Minisiteri y’Ubuzima yatangaje ko abantu 10 bahitanywe na Coronavirus bituma umubare w’abamaze kwicwa n’iki cyorezo ugera kuri 626 mu gihe abanduye mu masaha 24 ari 927.
Abantu bishwe na Coronavirus kuri uyu wa Gatanu, tariki ya 16 Nyakanga 2021, ni “abagore bane b’imyaka 79 (Muhanga), 59 (Rubavu), 50 (Rulindo) & 45 (Kigali) n’abagabo batandatu b’imyaka 82 (Nyamagabe), 79 (Musanze) 73 (Rutsiro), 66 (Gicumbi), 41 (Kigal) & 27 (Rubavu).”
Abarwayi bashya 927 babonetse mu bipimo 8127 byafashwe bituma umubare w’abamaze kwandura mu Rwanda uba 52.552 mu bipimo 1.762.774 bimaze gufatwa kuva muri Werurwe 2020.
Mu masaha 24 yashize, hakize abarwayi 732 byatumye umubare w’abamaze gusezererwa mu bitaro n’abakize mu bari barwariye mu ngo zabo uba 37.210.
Kugeza uyu munsi, abarwayi 14.716 barimo 74 barembye bakiri kwitabwaho n’abaganga.
Kugeza ubu mu Rwanda hamaze gukingirwa abantu 406.004 kuva ibi bikorwa byatangira ku wa 5 Werurwe 2021. Abantu 2639 ni bo bakingiwe.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.
