Umunyamabanga Mukuru w’Umuryango w’Abibumbye, António Guterres yatangaje ingabo za Israel zishe abasivili benshi muri Gaza barimo abakozi ba Loni barenga 150, asaba amahanga kwamagana iyi ntambara.
Intambara ishamiranyije Israel n’umutwe wa Hamas yatangiye kuwa 7 Ukwakira 2023. Uyu mutwe umaze kugaba igitero gikomeye kuri Israel no gushimuta abantu 240.
Iyi ntambara imaze kugwamo abantu 24.927 mu gihe abandi 62.388 bakomerekeye mu bitero byagabwe n’ingabo za Israel muri Gaza.
Mu muhango wo gutangiza ku mugaragaro Inama ya gatatu y’Abakuru b’Ibihugu na za Guverinoma bihuriye mu itsinda rya G77, rigizwe n’ibihugu biri mu nzira y’amajyambere n’u Bushinwa, kuri uyu wa 21 Mutarama 2024, Umunyamabanga Mukuru wa Loni António Guterres yatangaje ko iyi ntambara ari yo imaze guhitana abantu benshi kuva yajya muri uyu mwanya.
Ati “Muri Gaza ibokorwa by’igisirikare cya Israel byasenye ibintu byinshi, byica abasivili benshi ku rugero rutigeze rubaho kuva nagera muri uyu mwanya. Harimo n’abakozi bacu barenga 150, byose bikurikiye igitero cyagabwe na Hamas kuwa 7 Ukwakira 2023.”
Uhereye muri Sudani kugeza muri Ukraine, intambara ziri guhitana ubuzima bw’abantu, zigakura mu byabo abantu benshi, ndetse byahagaritse uruhererekane rw’ubucuruzi mpuzamahanga.
Guterres yavuze ko hakwiye guhita habaho guhagarika intambara, kugira ngo byorohereze abakora ibikorwa by’ubutabazi kugera ku bantu babukeneye by’umwihariko mu ntara ya Gaza.
Ati “Nimureke abatanga ubutabazi bagere kuri buri wese ubukeneye kandi bafashe abafashwe bugwate, kandi bikwiye guhita bikorwa nta mananiza.”
“Kongera kwanga ko habaho leta ebyiri hagati ya Israel na Palestine bikwiye kwamaganwa. Kwima abaturage ba Palestine uburenganzira bwo kugira Leta yabo byabaye intandaro y’intambara yabaye ikibazo ku mutekano w’Isi, biteza amacakubiri kandi bizana abahezanguni mu bice bitandukanye by’Isi.”
Ibibazo bishyamiranya Leta ya Palestine na Israel bifite imizi mu myaka isaga ijana ishize ubwo habaga Intambara ya Mbere y’Isi maze u Bwongereza bukigarurira agace ka Palestine nyuma y’uko umuyobozi w’ako gace k’uburasirazuba bwo hagati hamwe n’Ingoma ye ya Ottoman bakubitiwe inshuro muri iyo ntambara, ivano y’umwuka mubi iba Yeruzalemu.
