Minisitiri w’Ububanyi n’Amahanga w’u Rwanda, Dr Vincent Biruta, yatangaje ko Pologne yamenyesheje u Rwanda ko igiye gufungura Ambasade i Kigali, ikaba ari intambwe ishimangira umubano mwiza ibihugu byombi bifitanye.
Kuri uyu wa Mbere tariki 5 Ukuboza 2022, nibwo Dr Biruta yagiranye ibiganiro n’Intumwa za Pologne ziyobowe na Minisitiri w’Ububanyi n’Amahanga wungirije, Pawel Jabłoński, uri kumwe n’abahagarariye uburezi, ishoramari, abikorera baganira ku mubano n’ubutwererane hagati y’u Rwanda na Pologne.
Minisitiri Dr Biruta yatangaje ko Pologne igiye gufungura Ambasade mu Rwanda nyuma y’uko narwo ruyifunguyeyo umwaka ushize ndetse ibihugu byombi bigasinya n’amasezerano ajyanye n’ubutwererane no kujya baganira ku birebana n’ibya politiki n’umubano mpuzamahanga muri rusange.
Ati “Muri iyi nama igihugu cya Pologne cyamenyesheje u Rwanda ko nacyo kigiye gufungura ambasade inaha mu Rwanda, bikaba byerekana intambwe ishimishije umubano hagati y’ibihugu byacu byombi umaze kugeraho”.
Minisitiri w’Ububanyi n’Amahanga wungirije, Pawel Jabłoński, yavuze ko gufungura ambasade bizakorwa vuba bishoboka kugira ngo bikomeze kuzamura umubano n’imikoranire y’ibihugu byombi.
Yashimiye uburyo u Rwanda na Pologne bishyira hamwe mu ngingo mpuzamahanga zigamije kurengera uburenganzira bwa muntu, kwamagana akarengane no kutavogera ubusugire bw’ibindi bihugu, by’umwihariko uko rwitwaye mu ntambara y’u Burusiya na Ukraine.
Intumwa za Pologne zizasoza uruzinduko mu Rwanda kuri uyu wa Kabiri, biteganyijwe ko zizakora inama zitandukanye zirimo iy’uburezi, ishoramari. Hazasinywa amasezerano atandukanye arimo ay’ibijyanye n’umutekano, ayazasinywa hagati ya za kaminuza n’amashuri makuru yo mu bihugu byombi.
Hari kandi n’amasezerano y’ishoramari azasinywa hagati y’ibigo bibishinzwe mu bihugu byombi.
Kugeza ubu hari abanyeshuri 1200 b’abanyarwanda biga muri Pologne. Minisitiri Dr Biruta yavuze ko ubufatanye mu burezi bugiye kujya ku rundi rwego ku buryo abanyarwanda bafungurirwa imiryango myinshi yo kwiga muri Pologne.
Ati “Bikaba bivuga ko ubungubu tugiye kubishyira ku rwego rundi rw’imikoranire hagati ya za kaminuza n’amashuri makuru y’ibihugu byombi, atari gusa abanyeshuri bagenda bagashaka amashuri bakiyandikisha bakajyayo”.
Pologne ni kimwe mu bifite urwego rw’uburezi rwubatswe neza mu myaka ishize ndetse kiri mu bihugu bifite uburezi buteye imbere cyane mu Burayi.
Iki gihugu kiri mu byohereza abanyeshuri benshi muri za Kaminuza, uburezi bwihariye 1 % by’umusaruro mbumbe w’igihugu, buza ku mwanya wa Gatanu mu Burayi, n’ubwa 11 ku Isi hose.
Kugeza uyu munsi binyuze mu bafite imishinga ifasha abanyeshuri kubona za kaminuza zo mu mahanga bigamo, muri Pologne hajya kwigayo nibura abanyarwanda 300 buri mwaka.
Kaminuza zo muri iki gihugu usanga zibanda ku masomo y’Ubucuruzi (Business), Ubuvuzi (Medecine) na Farumasi.
Perezida Kagame ku wa 12 Kamena 2021, yagennye Ambasaderi w’u Rwanda muri Repubulika ya Pologne, aba uwa mbere uzaba afite icyicaro muri icyo gihugu, nyuma y’imyaka myinshi yari ishize uhagarariye u Rwanda muri icyo gihugu aba afite icyicaro ahandi.
U Rwanda na Pologne bisanzwe bifitanye umubano ushingiye ku bufatanye mu bucuruzi kuko nko mu 2016, itsinda ry’abashoramari bahagarariye ibigo 10 byo muri Pologne bikora mu bijyanye no gutunganya umusaruro ukomoka ku buhinzi n’ubworozi, ikoranabuhanga, ubuvuzi n’iby’imiti, ndetse n’abatanga serivisi zo kwakira abantu bagiriye uruzinduko mu Rwanda.
Nyuma y’imyaka mike, muri Kamena 2018, Abashoramari bo muri Pologne batangiye umushinga w’uruganda rwa LuNa Smelter Ltd rukorera imirimo yo gutunganya gasegereti i Karuruma mu karere ka Gasabo.
Ni rwo ruganda rwa mbere mu Karere ka Afurika y’Iburasirazuba, rufite ubushobozi bwo gushongesha rukanatunganya gasegereti mu gihe mu myaka yashize, yacukurwaga ikajya gutunganyirizwa mu mahanga.
Mu 2021 ibihugu byombi byasinyanye amasezerano atatu arimo ay’ubufatanye mu rwego rw’uburezi, ubufatanye mu mu rwego rw’umutekano by’umwihariko mu kurwanya ibyaha bikorerwa kuri Internet.
Ibihugu byombi kandi byasinye amasezerano ashyiraho uburyo bw’ibiganiro bya politiki bizajya bikorwa binyuze muri Minisiteri z’Ububanyi n’Amahanga z’ibihugu byombi. Byemeranyije guteza imbere umubano w’ibihugu byombi hibandwa ku bikorwa by’ubucuruzi n’ishoramari, cyane cyane mu nzego zishinzwe guhanga udushya.
Minisitiri Dr Biruta yavuze ko umubano w’ibihugu byombi umeze neza
Minisitiri w’Ububanyi n’Amahanga wungirije, Pawel Jabłoński yavuze ko bidatinze Pologne izafungura Ambasade mu Rwanda
