Rayon Sports, yakuriweho gukina ijonjora ry’ibanze rya CAF Confederation Cup 2023/24, itegereje ikipe izava hagati ya Kakamega Homeboys yo muri Kenya na Al Hilal Benghazi yo muri Libya mu kindi cyiciro.
Tombola y’uburyo amakipe azahura muri CCC, Irushanwa rihuza amakipe yatwaye ibikombe by’ibihugu muri Afurika, yabereye mu Mujyi wa Cairo mu Misiri kuri uyu wa Kabiri, tariki ya 25 Nyakanga 2023.
Rayon Sports ntizakina ijonjora ry’ibanze nyuma yo gushyirwa mu makipe 12 yabonye umusaruro mwiza hagati ya 2017 na 2018 mu marushanwa ategurwa n’Impuzamashyirahamwe ya Ruhago muri Afurika, CAF.
Andi makipe yasonewe gukina iki cyiciro ni RS Berkane, USMA, Rivers United, Zamalek, Future FC, Club Africain, KCCA, St Éloi Lupopo, Diables Noires, GDSE na Supersport United.
Muri tombola yakozwe uyu munsi, Kakamega Homeboys yo muri Kenya yahujwe na Al-Hilal Benghazi yo muri Libya.
Iyi mikino iteganyijwe kuba hagati yo ku wa 18 na 20 Kanama hakinwa ibanza mu gihe iyo kwishyura yashyizwe ku wa 25 na 27 Kanama 2023.
Ikipe izatsinda hagati y’izi zombi izacakirana na Rayon Sports mu ijonjora rya kabiri, ari na ryo rizatanga ikipe izahita ikomeza mu matsinda ya CAF Confederation Cup.
Imikino ibanza yo muri iki cyiciro iteganyijwe kuba hagati ya tariki ya 15 na 17 Nzeri mu gihe iyo kwishyura izakinwa hagati ya 29 Nzeri n’iya 1 Ukwakira 2023.
Rayon Sports nigera mu matsinda ya CAF Confederation Cup izaba ibikoze ku nshuro ya kabiri kuko iherukayo mu myaka isaga itanu ishize.
Iyi kipe yanditse amateka yo kugera mu matsinda ya CAF Confederation Cup mu 2018 nyuma yo gusezerera Costa do Sol yo muri Mozambique ku giteranyo cy’ibitego 3-2 mu mikino yombi. Muri uyu mwaka yageze muri ¼ ariko iza gusezererwa na Enyimba FC yo muri Nigeria.
Rayon Sports yakatishije itike yo gukina CAF Confederation Cup ya 2023/24 nyuma yo kwegukana Igikombe cy’Amahoro, itsinze APR FC igitego 1-0.
Gikundiro ikomeje kwiyubaka mu kwitegura umwaka w’imikino utaha urimo imikino y’imbere mu gihugu n’iyo hanze ya Afurika. Kugeza ubu Gikundiro imaze gusinyisha abakinnyi batandukanye barimo Umunya-Maroc Youssef Rharb; Abagande Simon Tamale urinda izamu na Charles Baale uritaha; Umunye-Congo, Jonathan Ifunga Ifasso, Umurundi Aruna Moussa Madjaliwa n’Abanyarwanda barimo Serumogo Ally, Nsabimana Aimable na Hakim Bugingo.
Rayon Sports itegereje ikipe izava hagati ya Kakamega Homeboys yo muri Kenya na Al Hilal Benghazi yo muri Libya
