Minisitiri w’Ubutegetetsi bw’Igihugu, Jean Marie Vianney Gatabazi yahumurije abakeka ko mu gihe cy’inama ihuza abakuru b’ibihugu na za Guverinoma zigize umuryango wa Commonwealth (CHOGM), hari imihanda imwe n’imwe ishobora kuzajya ifungwa umunsi wose.
Iyi nama izatangira kuwa Mbere tariki 20 Gicurasi isozwe kuwa 26 Gicurasi. Ni ubwa mbere u Rwanda rwakiriye iyi nama mu myaka isaga icumi ishize rwinjiye muri Commonwealth.
Biteganyijwe ko abasaga ibihumbi bitanu ari bo bazitabira iyi nama izabera mu bice bitandukanye by’Umujyi wa Kigali.
Mu kiganiro Rirarashe cyatambutse kuri TV1 mu gitondo cyo kuri uyu wa Kabiri, Minisitiri Gatabazi yavuze ko abantu badakwiriye kugira impungenge.
Yavuze ko hari gukorwa ibishoboka byose ngo ibikenewe kugira ngo inama ibe mu mutuzo bibonekere igihe.
Ati “N’ibizaba bitararangira mu buryo bw’imihanda cyane cyane, bizakomeza na nyuma y’aho kuko imihanda tuzakomeza tuyikore ariko icyo tubizeza ni uko aho bagomba kunyura hazaba hateguwe mu buryo bukwiriye.”
Mu bazitabira iyi nama harimo abakuru b’ibihugu na za Guverinoma ndetse n’Igikomangoma cy’Ubwami bw’u Bwongereza, Charles n’umufasha we.
Ibyo byumvikanisha ko mu gihe abo bayobozi bakuru bari kujya mu nama bitewe n’aho zirabera, hari imihanda imwe n’imwe izajya ifungwa ari nacyo cyatumye Minisiteri y’Uburezi kuri uyu wa Mbere, itangaza ko amashuri yo muri Kigali azaba afunze mu gihe cy’inama.
Minisitiri Gatabazi yagize ati “Burya iyo ugiye mu kizamini uba ukwiye kuba utekanye. Muri CHOGM harimo inama nyinshi […] Abanyeshuri bashobora kuba bagiye kujya ku ishuri saa Moya hagomba kunyura nk’abantu runaka umuhanda ukaba uhagaritswe iminota mike, icyo gihe ku munyeshuri we iyo minota 15 uba umuhungabanyije mu kizamini bagiyemo. Ntabwo ari kimwe n’umuntu wajyaga mu isoko ushobora gukererwaho iminota 15 cyangwa 30.”
Yavuze ko nubwo imihanda imwe izajya ifungwa iminota mike, bitavuze ko izajya ifungwa umunsi wose. Yijeje ko abaturage bazajya bamenyeshwa uko imihanda irakoreshwa mbere y’igihe.
Ati “Tuzakora ibishoboka byose tugende tubabwira uko imihanda ikoreshwa. Hari imihanda minini kuva ku Kibuga cy’indege ukagera mu Mujyi, iyo ni imihanda ishobora kuzajya rimwe na rimwe ikenerwa kubera abashyitsi baje. Niba hinjiye Perezida agomba kugera aho ari bucumbike, uwa kabiri agakurikiraho [..] ibyo bizajya bigenwa ku buryo abantu bazajya bamenya ngo iyi minota umuhanda uraba ufunze.”
Minisitiri Gatabazi yasabye abaturage kurangwa n’isuku no gukomeza umuco mwiza wo kwakira abashyitsi, baharanira umutekano wabo n’ibyabo mu gihe cyose inama izaba iri kuba.
Minisitiri Gatabazi yavuze ko imihanda izajya ifunga abaturage bazajya babanza kumenyeshwa
