Ubushakashatsi bwakozwe na Kaminuza ya Johns Hopkins yo muri Leta zunze Ubumwe za Amerika bwagaragaje ko kuva ku wa 1 Mutarama 2021, muri icyo gihugu hamaze gupfa abarenga ibihumbi 100 bahitanywe na Coronavirus.
Kuva ku munsi wa mbere w’uyu mwaka, Leta Zunze Ubumwe za Amerika zimaze gutangaza abantu 100.317 bahitanywe na COVID-19, ibyatumye umubare w’abamaze kwicwa n’icyo cyorezo kuva cyahagera bagera ku 446.689.
Imibare yatangajwe n’iyo kaminuza kandi yerekana ko icyo gihugu ari cyo kiri imbere mu kugira umubare munini w’impfu za Coronavirus mu Isi, aho gikurikiwe na Brésil imaze gupfusha abasaga ibihumbi 200, naho Mexique, u Buhinde n’u Bwongereza bimaze bimaze gupfusha abarenga ibihumbi 100.
Kuva umuntu wa mbere yakwicwa na Coronavirus muri Leta Zunze Ubumwe za Amerika ku wa 29 Gashyantare 2020, icyo gihugu cyatangiye kugaragaramo ubwiyongere bw’ubwandu bushya n’impfu bikabije.
Ubwandu bushya bwagiye bwiyongera ubutitsa kuva icyo gihe kugeza ubu aho Amerika imaze kugira abanduye barenga miliyoni 27.
Ubutegetsi bwa Perezida Donald Trump uherutse gusimburwa na Joe Biden bwashinjwe kujenjekera icyorezo, bigafatwa nk’aho ari yo ntandaro yo kugira ubwandu bwinshi kandi ari igihugu gifite amikoro ku buryo cyahangana n’ikwirakwizwa ryacyo.
Nubwo bwose iyo mibare yatumbagiraga, Abanyamerika benshi bakunze kugaragara batubahiriza amabwiriza yo kwirinda Coronavirus arimo kwambara agapfukamunwa, haba na Perezida Trump ubwe.
Ubutegetsi bushya bwa Joe Biden mu byo bwimirije imbere harimo ko buzahangana n’ingaruka zitoroshye icyorezo kimaze kugira kuri icyo gihugu, ibyo bavuga ko “byatewe n’imiyoborere mibi ya Trump”.
Kwihutisha ibikorwa byo gukingira hirya no hino mu gihugu ni yo yagizwe intambwe ya mbere mu kugabanya umurego w’icyorezo.
Kugeza ubu icyo gihugu kimaze kugura inkingo 52.657.675. Muri 32.780.860 zimaze gutangwa, abamaze guhabwa dose ya mbere ni 26.440.836, naho 6.064.792 bahawe dose ebyiri z’urukingo.
