Kuri uyu wa 3 Werurwe 2022, Mu Rwanda hatangijwe ubukangurambaga bugamije gushishikariza abahinzi n’abandi Baturarwanda muri rusange, kwinjira mu buhinzi bw’umwimerere hagamijwe kurushaho kurengera ibidukikije ndetse no kurengera ubuzima bw’abatuye Isi.
Ni ubukangurambaga buri gukorwa n’Umuryango utegamiye kuri Leta ushinzwe Iterambere ry’Ubuhinzi bw’Umwimerere, Rwanda Organic Agriculture Movement (ROAM), ku bufatanye n’inzego zitandukanye zishinzwe ubuhinzi.
Ubuhinzi bw’umimwerere, ni ubuhinzi budakoresha ifumbire n’imiti yo mu nganda yangiza ibidukikije, bagakoresha iby’umwimerere akenshi bituruka ku bindi bimera cyangwa amatungo.
Ni uburyo bwatejwe imbere vuba aha mu guhangana n’ingaruka z’ikoreshwa ry’ifumbire n’imiti yo mu nganda, byangiza ibidukikije rimwe na rimwe bikanagira ingaruka ku buzima bw’abaturage.
Umuyobozi Mukuru wa ROAM, Lise Chantal Dusabe, aherutse kuvuga ko guteza imbere ubuhinzi bw’umwimerere ari ingenzi muri iki gihe nubwo bigihenze ugereranyije n’ubuhinzi busanzwe.
Umuyobozi Mukuru wa ROAM, Lise Chantal Dusabe aganiriza itangazamakuru
Yagize ati “Hari abageze ku rwego rwiza kuko bahawe ibyangombwa byo gukora ubuhinzi bw’umwimerere. Hari abandi batarabona ibyangombwa cyane cyane nk’abahinzi baciriritse kuko bihenze kandi tukaba mu Rwanda nta bigo bitanga ibyo byangombwa bihari.”
“Turi gufasha abahinzi bato kwishyira hamwe kugira ngo bateze imbere ubuhinzi bwabo bw’umwomerere.”
Yakomeje agaragaza ko ubuhinzi bw’umwimerere bufite isoko rinini haba mu gihugu imbere no mu mahanga.
Ati “Urugero, ikawa y’umwimerere ifite ibyangombwa, icyayi cyangwa inanasi, abahinzi babyo bafite isoko rinini i Burayi. Turi gukorana n’inzego zishinzwe ubuhinzi mu Rwanda ngo abo bahinzi babe babasha kwigondera amafaranga yo kubona ibyangombwa.”
Itangazamakuru nk’umuyoboro ufasha abayobozi, abashyira mu bikorwa n’abagenerwabikorwa, niyo nzira ROAM yiyemeje kwifashisha mu gukangutira benshi kugana ubuhinzi bw’umwimerere.
Kuri uyu wa Kane, hateguwe ibiganiro bitandukanye bigamije gushishikariza Abanyarwanda kugana ubuhinzi bw’umimerere butangiza ibidukikije.
Byitabiriwe n’abakora ubuhinzi bw’umwimerere, abaterankunga, abohereza hanze umusaruro w’ubuhinzi bw’umwimerere, inzego zishinzwe iterambere ry’ubuhinzi n’abandi.
Ni ubukangurambaga kandi buri kwifashishwamo abahanzi batandukanye n’ibindi byamamare mu Rwanda nka Aline Gahongayire, Anita Pendo, Mani Martin, Alyn Sano, Rocky Kimomo n’abandi.
Intego nyamukuru z’ubu bukangurambaga ni uko ubuhinzi bw’umwimerere buhabwa agaciro gakwiriye muri Afurika, kugira ngo iterambere rirambye rigerweho ari nako habungabungwa ibidukikije kubera ejo heza h’Isi.
Mu mwaka wa 2020, isoko ry’umusaruro w’ubuhinzi bw’umwimerere ryari rifite agaciro ka miliyari 95,38$, mu mwaka wa 2025, byitezwe ko iryo soko rizaba rifite agaciro ka 151,36$.
Imbuto zifasha umubiri w’umuntu kwiyubaka neza
