Kimwe n’ahandi mu gihugu, mu Karere ka Kicukiro, bizihije umunsi Mpuzamahanga wa Mwalimu, abo barezi bakaba bagaragaje urukundo bafitiye umurimo bahisemo wo kurerera u Rwanda, bishimira ibibakorerwa bigamije kubongerera ubumenyi, nk’amahugurwa atandukanye, by’umwihariko bakishimira Umwalimu SACCO bashyiriweho ibafasha mu mishinga y’iterambere ryabo.
Cyakora bavuga ko n’ubwo bimeze gutyo bwose, inzira ikiri ndende ku bigendanye n’umushahara, bakifuza ko wazazamurwa ukarushaho kugendana n’isoko rihenze ririho muri kino gihe.
Ni ibirori byizihirijwe ku urwego rw’Akarere mu murenge wa Gahanga kuri uyu wa 05 Ukwakira 2026, bikaba byayobowe n’Umuyobozi Nshingwabikorwa w’Akarere ka Kicukiro wungirije Madame HUSS Monique, washimiye abarezi akazi kabo bakora ko kurera igihugu.
Abasaba gukomeza gukora baharanira iteka ko umwana wese agerwaho n’amahirwe yo kwiga no gutsinda amasomo yose uko bikwiriye.
Madame HUSS yavuze ko ibyo byagerwaho umwana ahabwa umwanya uhagije wo kwiga no gusubiramo ibyo yigishwa. Bityo Akarere ka Kicukiro kagahatanira guhora kaza mu myanya ya mbere y’abana batsinze neza bitavuye ku gukopera, igikorwa kigayitse kidindiza Ireme ry’uburezi mu bana b’u Rwanda.
Yagize ati “ turizihiza Umunsi wahariwe mwarimu ku nshuro ya 25. Ni umunsi wo kuzirikana no gushima ibikorwa by’indashikrwa bya Mwalimu, Mwalimu ukora umunsi ku uwundi akazi ashinzwe, kugira ngo umwana yigisha abashe gutsinda uko bikwiriye, kuva atangiye kugeza asoje. ibyo bigafasha umwana gukura yifitemo icyizere cyo kuzaba umugabo nyawe abikesheje mwarimu.”
Yakomeje avuga ko akarere ka Kicukiro, gashimira kandi abafatanyabikorwa babo mu by’uburezi, barimo Kiliziya Gatolika, Amadini n’Amatorero bafite ibigo by’amashuri mu mirenge itandukanye, ibyo byose ari ugukora kugira ngo bunganire Leta muri gahunda y’Uburezi kuri buri wese, abashimira ko babikora neza uko bikwiriye.
Ku urundu ruhande, asubiza kuri bimwe mu bibazo abalimu bagaragaje birimo nk’ubucucike mu mashuri, avuga ko icyo kibazo kizwi kandi ko hari gukorwa ibishoboka byose ngo kibonerwe Umuti.
Abalimu n’abayobozi b’ibibigo bishimiye cyane Umunsi wabashyiririweho
Abalimu bo mu murenge wa Gahanga n’abayobozi b’ibigo, bavuga ko bashima Leta y’u Rwanda yifatanya n’isi yose, kuri uyu munsi wabo wabahariwe.
Bavuga ko kugena uwo munsi, bigaragaza icyizere kidashidikanywaho bafitwe n’isi yose n’u Rwanda muri rusange.
Ishimwe Evariste, ni Umuyobozi wa Glory Academy School, riherereye mu murenge wa Gahanga, Akagari ka Kagasa, Umudugudu wa Nyagafunzo, bakaba bafite Icyiciro cy’Amashuri y’Inshuke n’Amashuri Abanza.
Ashimira cyane abatekereje uyu munsi, maze bakawugenera mwalimu kugira ngo nawe abashe kwitekerezaho, yishimira ibyo aba yaragezeho mu minsi 360 ari imbere y’abana.
Ishimwe yagize ati “uyu munsi waje ukenewe. Turashima igihugu cyacu n’isi yose yatekereje kuri mwarimu. Umurimo wo kwigisha ni akazi gakomeye, ariko kandi gasaba ubwitange no gukunda abo turera, tugamije kurerera igihugu, kugira ngo haboneke abahanga bazadufasha kucyubaka muri kino gihe n’ikizaza.”
Yakomeje avuga ko igihugu cyatanze uburezi bwiza kiba gitegurira abana ubuzima bwiza bwo mugihe kiri imbere.
Ashishikariza abalimu bagenzi be, gukunda akazi bahisemo, bakarerera igihugu badaharanira inyungu, cyane ko ntacyo wabona wahemba umuntu ukurerera umwana uza ari Ikibondo, agasoza avuyemo umuhanga uzavukamo Umuyobozi runaka, Umurezi cyangwa se uzajya no muyindi mirimo isaba Umunyabwenge wize neza.
Ku birebana n’ikigo ayoboye cya Glory Academy, ashimira Leta ko ifasha Amashuri yose itavanguye, yaba ayigenga n’ayayo bwite.
Yishimira ko bahabwa imfashanyigisho nk’ibitabo by’umwihariko, akanishimira ko Abalimu bakoresha baba bigishijwe na Leta, bakaza ari abahanga, babafasha mu gutanga Ireme ry’uburezi nyabwo.
Ku urundi ruhande avuga ko Groly Academy rimaze imyaka 16 rirera u Rwanda, bakaba batsinda neza masomo, ku buryo uyu mwaka abasoje umwaka wa 6 uko abari 134 bose batsinze 100%.
Abagera kuri 50 muribo, bangana na 37% bagiye mu bigo bibacumbikira , abangana na 63% bajya mu mashuri ya Leta nabo, aho biga bicumbikiye. Mu mwaka ushize nabwo, abagera ku 110 bari basoje batsinze nabo 10%.
Ibyo kwishimira umunsi wa mwalimu, bishimangirwa kandi na Sebera Theoneste, Umuyobozi wa EXTREME NURSERY&PRIMARY SCHOOL, ikigo nacyo giherereye mu murenge wa Gahanga, uvuga ko nk’abarezi, bashishikajwe no kuzamaura ireme ry’uburezi. umunsi bashyiriwe ukaba ubafasha kwitekerezaho no kurushaho kugira imbaraga zo kurerera igihugu.
Agira ati “ uyu ni umunsi twishimira cyane nk’abarezi. Utuma duhura tukungurana ibitekerezo, tugahabwa inama n’Abayobozi bacu , tukanaboneraho gufata ingamba zo kurushaho kunoza umurimo dushinzwe. tukanaterwa umwete wo gukomeza kwigisha tugendana n’igihe kigezweho cy’ikoranabuhanga n’ubumenyi butandukanye.”
Avuga ko ikigo ayoboye cyatangiye muri 2017. Batangiranye ikiburamwaka, muri kino gihe bakab abafite n’icyiciro cy’amashuri abanza, bakaba banatekaganya gushyiraho icyiciro cy’ayisumbuye mu bihe biri imbere.
Ku birebana n’imitsindire, avuga ko muri rusange bafite abana bakurikira neza ibyo biga, haba mu gihe cy’amasomo asanzwe no mu bizamini bya Leta, ku buyo muri uyu mwaka batsinze ku kigereranyo cya 97%.
Ashimira ababyeyi barera ku kigo cyabo, uburyo bafatanya kenshi mu guharanira ko abana barera bigishwa neza kandi bagatsinda. Bityo akizera ko uburere bari guhabwa, ari intangiriro nziza y’ubuzima bazagira, igihe cyose bazaba basoje amasomo mu myaka iri imbere. Asaba n’abandi babyeyi babyifuza kugana ikigo cyabo ari benshi.
Ibyo aba bayobozi bavuga, bigendanye no kwishimira umunsi wa mwarimu, babihuriraho n’abarezi bagenzi babo, aho Munyanziza Francois Xavier uhagarariye abarimu ba Gahaga ya 1 “St Joseph Technical Secondary School, avuga ko uyu munsi ari ingenzi kuri bo.
Agira ati “Turashimira Leta y’u Rwanda idushakira umunsi nk’uyu mu minsi 360 y’umwaka, kugira ngo duhure twishime dusabane hagati yacu nk’abarezi, abatuyobora n’abayobozi bo munzego bwite za Leta. Ibyo bikaba bidutera ishema ryo kumva ko dushyigikiwe natwe tukigisha dushyizeho umwete duharanira ko ireme ry’uburezi rigera ku umusauro ukenewe.
Yishimira ko bashyiriwe umwarimu Sacco, ikigo kibafasha kubona inguzanyo zibafasha mumishinga ituma biteza imbere.
Avuga ko n’ubwo bwose umushahara wa mwarimu wongerewe gato, byaba byiza uzamuwe ukaringanizwa n’isoko ryo muri kino gihe.
Ashima cyane ko ari umunsi umuhuza n’abagenzi be bo mu bigo bitandukanye , bikabafasha gusabana hagati yabo , ababyeyi n’ubuyobozi bwabo n’Inzego Leta.
Ku rundi ruhande, avuga ko ikibazo cy’ubucucike nk’uko byasobanuwe n’uwabaserukiye, ko kikiri ikibazo gikomeye ku buryo abana batatu bicara ku ntebe imwe.
Avuga ko kuba bafite ibigo bibiri by’amashuri yisumbuye muri Gahanga ya 1 na Karembure, bikiri imbogamizi mu kwakira abana bose basoza mu bigo by’amashuri abanza birenga 10 batabasha kujya mu mashuri bacumbikirwa.
Ibyo aba bose bavuga, bishimangirwa kandi na Madame Dusabeyezu Donathila wigisha kuri Gahanga ya 2, ushimira Leta y’u Rwanda ibafasha guhura kuri uyu munsi bagasabana.
Avuga ko abibeshya ko akazi ka mwarimu kadashimishije, ko baba bibeshya cyane. Igishimisha mwarimu ngo ni ukuba yakira umwana nta kintu na kimwe azi, yirirwa arira akubagana, nyamara akamubyazamo umwana ushoboye, agakura kugeza n’ubwo azavamo Umuyobozi.
Agira ati “akazi ku bwarimu ni keza. Kubana n’abana ntako bisa, cyane ko nawe uhora wishimye ukina nabo. Duhembwa make nibyo ariko aradufasha. Turashimira Sacco twashyiriweho, iyo dukoze imishinga neza irunguka, tugaha abandi akazi natwe turi kurera. Tukanishimira ko hari no gutangwa za Buruse ku barezi, rwose Leta turayishima”.
Cyakora kimwe na bagenzi be, agaruka ku kibazo cy’ubucucike aho ishuri riba rifite abana bagera kuri 60.
Ku urundi ruhande avuga ko aban barera muri Leta, kuba badatsinda 100%, ari ibibazo by’ababyeyi babo, bamwe ngo babyuka Iyarubika bajya gushakisha, ntibite ku bana babo.
Ashima Leta yashyizeho gahunda yo kugaburira abana, benshi muribo bakaba baza bishimiye ko bari buhabwe ifunguro, bitewe ahanini n’ubuzima bwa bamwe buba bubakomereye mu miryango yabo.
Umurenge wa Gahanga wizihirijwemo Umnsi wa mwarimu ku urwgo rw’Akarere, ni umwe mu mirenge 10 igize Akarere ka Kicukiro.
Abalimu bishimira cyane umunsi bashyiriweho, bakishimira ko ubafasha guhura, gusabana no kugaragaza ibyo baba baragezeho mu minsi 360 baba bamaze bari imbere y’abana barera.
