ikigo cy’Igihugu cy’Ibarurishamibare cyatangaje ko mu 2023, umusaruro mbumbe w’u Rwanda wari miliyari 16.355 Frw uvuye kuri miliyari 13.720 Frw mu 2022. Ubuhinzi bwatanze 27% by’umusaruro mbumbe wose, inganda zitanga 22%, serivisi zitanga 44% naho ibindi bisigaye bigira 7%.
Muri uwo mwaka, Umusaruro mbumbe wiyongereyeho 9,2% mu gihembwe cya mbere, 6,3% mu gihembwe cya kabiri, biba 7,5% mu gihembwe cya gatatu na 10% mu gihembwe cya kane. Ibi byatumye umusaruro mbumbe wiyongera ku mpuzandengo ya 8,2% ku mwaka.
Ubuhinzi bwazamutseho 2%; inganda zizamukaho 10%; Serivisi zizamukaho 11%.
Umusaruro w’ubuhinzi wazamuwe no kwiyongera kwa 7% k’umusaruro w’ibikomoka ku bworozi. Ku rundi ruhande ariko umusaruro w’ibihingwa ngengabukungu wagabanutseho 4%, bitewe n’igabanuka ry’umusaruro w’icyayi na kawa.
Mu nganda, umusaruro wazamutse bitewe n’izamuka rya 12% ry’imirimo y’ubwubatsi ndetse n’izamuka rya 11% ry’umusaruro w’inganda zitunganya ibintu bitandukanye.
Umusaruro w’inganda zitunganya ibiribwa wazamutseho 14%, umusaruro w’inganda zitunganya imyambaro n’inkweto wazamutseho 20%, umusaruro w’inganda zitunganya ibikoresho bya pulasitike n’ibiva mu binyabutabire wazamutseho 21%.
Ni mu gihe umusaruro w’ubucuruzi buranguza n’ubudandaza wiyongereyeho 9%, uw’amahoteli na restaurant uzamuka kuri 18%, uwa serivisi z’ikoranabuhanga n’itumanaho uzamukaho 35%, uw’ibikorwa by’ubwikorezi uzamukaho 13%, aho ubwikorezi bwo mu kirere bwiyongereyeho 29% naho ubwikorezi bwo ku butaka bwiyongeraho 9%.
