Ministeri y’ubuzima mu Rwanda iravuga ko habonetse undi mubare munini w’abanyururu banduye COVID 19 noneho bakaba batahuwe muri Gereza ya Mageragere iri mu mujyi wa Kigali.

Aba banyururu banduye baje bakurikira abandi batahuwe muri gereza ya Nsinda iri mu burasirazuba bw’igihugu.

Umubare w’abandura ukomeje kwiyongera mu magereza wateye impungenge ko ibi bigo bicumbikiye imfungwa bishobora kuba byugarijwe by’umwihariko.

Imibare y’ubwandu bushya itangazwa buri mugoroba yerekanye ko abashya banduye ku munsi w’ejo ari 50 mu gihugu cyose ,Gereza ya Mageragere iri mu mujyi wa Kigali yonyine ikaba yabaruye abanduye 27.

Iyi mibare yerekanye ko ubwandu bushya muri iki gihe buri kwibasira ibigo bicumbikiye abantu benshi nk’amagereza ndetse n’inkambi z’impunzi.

• Covid-19: Habonetse umubare munini w’abayanduye muri gereza mu Rwanda
• Rwanda: Amashuri yongeye gutangira, kwiga bambaye agapfukamunwa, n’ibindi bishya…
• Rwanda: Abaturage barakajwe n’ibiciro by’ingendo, RURA ‘ntigiye kubivugurura uyu munsi’

Hari hashize iminsi ibiri Ministeri y’ubuzima itangaje ko abantu 13 bari bagaragaye muri Gereza ya Nsinda.

Nta gihe kinini cyari gishize kandi inkambi y’impunzi ya Mahama na yo ivugwamo imibare yiyongera y’abandura.

Ministeri y’ubuzima ivuga ko ibi bipimo bishya biteye impungenge kuko abanduye babana n’abandi benshi.

Kuri ubu Ministeri y’ubuzima ivuga ko yashyize imbaraga nyinshi mu magereza yamaze kugaragaramo ubwandu.

Mu itangazo, Ministeri y’ubuzima ivuga ko amatsinda y’abaganga yoherejwe muri aya magereza yombi ndetse no mu duce tuyegereye kugira ngo hagaragare abamaze kwandura.

Muri gereza ya Nsinda yagaragaye mbere, abagaragaje ibimenyetso bamaze gushyirwa mu kato ukwabo.

Abageze mu zabukuru ndetse n’abasanzwe bafite intege nkeya kubera ubundi burwayi na bo bashyizweho aha bonyine kugira ngo bakurikiranwe byihariye.

Ministeri y’ubuzima yavuze kandi ko igiye gushinga ikigo cy’agateganyo cyo gukurikirana abanduye Covid 19, iki kigo cyahabwa ubushobozi bwo kwakira abantu bagera ku 100 kigashyirwa muri gereza ya Nsinda.

Kugeza ubu andi magereza mu gihugu ngo ntaragaragaramo ubwandu ariko nayo ngo agiye gukurikiranwa bya hafi.

Abashinzwe ubuzima mu Rwanda batangaza ko abantu 41 ari bo bari bamaze guhitanwa na Covid 19 kugeza mu ijoro ryakeye.

Aba bakaba barimo 5 bapfuye mu minsi 3 ishize kandi bose bavuye mu barwayi babonetse muri gereza ya Nsinda iri mu karere ka Rwamagana.