga nka 95% batarize, numva ko ariyo nkingi bafashe haricyo byatumarira. Iterambere ry’ibihugu byinshi rigaragaza ko uburezi n’umuco ariyo moteri yihutisha iterambere.’’
Dr Kaitesi yijeje ko iyi ngingo izasuzumwa ndetse byaba ngombwa ikaba yagirwa inkingi mu gihe biri ngombwa.
Abagize Inteko batanze icyifuzo ko abaturage banakigishwa gukoresha imbuga nkoranyambaga mu guhangana n’abavuga ibihuha ku Rwanda n’abagoreka amateka ku buryo bushobora guhungabanya imigenzo mbonezabupfura ya Kinyarwanda.
RGB yanakoze Ishusho y’uko abaturage babona imiyoborere n’imitangire ya serivisi mu nzego zibegereye (Citizen Report Card-CRC 2020). Umutekano nirwo rwego rwaje imbere mu gushimwa n’abaturage naho urw’ubuhinzi ruza ku w’inyuma.
