Gen Muhoozi Kainerugaba, Umujyanama wa Perezida Museveni mu bijyanye n’Ibikorwa byihariye bya Gisirikare, yasoje urugendo rwe rw’iminsi ine yagiriraga mu Rwanda, ashimangira ko umubano w’ibihugu byombi ari ntayegayezwa.
Muhoozi yageze i Kigali ku manywa yo ku wa Gatandatu, yakirwa na Gen Maj Willy Rwagasana ukuriye abashinzwe Umutekano w’Umukuru w’Igihugu na Brig Gen Ronald Rwivanga, Umuvugizi w’Ingabo z’u Rwanda.
Nyuma yaho kuri uwo munsi yahuye na Perezida Kagame, gusa ntihatangajwe ibyo baganiriye cyane ko uruzinduko rwa Muhoozi i Kigali rutari urw’akazi.
Mu butumwa yanyujije ku rukuta rwe rwa Twitter, yavuze ko yishimiye kongera gutaha asubira i Kampala nyuma y’iminsi mu gihugu cyiza, u Rwanda.
Yatangaje ko yishimiye kongera guhura no kuganira na Perezida Kagame afata nka Se wabo, asaba Imana gukomeza guha umugisha ibi bihugu byombi by’ibivandimwe.
Ati “Umubano w’u Rwanda na Uganda ubu ni ntayegayezwa.”
Gen Muhoozi yageze i Kigali ku Cyumweru, bukeye agaragara ari kumwe na Perezida Kagame muri Siporo Rusange. Yanagaragaye ari kumwe n’Umukuru w’Igihugu mu rwuri rwe.
Yari yaje mu Rwanda aherekejwe n’Umunyamakuru Andrew Mwenda n’abandi barimo Alexander Mukonzi, umuhungu wa se wabo Gen Salim Saleh.
Ni inshuro ya Gatatu akoreye uruzinduko mu Rwanda. Uruzinduko rwe muri Mutarama ni rwo rwabaye imbarutso yo gufungurwa kw’imipaka y’ibihugu byombi yari imaze igihe kinini ifunze.
Nyuma yarwo Guverinoma y’u Rwanda yatangaje ko “yabonye ko hari gahunda yo gukemura ibibazo byagaragajwe n’u Rwanda ndetse n’ubushake bwa Guverinoma ya Uganda mu gushaka umuti w’ibibazo bitarakemuka,” yemeza ko umupaka uzafungurwa ku wa 31 Mutarama 2022.
Yaherukaga mu Rwanda muri Werurwe, ndetse icyo gihe Perezida Kagame yamujyanye mu rwuri rwe “amugabira inka z’inyambo”. Mu muco Nyarwanda kugabira umuntu inka z’inyambo ni ikimenyetso gishimangira umubano n’ubucuti biri hagati y’impande zombi.
Perezida Kagame yakiriye Gen Muhoozi n’abo bazanye i Kigali
Gen Muhoozi yavuze ko umubano w’u Rwanda na Uganda ubu ari ntayegayezwa
Yanditswe na Turatsinze Emmanuel
