Ikinyamakuru Igisabo kimaze iminsi gisura kikanatangaza bimwe mu bikorwa by’indashyikirwa usanga mu Karere ka Bugesera. Twanasuye uruganda rutunganya rukanacuruza umusaruro w,igihingwa cy’umuceri wo kurya, ufatiye runini imiryango ibihumbi bine yibumbiye mu ma Koperaive 12 ashinzwe kugemurira uruganda umusaruro wabonetse, bituma bakirigita ifaranga mu buryo bworoshe.
Ni Uruganda rw’ikitegererezo rumaze imyaka 8 rukorera mu Karere ka Bugesera nk’uko Umuyobozi warwo Bwana Nzeyimana Celestin abitangaza mu kiganiro yagiranye n’ikinyamakuru igisabo kuri uyu wa kabiri tariki ya 23 Werurwe 2021, atangaza birambuye ibikorwa n’uruganda n’uburyo rukorana n’abahinzi kuva umuceri ugihingwa kugeza usaruwe ukagezwa k’uruganda.
Avuga ko uruganda Mayange Rice, rwatangiye ibikorwa byawo mu kwezi kwa mbere 2013, rukaba rutunganya umuceri udatonoye ruwuguze n’abahinzi bo mu Karere ka Bugesera bibumbiye mu ma Koperative 12 bakaba bakorana n’abo bahinzi , kuva bakiwuhinga kugeza basaruye bakawugeza ku Uruganda.
Agira ati “ Iyo umuceri weze tuwugura n’abahinzi udatonoye tukawutunganyiriza mu ruganda rwacu,aho uvamo ugezwa ku masoko yose dukorana.”
Bwana Nzeyimana Celestin, avugako umuceri wera mu Bugesera ubahagije ku buryo bitari ngombwa kujya kugurira abahinzi bo m’utundi turere cyane ko ingendo zabyo byabahenda kandi igiciro cyo ku ruganda cyo kitiyongera, gusa avuga ako hari ubwo umwuzure wateye mu Bugesera Babura umusaruro bajya kugurira ahandi ariko ngo byarabahombeje ku buryo bahisemo gushyira imbaraga mugufasha abahinzi bakorana nabo bo mu Bugesera kugira ngo babone umusaruro uhagije.
Kubirebana n’ikibazo cy’abavuga ko umuceri wo mu Rwanda uhenda kandi nta Karere na kamwe utasangamo amakoperative ahinga umuceri, avuga ko ibiciro bigenwa ku ubwumvikane bw’abahagarariye amakoperative ibihumbi bine (4000) ahinga umuceri mu Rwanda, ubuyobozi bwa Minisiteri y’ubucuruzi n’inganda, MINAGRI n’abahagarariye inganda 24 ziwutunganya zikanawucuruza.
Avuga ko mu by’ukuri bagena ibiciro bahereye kubigenda ku gihingwa cy’umuceri kuva umuhinzi awuhinga, awusarura akanawugeza ku ruganda, hakarebwa n’ibyo uruganda rukoresha mukuwutunganya, imisoro n’ibindi byinshi bikorwa ngo umuceri uribwe utunganye neza, gusa ngo isoko ry’u Rwanda ry’umuceri rivangirwa n’uturuka Tanzaniya uza uri ku giciro cyo hasi ugereranyije no mu Rwanda.
Agira ati “twari tumenyereye ko Tanzaniya havayo umuceri wa nomero ya mbere, ariko kino gihe bazana kugera kuri nomero ya gatatu kandi wamenya ko muri Tanzaniya ho bahinga umuceri mwinshi kuko banafite ubutaka buhagije bawuhingaho ari nayo mpamvu ugera hanze y’igihugu cyabo uri ku giciro cyo hasi. Ikindi wamenya ni uko bo badakenera ifumbire ubutaka bwabo bwera bitagombye ko ijyamo naho mu Rwanda. Ntiwahinga umuceri udafumbiye ngo wizere umusaruro. Ikindi na none wamenya ni uko ibyo kuwinjiza ari mwinshi mu Rwanda bitangiye muri kino gihe cya Covid 19. Ubusanzwe mbere Tanzania yinjizaga umuceri mucye ntabwo tuzi impamvu yabyo.”
Bwana Nzeyimana, avuga ko ikindi kibazo kiri mu Rwanda gituma umuceri uhenda ngo ni uko hari nk’ibishanga bivomererwa hifashishijwe amashanyarazi urugero ni nk’icya Rurambi bityo kuba ibiciro by’umuceri wo mu Rwanda biri hejuru ugereranyije n’uwo muri Tanzaniya ngo nta gitangaza kirimo abantu bajye babimenya batyo.
Agira ati” dufate nk’urugero rw’uko umuceri wo mu Rwanda udatonoye ugura amafaranga 320 mu gihe muri Tanzania uba uhagaze kuri 120 Frw, kubera izo mpamvu rero, ntawagereranya ibiciro byaho n’ibyacu nk’uko utagereranya umubu n’inka n’ibyo biciro ntiwabigereranya. Mu by’ukuri ntitwatanga amafaranga menshi mukurangurira abahinzi mu gihe natwe mukuwugurisha nta nyungu yabonekamo.”
Kubirebana n’akamaro uruganda rufitiye abahinzi bo mu Bugesera muri rusange, avuga ko Bugesera, mu gihe cyose bamaranye, bababereye isoko ryabo ryizewe, kubera ko babagurira umusaruro wabo wose kandi neza.
Avuga ko babatonorera umuceri wabo wo kurya ku giciro cyiza kugira ngo barusheho kugira imbaraga ku buryo 20% by’umusaruro bawubatonorera kuri 35 mu gihe uwawuzana avuye ahandi bamuca 70 F akishimiira ko kuba imiryango ibihumbi 4000 yibumbiye mu ma Koperative 12 bakorana, bayifasha kurya umuceri utunganyije ari ikintu cyo kwishimira, ikindi bafasha abaturage muri rusange ni ukubaha ibiryo by’amatungo ku giciro gito, kubahera abana babo akazi ku buryo bafite abakozi bagera kuri 45 bahoraho bo mu Bugesera n’abandi bagenda babona akazi nk’abakarani n’abandi. Ikindi ni uko mu kurwanya Bwaki n’imirire mibi kubana bato, banaha abana barwaye Bwaki umuceri wo kurya kandi bigakorwa kenshi.
Kubirebana n’ibibazo bahura nabyo, Nzeyimana, avuga ko bibazo ari ibya rusange mu nganda z’umuceri cyane nk’ibigendana n’ihangana ry’umuceri uva hanze, n’ikibazo na none kitarumvikanwaho cya TVA batabakuriraho n’ubwo hari zimwe mu nganda zabisabye bakayibakuriraho.
Avuga ko buri gihe mu nama babaza icyo kibazo ariko ngo ntibarasubizwa.
Agira ati “mu by’ukuri TVA ni ngombwa ariko ubusanzwe yishyurwa n’umuguzi. Ntibyumvikana kuba umuceri wo hanze ugera mu Rwanda uhagaze kuri 15000F, mu gihe uwo mu Rwanda uba uri kuri 1800F, ikibazo kandi abanyarwanda bakunda guha agaciro ibiva hanze kurusha iby’iwabo.”
Mugusoza, Bwana Nzeyimana Celestin, avuga ko n’imvura iva mu majyaruguru ibangiriza umuceri w’abaturage mu gihe imvura igwa mu Bugesera iba ihagije kugira ngo beze nta kindi ibazo kibazo kibaye, gusa ngo iyo umuceri wangiritse abahinzi babona ingurane kuko bafite ubwishingizi.
Uruganda Mayange Rice Compny Ltd, ni uruganda rwaje rukenewe mu Karere ka Bugesera, kuko gakikijwe n’ibishanga byinshi bihingwamo umuceri, abaturage bakaba bishimira intera bamaze kugeraho babikesheje urwo ruganda rubagurira rukanabishyura neza umusaruro wabo.
E.Niyonkuru
