Abanyeshuri 625 barimo 335 b’igitsinagore na 290 b’abagabo, nibo barangije muri Kaminuza y’ikoranabuhanga n’ubugeni UTAB iherereye mu Karere ka Gicumbi Intara y’Amajyaruguru. Umuhango wabaye kuri uyu wa 18 Kanama 2021 mu buryo bw’ikoranabuhanga, hari abahagarariye bagezi babo, Ubuyobozi bwa Kaminuza n’ Abarezi, imbere ya Nyiricyubahiro Umushumba wa Diyosezi ya Byumba Nzakamwita Servilien ari nawe uyihagarariye imbere y’Amategeko.
Byari ibyishimo bikomeye ku banyeshuri basoje amasomo yabo, ku barezi ndetse no ku buyobozi bwa Kaminuza muri rusange, bitewe ahanini n’uburyo amasomo yakurikiranywe mu bihe bigoranye bya Covid19, nta kizere gihari cyo kuyasoza, nyamara bakabasha gutsinda ku kigero cyo hejuru, ibyatumye Umunyeshuri wo muri buri shami watsinze neza kurusha abandi agenerwa agahimbazamusyi k’ibihembo byagiye bitangwa n’abafatanyabikorwa b’imena ba UTAB barimo Sina Gerard Urwibutso Nyirangarama, Cogebank, Skol n’abandi benshi bashimishwa n’ireme ry’uburezi riri k’urwego rwo hejuru ritangirwa muri iyo Kaminuza nk’uko Ubuyobozi bwayo bubivuga.
Umuyobozi wa kamiuza ya UTAB Dr Ndahayo Fidele, ashimira cyane abanyeshiri bo mu mashami atandukanye babonye impamyabumenyi zabo kubera umwete n’ubushake bagaragaje mu gihe cyose bamaze bakurikirana amasomo muri Kaminuza ya UTAB maze abaha ubutumwa bwo kugenda bagashyira mu bikorwa ibyo bize, na cyane ko amasomo bize ari akenewe ku isoko ry’umurimo hanze ahangaha mu gihugu no hanze yacyo, bitewe n’uko intego ya UTAB ari ukwigisha abantu ibibafasha guhangana ku isoko ry’umurimo no kumenya kuwihangira bikaba iby’akarusho.
Agira ati “ibi ni ibyishimo bikomeye, haba ku banyeshuri, ababyeyi, abarezi n’Ubuyobozi bwa Kaminuza muri rusange. Ni ibyishimo kuko Amasomo yatanzwe mu bihe bigoye bya Covid 19, ariko Imana yabidufashijemo abanyeshuri babasha bakurikirana neza amasomo baranayatsinda.
Mu by’ukuri twishimiye na none ko uyu muhango ugenze neza hifashishijwe ikoranabuhanga. Gusa birumvikana ko tutabura kubabazwa n’uko abarangije amasomo batabashije kuza ku kigo bose kubera nyine ingamba zo gukumira ubwandu bwa Covid 19.
Cyakora na none ikiza twashima, ni uko bose babashije gukurikirana umuhango wose uko wagenze kandi byarangiye neza muri rusange kubera ko abasoje uko ari 625 bakurikiranaga urutonde rw’amazina yabo uko yasomwaga n’abayobora amashami bigamo.”
Dr Sindayigaya avuga ko n’ubwo abo abanyeshuri bakurikiranye amasomo mu bihe bigoranye bya Covid 19, bitababujije gutsinda neza ariyo mpamvu abashimira cyane ubwitange umurava n’ikinyabupfura bagaragagaje mu bihe byose bamaze bakurikirana amasomo.
Avuga ko abanyeshuri bose bahawe impamyabumenyi ari 625 bari mu mashami 17 atandukanye, bigishwa n’abarimu bagera kuri 80 hiyongereyeho abagize inzego z’ubuyobozi na Technic bagerakuri 50.
Akomeza avuga ko nk’ubuyobozi bwa Kaminuza ya UTAB, basaba abarangije kujya kubabera aba Ambasaderi beza mu mirimo itandukanye bazashingwa na cyane ko igihugu kibatezeho byinshi bitewe ahanini n’ubumenyi bwihariye bakuye muri UTAB.
Ni muri urwo rwego asoza abasaba kutazatatira igihango bagahesha ishema n’agaciro Kaminuza ya UTAB yabareze, bagakora neza imirimo bashinzwe ari nako banarushaho kwiyungura ubumenyi mu byo bazaba bakora byose.
Dr Ntibiringirwa Olivier, ni umuyobozi w’ishami ry’Imbonezamubano, icungamutungo n’iterambere (Dean of the Facurity of Social Sciences, Management and Development Studies(SSMDS) yishimira cyane kuba babashije guhesha abanyeshuri babo 625 Impamyabumenyi by’umwihariko mu ishami ayoboye hakaba harimo 299 bose, bityo bikaba ari akarusho kuri we.
Agira ati “Ni ishema rikomeye cyane kuba mu bihe bikomeye nk’ibi bya Covid tubasha kubona umubare w’abanyeshuri 625 basoza amasomo kaandi baranayatsinze ku kigero cyo kwishimirwa.
Mu by’ukuri abanyeshuri bari barabaye nk’abacika inteke kubera iki cyorezo cya Covid cyagendaga gihindagura ibintu, ariko bashyizeho umuhate babasha kwiga neza none bakaba babonye impampamya bumenyi zabo ni ibyo kwishimirwa.”
Dr Ntibiringirwa Olivier avuga ko kwigisha umunyeshuri akarangiza neza maze akabona impamyaumenyi, ari nko kwibaruka umwana mushya m’umuryango ariyo mpamvu ashishikariza abasoje amasomo bose, abasaba kuzarangwa n’umwete mu kazi bazakora, bakagira ikinyabupfura, bakamenya kubana neza n’abo bazakorana nk’uko babitorejwe muri UTAB.
Avuga ko umuntu atagizwe n’ubumenyi gusa bw’ishuri, ahubwo ko iyo ufite Diplome ubivanga n’ubwnge karemano ari nabyo bigufasha kubaho no kubanira neza abo mubana n’abo mukorana.
Yishimira cyane ko ishami ahagarariye ryarangijemo abagera kuri 299 babifashijwemo n’abarimu 17 b’inararibonye mu kazi barimo 12 bahoraho na 5 badahoraho.
Asoza ashimira abantu bose bagize uruhare kugira ngo haboneke umubare mwinshi w’abarangije amasomo barimo abarimu bagenzi be, Ubuyobozi bwa Kaminuza, Diyosezi ya Byumba na Ministeri y’Uburezi muri rusange.
Bamwe mu banyeshuri nabo basoje amasomo muri Kaminuza ya UTAB baganiriye n’ikinyamakuru igisabo bakaba baragaragaje cyane uburyo bishimira cyane kuba bageze ku urwego rwo gusoza amasomo ya Kaminuza, bakaba ngo biteguye kujya gutanga umusanzu n’umuganda wobo mu kubaka igihugu bifashishije ubumenyi n’ubuhanga bitandukanye bakuye muri Kaminuza yabo bashimira cyane. Bagasaba bagenzi babo basigaye ku ntebe y’ishuri nabo gushyiraho akabo bakiga neza uko bikwiriye kugira ngo nabo mu bihe biri imbere, bazabashe gusoza amasomo mu buryo bworoshye.
Umushumba wa Diyosezi Gatorika ya Byumba Nyiricyubahiro Musenyeri Nzakamwita Servilien, Umushyitsi Mukuru akaba ari nawe uhagarariye kaminuza ya UTAB m’urwego rw’amategeko, yishimira cyane ko Kaminuza yabo ibashije kugera ku gikorwa cyo gutanga impamyabumenyi ku banyeshuri b’ikiciro cya 10, kubera ko Covid 19 yari yarakomeje kuba inzitizi y’icyo gikorwa.
Agira ati “ni ibyo kwishimirwa, tukanashimira Inama y’igihugu ishinzwe amashuri makuru na za Kaminuza HEC yasuzumye igasanga abanyeshuri bacu bakwiriye kubona impamyabumenyi mu buryo bukwiriye.
Mu by’ukuri hari benshi baba barasoje amasomo mu bihe bishize bakomeje gutegereza bihanganye none uyu munsi ngaha urageze barazibonye. Ni ibyo kwishimirwa tukanashimira Imana yabidufashijemo, tugashimira kandi abarezi n’Ubyobozi bwa Kaminuza umwete n’umurava bagaragaje mu kwigisha neza nk’uko babisanganywe tukaba tubonye umusaruro w’abantu 625 bafite ubushobozi bwo gukorera igihugu mu mirimo itandukanye ya buri munsi bashingwa ndetse n’iyo bakwihangira ubwabo bakurikije ibo bize.”
Musenyeri Nzakamwita Servilien, avuga ko ashimishwa no kumva hari abantu benshi barangije muri Kaminuza ya UTAB, bakaba bari gukora neza mu mirimo igihugu cyagiye kibashinga bityo akavuga ko abasoje amasomo kuri uyu munsi, nabo bahawe ubutumwa bwo kuzaba Intwararumuri, bakaba Intore, bakaba itara rimurikira abo bazakorana bose hagamjwe gutanga umusaruro w’ibyo bazaba bakora mu buzima butandukanye.
Agira ati “ibikorwa byiza bazagaragaza mu kazi kabo, nibyo bizahesha ishema Kaminuza barangirijeho amasomo, bityo bizatuma Abayobozi n’abarimu bumva ko bakoze neza ibyo basabwaga igihe babonye ko abo bigishije bari kwera imbuto n’umusaruro mu kazi barimo, kaba ako mu buyobozi bwite bw’igihugu, mu burezi, mu buhinzi, mu ikoranabuhanga n’ibindi.”
Asoza ashimira cyane Nyakubahwa Perezida wa Repubulika Paul Kagame uburyo ashyigikira ko habaho ireme nyaryo mu burezi bw’u Rwanda afasha amashuri makuru na za Kaminuza na UTAB irimo mu kubona ibikenewe byose kugira ngo uburezi bukomeze kuba ku isonga.
Kaminuza ya UTAB, ni imwe muri za Kaminuza zigenga zikorera mu Rwanda, ikaba ari iya Kiliziya Gatolika.
Iherereye mu Karere ka Gicumbi, Intara y’Amajyaruguru. Yatangiye ibikorwa byayo kuwa 26 Mutarama 2006 yitwa IPB (Institut Polytecnique de Byumba, iza guhindura izina ryayo kuwa 20 Ukuboza 2015 yitwa UTAB (University of Technology and Arts of Byumba).
Kaminuza ya UTAB muri kino gihe ikaba ifite amashami atatu akubiyemo ibyiciro 17 by’amasomo atandukanye.
Hari ishami ry’Imbonezamubano, icungamutungo n’iterambere(Facurty of Social Sciences, Management and Development Studies (SSMDS), igizwe n’amasomo ya Accounting, Entrepreneurship and Cooperatize Management, Microfinance, Rural Development, Social Work. Anthropology.
Hari kandi ishami ry’Uburezi rikubiyemo Economics-History, English-Kinyarwanda, English-Kiswahili, Frensh-English, Biology-Geography, Mathematics-Biology, Mathemathics-Computer Science, Mathematics-Geography.
Hakaba n’ishami ry’Ubuhinzi imicungire y’ibidukikije n’iby’ingufu z’imirasire, higishwamo Agribusiness, Animal Production, Agro-forestry, Crop Production, Management of Forest Plantation and Natural Ecosystems Renewable Energy.
Ikiciro cy’Abanyeshi cyahawe impamyabumenyi kuri uyu wa18 Kanama 2021 kigizwe n’abanyeshuri 625 kikaba ari icya 10 gisoje mu myaka 15 Kaminuza ya UTAB imaze ishinzwe aho abamaze kuyirangizamo ari 4826 naho abakurikiranaga amasomo mu mwaka wa 2020-2021 bakaba bari 4158.
Abagiye barangiza muri kaminuza ya UTAB, bakaba bari mu mirimo itandukanye yubaka igihugu, aho bakomeje kugaragaza ubuhanga n’ubushobozi mu byo bakora nk’uko Ubuyobozi bwa Kaminuza ya UTAB bwabareze bukaba bunakurikiranira amakuru yabo hafi bubivuga.
Abanyeshuri bitwaye neza bahawe n’ibihembo birimo no kwemererwa imenyerezamwuga
Amabwiriza yo kwirinda ikwirakwira rya Covid-19 yubahirizwaga mu muhango wa ‘Graduation’ muri UTAB
Hategekimana Jean Pierre, wavuze ahagarariye abandi, yagaragaje ko banyuze muri byinshi kandi bigoye kubera icyorezo cya Covid-19
Aba banyeshuri bashimiwe ubwitange bagaragaje, bakiga mu bihe bigoye bya Covid-19
Ubuyobozi bwa Kaminuza bwasabye abanyeshuri guharanira ishema rya kaminuza bizemo
Ubuyobozi bwagaragaje ko kwigisha mu gihe cya Covid-19 bitari byoroshye
Umuyobozi w’icyubahiro wa UTAB, Ivan Wulffaert, yasabye abanyeshuri guhora iteka baharanira guhindura ubuzima
Amafoto: IGIHE na IGISABO
