Uwitwa Abazarama Dancilla wo m’Umurenge wa Kimironko, Akagari ka Nyagatovu, Umudugudu wa Buhoro biravugwa ko agiye kumara amezi abiri afungishijwe n’umuturanyi we Emmanuel Nizeyimana baburana, afatayije n’umukuru w’Umudugudu w’i Buhoro Siliro Karima, bamuhora agace cy’igisigara kometse ku urugo rwe ngo bifuje gutwara kenshi, kugeza n’ubwo bamusenyeye igipagu kigasigara hejuru y’umukingo, batanyuzwe ngo bamuhimbira ibyaha bifashishije Umutekamutwe witwa Ananias, amezi abiri agiye kuyamara muri Kasho.
Kuri uyu wa mbere Tariki ya 03 Mata 2023, mu rukiko rw’ibanze rwa Gasabo habereye urubanza rw’amayobera uyu Abazarama Dancilla aregwamo icyaha ngo cyo Gushaka kwica umuntu yifashishije amarozi.
Ni ibyaha bivugwa ko byahimbwe n’uwitwa Emmanuel washatse ngo kumutwara agace cy’igisigara gafatanye n’igipangu cye, yakwiyambaza Ubuyobozi bugategeka ko uhaturiye ariwe Abazarama, azajya ahakorera amasuku, nyamara bikomeza gukururana kugeza ubwo Umukuru w’umudugudu Karima Siliro ahigaruriye ku ngufu.
Ikigaragara ni uko yaje kuharitura ngo ashaka kuhashyira imicanga yubakisha, kugira ngo rero abazarama aceceke bahitamo gucura umugambi mubisha wo kumufungisha.
UKO IKIBAZO GITEYE
Ubushinjacyaha buvuga ko Abazarama yahuye n’umuntu, amubwira ko yamubonera umuti wakwica umuntu bafitanye urubanza arabyemera. ibimenyetsso byatanzwe ngo bikaba ari ibiganiro bagiranye byafashwe amajwi kuri telefoni ndetse Abazarama ngo akaba yarahaye uwo muntu witwa Ananias ibihumbi 30 bya Tike, nyuma yaho ngo akazamuha Miliyoni n’igice, ibyazamuye amarangamutima y’abari mu rukiko bamagana icyo kirego bavuga ko nta marozi yemewe mu mategeko y’U Rwanda ku buryo byazanwa mu rukiko .
Abazarama ahawe ijambo yahakanye ibyo aregwa, avuga ko yahuriye n’umuntu ku kiriyo hafi yo murugo.
Avuga ko abantu bari benshi baganira byinshi, bagera no ku by’amarozi n’uburyo ngo abantu bica imanza ntizibe.
Avuga ko ariho yabajije uwo muntu uko bigenda, amubwira ko nawe afite urubanza maze amwemerera ko yamubonera umuti muri Tanzaniya akazarutsinda, amubwira ko bazifashisha inoti y ‘Amashiringi ishaje bakayitwika akisiga ivu ryayo.
Abazarama agira ati « ntabwo nari nzi ko ari umutekamutwe yahise anyaka ibihumbi 30 bya Tike, muha sheki kuko numvaga ko ari umuti koko. Natangajwe n’uburyo yakomeje kujya ampamagara nyuma ngo nimwongere andi ariko ndamwihorera, aribwo yahisemo kwifashisha uwo twaburanga bakajya bumviriza ibyo tuvuga, nyuma mpamagarwa ku bugenzacyaha ngo nari ngiye kwica umuntu. »
Abazarama avuga ko mu buzima bwe atazi uburozi ibyo aribyo ko yumvise gusa ngo hari imiti bisiga yica urubanza abibwiwe n’uwo mutekamutwe atigeze amenya na gato ngo bahuye ntiyanamumenya. Bityo asaba gufungurwa ngo aburane ari hanze cyane ko abana ngo bari bonyine mu rugo.
Abunganira Abazarama, bamaganiye kure ibyo umukiliya wabo aregwa, bavuga ko n’ubwo iby’amarozi bitemewe mu mategeko y’U Rwanda ko n’ibimenyetso ubushinjacyaha bushingiraho ari ibihuha byacuzwe n’umutekamutwe(Escro) wohejwe n’abo Abazarama afitanye nabo ikibazo. bityo kuba ngo nta rubanza rushingirwa ku bihuha rubaho, basaba ko Abazarama yafungurwa akaburana ari hanze kuko afite aho atuye hazwi akaba atatoroka ubutabera.
Ikindi Abunganizi babwiye Inteko iburanisha, ni uburyo uwo bunganira ngo afunzwe mu buryo bunyuranyije n’amategeko, bakavuga ko yafunzwe kuwa 21 Gashyantare 2023, akabazwa n’Ubushinjacyaha kuwa 28 z’uko kwezi, amaze icyumweru afunze, mu gihe atagombaga kurenza iminsi 5 nk’uko amategeko abiteganya.
Ikindi Abunganizi bavuga, ni uburyo batigeze babona Dosiye y’Ubugenzacyaha bakibaza impamvu yahishwe ntigaragare.
Umushinjacyaha nawe yemera ko habayeho kubazwa amatariki yarenze, asaba urukiko kuzakurikiza icyo amategeko abivugaho.
Umucamanza akaba yarashyize isomwa ry’Urubanza kuwa 06/04/2023 i Saa cyenda.
ABARI MU RUKIKO BARUMIWE
Benshi mu bakurikiranye ikirego Abazarama ashinjwa n’uwitwa Emmanuel ngo cyo gushaka kumwica, bavuze ko bitumvikana uburyo hatangwa ikirego gishingiye ku magambo no kubihuha kikemerwa, nyamara uwagize uruhare mu gutekera umutwe umuturage, ntabe ariwe ufungwa ngo abiryozwe.
Umwe mubari aho agira ati « uru rubanza ni urucabana. Icyo tuzi ni uko rurimo akagambane kacuzwe n’uwitwa Emmmanuel afatanyije n’umukuru w’umudugudu witwa Karima Siliro, bagamije ahanini kwambura Abazarama agace ku butaka kometse ku gipangu cye babeshya ko baguze kandi ari igisigara. Ni kenshi Ubuyobozi bwavuze ko ari igisigara, nyamara Mudugudu Siliro yarahigabije. Barashaka rero gucecekesha Abazarama burundu nta kindi. »
Uyu muturage uvuga ko azi neza ibya Abazarama n’urwango yangwa n’abamufungishije, avuga ko ikibyemeza ko ari akagambane ngo ni uburyo Mudugudu Siliro yari yitabiriye iburanisha yicaye ku ntebe y’imbere kandi atagobokeshejwe mu rubanza.
Mu gushaka kumenya icyo abashinjwa n’abaturage kugambanira umuturanyi wabo Abazarama, Bwana Karima SILIRO, avuga ko ntaho ahurye n’urubanza rwa Abazarama na Emmanuel n’ubwo ngo yagiye kurukurikirana.
Abajijwe impamvu yihaye ubutaka bw’igisigara Abazarama yaburanye na Emmanuel gifashe ku gipangu cye kugeza ubwo ahatenguye, avuga ko aho hantu hagenewe umuhanda ngo iby’igisigara byaje nyuma.
Agira ati « nta kagambane mfatanyije na Emmanuel nta n’ubwo duherukana. Imanza zabo zararangiye jyewe nabizamo nte ? Aho nacishihije umuhanda ndabyemerewe niyo mpamvu nahawe ibyangombwa (Auto-batir). Buriya butaka kandi ni ubwa Emmanuel yabuguze na Gakondo.
Abajijwe niba ibyo Umuyobozi w’Umurenge yemeje ko ubutaka ari igisigara Abazarama azajya ahasohokera akanahakorera isuku, ibyo byo ntiyashatse kugira icyo abivugaho, gusa akivuguruza avuga ko bahateye ubusitani bikozwe n’umuganda, nyamara uretse indabo Abazarama yahateye uyu Mudugudu Siliro, bikavugwa ko yazirimbuye ari kwiha bwo butaka ku ngufu, nta kindi gikorwa kuri ubwo butaka bwa M10 kuri M3 barwanira, bukaba butumye Abazarama agambanirwa, amezi abiri akaba agiye kuyamara afungiye ibyo atakoze.
Ikinyamakuru Igisabo nticyabashije kuvugana na Nizeyimana Emmanuel ushijwa kuba inyuma yifungwa rya Abazarama, bivugwa ko yakomeje gutotezwa kugeza ubwo bamufungishije.
Umuyobozi w’Umurenge wa Kimironko Madame Dr Rwabukumba UMUHOZA, ubwo twateguraga iyi inkuru yatubwiye ko ayoboye inama, bityo ntiyabasha kudusobanurira aho uwitwa Karima Siliro uyoboye Umudugudu w’IBUHORO, yaba akura ububasha bwo kwiha ubutaka bwari bwemejwe ko ari ubwa Leta, ibyatumye asenyera umuturage, ubu akaba anafunzwe bikekwa ko aribwo azira.
E.Niyonkuru
