Mu isengesho ribanziriza umuhango wo guha impamyabumenyi abanyeshuli 625 barangije amasomo mu mashami atandukanye muri Kaminuza y’ikoranabuhanga n’ubugeni UTAB, Umushumba wa Diyosezi ya Byumba akaba n’Umuyobozi w’icyubahiro wayo yashimiye ubwitange n’ubuhanga bagaragaje mu gihe cyose bamaze bakurikirana inyigisho mu byiciro bitandukanye maze abifuriza kuzahirwa mu mirimo bazashingwa.
Ni Umuhango wabereye ku kicaro cy’ishuri mu Karere ka Gicumbi hifashishijwe uburyo bw’ikoranabuhanga hari abanyeshuri bake bahagarariye bagenzi babo barangajwe imbere n’abarimu n’abayobozi ba Kaminuza muri rusange.
Atangiza Umuhango Dr Ndahayo Fidele Umuyobozi wa Kaminuza ya UTAB yashimiye abarangije amasomo ishyaka n’ubushake bagaragaje bakurikira Kandi bakanatsinda amasomo neza n’ubwo hariho ibihe bikomeye byo guhangana no kwirinda icyorezo cya Covid 19.
Abanyeshuri basoje amasomo mu mwaka w’amashuri wa 2020-2021 ni abo mu kiciro cya 10 kirangije amasomo kuva yashingwa muri 2006 ubwo yatangiraga yitwa IPB.
Muri uyu muhango abanyeshuri batsinze neza amasomo bakaba bagenewe ibihembo bitandukanye byatanzwe n’abafaranyanikorwa ba UTAB barimo Sina Gerard Urwibutso Nyirangarama, Skol, Cogebank n’abandi.
Abarangije bakaba basabwa na Nyiricyubahiro Musenyeri Nzakamwita kuzaba Intore nziza mu mirimo bazakora bahesha ishema UTAB n’igihugu muri rusange asaba n’abaharangirije kujya bakomeza kubabera aba Ambasaderi beza bitanga batizigama mu byo bakora byose.
Asoza ashimira Umukuru w’igihugu cy’u Rwanda Nyakubahwa Paul Kagame agaciro n’inkunga akomeje guha amashuri ya Kaminuza na UTAB irimo kugira ngo uburezi bw’abana b’u Rwanda bukomeze butere imbere.
