Minisiteri y’Ubuzima yatangaje ko abantu 14 bahitanywe na COVID-19, bituma umubare w’abo imaze kwica mu Rwanda bagera kuri 718.
Itangazo rya Minisante ryo kuri uyu wa Gatanu, tariki ya 23 Nyakanga 2021, ryerekanye ko abahitanywe na COVID-19 bagaragaye mu bice bitandukanye by’igihugu.
Rikomeza riti “Twihanganishije imiryango y’abagore batandatu b’imyaka 88, 83 (Muhanga), 86 (Musanze), 63 (Kigali), 59 (Nyamagabe) & 35 (Rubavu) n’abagabo umunani b’imyaka 101, 94, 64, 58, 51, 44, 41 (Kigali) & 20 (Rusizi), bitabye Imana.’’
Mu masaha 24 habonetse abanduye bashya 953 barimo 176 b’i Kigali, Musanze ni 98, Nyanza ni 70 mu gihe mu Turere twa Ruhango, Bugusera na Ngoma nta murwayi mushya wahagaragaye.
Abarwayi bashya batumye umubare w’abamaze kugaragaraho ubwandu kuva ku wa 14 Werurwe 2020 ugera ku 62.328, mu bipimo 1.956.860 bimaze gufatwa ubariyemo na 17.095 byafashwe uyu munsi.
Magingo aya abamaze gukira icyorezo ni 44.739 habariwemo na 815 bakize uyu munsi, naho abakirwaye ni 16.871 barimo 71 barembye. Abagera ku 423.182 ni bo bakingiwe.
