Mu nama rusange y’ikigega RNT Iterambere Fund yabaye kuwa 28 Werurwe 2024, abanyamuryango basabwe gukomeza gushishikariza bagenzi babo akamaro ko kumenya kwizigamira biciye muri icyo kigega, banasabwa gukomeza kongera ingano n’agaciro k’imigabane yabo.
Afungura inama rusange, Umuyobozi mukuru w’Ikigega RNT Iterambere Fund Jonathan Gatera Sebagabo, ashimira cyane abanyamuryango bafashe iya mbere mu kuyoboka RNT Iterambere Fund bagamije kwizigamira, bityo ababwira ko umwaka ushize wa 2023 wabaye mwiza cyane kuko imari y’abanyamuryango yiyongereye, haboneka u rwunguko nyarwo, abanyamurango nabo bariyongera hanaboneka n’amaraso mashya mu bakozi b’ikigega.
Agira ati “Muby’ukuri ikigega cyarungutse, twunguka abashoramari bashya, bagera ku bihumbi birindwi baje biyongera kubo twari dusanganwe ibihumbi 12 mu mwaka wa 2023 tukaba tumaze kurenga ibihumbi 20 barimo abikorera ku giti cyabo ndetse n’abibumbiye mu bimina bitandukanye.”
Avuga ko kubera uwo muhate wo gukora neza kwa RNT byatumye umutungo w’ikigega uva kuri Miliyari 28, muri kino gihe ukaba umaze kurenga Miliyali 41.
Akomeza avuga ko bimaze kugaragara ko abizigamiye mu kigega bamaze kumenya no gusobanukirwa uburyo bw’imikoreshereze y’imari, aho abizigamiye babikuje agera kuri miliyari ebyiri n’igice (2,500,000,000 Frw), bikaba bitarahungabanyije ikigega kuko ngo imigabane yakomeje gutangwa, umutungo wose w’ikigega ukaba ugera kuri Miliyari 41 Frw, mu gihe habariwemo n’ayagiye abikuzwa mbere yakagombye kuba agera kuri Miliyari 51 Frw, bikaba ibi bigaragara ko ikgega gitera imbere uko bikwiriye ari nayo mpamvu basaba abanyamuryango gushishikariza abandi kugana RNT Iterambere Fund.
Ni muri urwo rwego umutungo wa RNT Iterambere Fund, yishimira ko ibikorwa byayo byiza byanagejeje ku rwunguko rwa Miliyari 3,494,623,091 Frw zivuye kuri Miliyari 2,209,399,923 Frw bivuze ko inyungu zazamutse ku kigero cya 53%.
Umuyobozi w’abizigamira mu kigega RNT Iterambere Fund Bwana Joseph NZABONIKUZA ashimira cyane Ubuyobozi bw’ikigega n’abakozi bacyo umuhate n’umurava bakomeje kugaragaza bagamije ahanini ko iterambere ryacyo rikomeza kunogera abanyamuryango.
Agira ati “Twishimiye umutekano w’ishoramari ryacu bikagaragazwa n’inyungu zikomeje kugaragara, imigabane ikiyongera ndetse n’abashoramari bikaba uko.”
Ikigega RNT Iterambere Fund cyatangiye muri 2016, bivuye ku byifuzo by’abaturage.
RNT Ni ikigo gikomeje kugaragaza ubudasa mu gufasha abaturage kwizigamira.
Ni ikigo kandi gicungwa n’Ikigo cy’Igihugu gishinzwe ibigega by’imigabane ku ishoramari mu Rwanda Rwanda National Investment Trust Ltd (RNIT Ltd).
Bene gushoramo imari bakaba barongeye kwibutswa uburyo bukoreshwa mu kwizigamira hakoreshejwe ikoranabuhanga, banakangurirwa gukomeza gushaka abandi bashoramari bashya kugira ngo ikigega gikomeze gitere imbere.
E.Niyonkuru
