Manchester United yihagazeho nyuma yo kubona ikarita itukura mu mukino wayihuje na Arsenal muri FA Cup, ihita ibona itike yo gukomeza mu ijonjora rikurikiyeho.
Ni umukino wakinwe kuri iki Cyumweru, tariki ya 12 Mutarama 2025, ubera kuri Emirates Stadium.
Arsenal yakinanye umwambaro utarimo ibara ritukura hagamijwe gukomeza ubukangurambaga iyi kipe irimo buzwi nka ‘No More Red’, bwo kurwanya ihohoterwa rikorwa n’urubyiruko cyane cyane urugomo cyangwa gukomeretsa no kwica hifashishijwe ibyuma.
Amakipe yombi yatangiye nta n’imwe igaragaza ko iza kubona igitgo hakiri kare, kugeza ku munota wa 18, ubwo Gabriel Martinelli wa Arsenal yashyiraga umupira mu izamu ariko umusifuza wo ku ruhande akamubwira ko yararirirye.
Iminota yakurikiyeho abakinnyi ba Manchester United bashyushye mu mutwe batangira gukora amakosa yahesheje amakarita y’umuhondo Bruno Fernandes ndetse na Lisandro Martinez.
Fernandes yahise aba umukinnyi wa mbere mu Bwongereza uhawe amakarita menshi mu marushanwa yose kuva mu 2020 ubwo yahageraga, kuko afite 50 harimo 47 y’umuhondo n’atatu atukura.
Igice cya mbere cyarangiye nta kipe ibashije kureba mu izamu, ariko mu cya kabiri ku munota wa 52, Bruno Fernandes akinana neza na mugenzi we Alejandro Garnacho atsinda igitego cya mbere muri uyu mukino.
Diogo Dalot wari wahawe ikarita y’umuhondo mu ntangiriro z’iki gice, yahawe iya kabiri ku munota wa 62, yerekwa ikarita itukura ahita asohoka mu kibuga byahaye Arsenal imbaraga zo gusatira ngo yishyure.
Yabigezeho nyuma y’umunota umwe gusa ubwo Gabriel Magalhães yateraga ishoti rikomeye mu izamu ryari ririnzwe na David Raya.
Iki gitutu yakomeje kucyotsa Manchester United ibona na penaliti ku munota wa 72 yatewe na Martin Ødegaard ariko umunyezamu wayo wa kabiri Altay Bayındır ayikuramo.
Uyu mukino wongeweho iminota irindwi yarangiye nta n’imwe irabona intsinzi, zijya muri 30 y’inyongera na yo yarangiye abakinnyi ba Manchester United nta guhumeka kuko basatiriwe bikomeye.
Altay Bayındır yongeye gufasha Manchester United akuramo penaliti ya Kai Havertz, atuma ikipe ye ihita yerekeza mu ijonjora rikuriyeho, aho tombora yaryo iteganyijwe tariki ya 8 Gashyantare 2025.
Uyu munyezamu yahise aba uwa mbere ukuyemo penaliti mu mukino hagati ndetse na nyuma yawo mu irushanwa rya FA Cup kuva mu mwaka w’imikino wa 2013/14.
Mu 2005, ni bwo Manchester United yaherukaga gukina na Arsenal muri FA amakipe yombi akajya muri penaliti. Icyo gihe Arsenal ni yo yatsinze umukino yegukana n’igikombe kuko wari umukino wa nyuma.
