Ambasade ya Leta Zunze Ubumwe za Amerika muri Uganda yatangaje ko yamaganye imvururu ziri kubera muri iki gihugu, ni imvururu zari zimaze iminsi ziba ariko ejo hashize zarushijeho gukaza umurego nyuma y’itabwa muri yombi rya Robert Kyagulanyi uzwi nka ‘Bobi Wine’.
Ambasade ya Leta Zunze Ubumwe za Amerika muri Uganda yamaganye imvururu ziri kubera muri iki gihugu zakajije umurego ku wa Gatatu tariki ya 18 Ugushyingo nyuma y’itabwa muri yombi rya Robert Kyagulanyi uzwi nka ‘Bobi Wine’.
Ku wa 18 Ugushyingo nibwo Polisi yataye muri yombi Robert Kyagulanyi uri mu bahatanira kuyobora iki gihugu. Uyu mugabo yafashwe ubwo yari mu bikorwa byo kwiyamamaza mu Burasirazuba bw’Umujyi wa Luuka, azira kurenga ku mabwiriza yo kwirinda Covid-19 yashyizweho n’inzego z’ubuzima.
Iki gikorwa cya Polisi cyabaye nko gukoza agati mu ntozi, maze abashyigikiye Robert Kyagulanyi birara mu mihanda batangira kwigaragambya ari nako banasaba ko arekurwa.
Mu guhosha izi mvururu, Polisi ya Uganda yatangiye gukoresha imbaraga ari nako imisha imyuka iryana mu maso mu bigaragambya. Izi mvururu kugeza ubu zimaze kugwamo abagera ku munani.
Ambasade ya Leta Zunze Ubumwe za Amerika muri Uganda ibinyujije kuri Twitter yamaganye izi mvururu.
Ati “Leta Zunze Ubumwe za Amerika zamaganye imvururu zimaze guhitana ubuzima bw’abantu benshi uyu munsi, kandi turihanganisha imiryango yabuze ababo. Turasaba impande zose kwirinda imvururu, gufata ingamba nziza zigamije guhosha uguhangana no kubaha ukwishyira ukizana.”
Uretse Robert Kyagulanyi watawe muri yombi na mugenzi we bahatanira kuyobora Uganda, Patrick Amuriat nawe arafunzwe. Byatumye abatavuga rumwe na Perezida Museveni nabo bari guhatanira kuyobora Uganda bamwe bafata umwanzuro wo guhagarika ibikorwa byo kwiyamamaza kugeza igihe bagenzi babo bazafungurirwa.
