U Rwanda rwaserutse neza mu Imurikagurisha rya mbere ry’Ubukerarugendo muri EAC (Amafoto)

Kuva ku itariki ya 9 kugeza ku ya 11 Ukwakira 2021, i Arusha muri Tanzania habereye imurikagurisha ry’ubukerarugendo, irya mbere ryahuje ibihugu byo mu Karere ka Afurika y’Iburasirazuba.

U Rwanda nk’igihugu cyubakiye igice kinini cy’ubukungu bwacyo ku bukerarugendo kiri mu byaryitabiriye aho rwamuritse ibyiza nyaburanga birutatse n’amahirwe y’ishoramari arurimo.

Sosiyete Nyarwanda y’Ubwikorezi bwo mu Kirere, RwandAir; Urwego rw’Igihugu rw’Iterambere (RDB), Ikigo gishinzwe guteza Imbere Ubukerarugendo bushingiye ku Nama (RCB) ndetse n’ibigo umunani bitembereza ba mukerarugendo biri mu byari aho u Rwanda rwamurikiye ibikorwa byarwo.

Ibi bigo byishimira ko byasobanuriye ababigana serivisi bitanga, binerekana ishusho y’ubukerarugendo mu gihugu n’ibyo byagezeho mu bihe bitandukanye.

Muri iri murika ry’ubukerarugendo, u Rwanda rwerekanye ko ari igihugu kibereye ubukerarugendo ndetse buri wese yishimira gusura kubera ibyiza nyaburanga bikibonekamo.

Rubagumya Claudine wari uhagarariye Urwego rw’Igihugu rw’Iterambere (RDB) yavuze ko imurikagurisha rihuza ibihugu bya EAC ryari rikenewe.

Yagize ati “Ni igikorwa cyaje gikenewe kuko twarebaga uko abikorera b’iwacu baganira na bagenzi babo bo mu Karere. Twanezerewe no kuba twari Arusha ngo twerekane ibyiza nyaburanga biri mu gihugu cyacu no gushyira imbaraga mu guteza imbere ubukerarugendo.’’

Yavuze ko abaturage ba Tanzania basuye aho u Rwanda rwamurikiye ibikorwa byarwo bafite amatsiko yo kurumenya byimbitse.

Yakomeje ati “Iri murikagurisha ryadufashije gutanga amakuru nyayo ajyanye n’ibyo dufite kugira ngo n’umuntu wese wifuza gusura igihugu azabe anezerewe cyangwa azi icyo ashaka. Uwadusuye yamenye aho yasura mu Rwanda, aho yashora imari n’ibindi.’’

Ibindi bigo byahagarariye u Rwanda birimo RwandAir, yamurikiye abayigannye inyungu bashobora gukura mu kwaguka kwayo.

Umuyobozi wa RwandAir muri Arusha-Moshi na Mwanza mu Majyaruguru ya Tanzania, Jimmy Mitali, yavuze ko bari bafite intego yo gusangiza abantu inyungu ziri mu mikoranire yayo na Qatar Airways.

Ati “Twagaragaje imikoranire twagiranye na Qatar Airways izafasha abagenzi kujya mu byerekezo birenga 65, twasobanuriye abantu uko ayo masezerano azadufasha kurushaho kwagukira mu byerekezo bitandukanye.’’

Ku wa 5 Ukwakira 2021, ni bwo RwandAir na Qatar Airways byasinye amasezerano y’imikoranire azafasha abagenzi gukorera ingendo mu byerekezo bisaga 65 muri Afurika n’ahandi ku Isi.

Yavuze ko abasuye aho RwandAir yamurikiye ibikorwa byayo bishimiye ko itera imbere ndetse “hari ibimenyetso byinshi bigaragaza ko turi kwitwara neza.’’

Ni ku nshuro ya mbere, mu Karere habereye imurikagurisha ry’ubukerarugendo. Ubwo yarisozaga, Perezida wa Zanzibar, Dr. Hussein Ali Mwinyi, yashimiye abaryitabiriye, avuga ko rikwiye kuba buri mwaka.

Ati “Abaturage ba EAC bafite amatsiko menshi yo kumenya pariki n’ibindi byiza nyaburanga biri mu bihugu bitandukanye.’’

Dr. Hussein yavuze ko ibihugu bya EAC bikwiye gukomeza gushyiraho politiki na gahunda zituma ba mukerarugendo babigana ku bwinshi.

Ati “Ni ingenzi kumenya ko imurikagurisha ry’ubukerarugendo muri EAC rizagira uruhare mu kwinjiza guverinoma z’ibihugu by’umuryango wacu n’urwego rw’abikorera kugena icyerekezo cy’iterambere y’ubukerarugendo mu Karere.’’

“Tuvuye hano dufite icyizere ko urwego rw’ubukerarugendo mu Karere ruzakomeza kwitwara neza no gutanga umusanzu ku iterambere ry’ubukungu mu bihugu by’ibinyamuryango.’’

Imurikagurisha ry’Ubukerarugendo mu Karere ryari rifite intego yo “Guteza imbere Ubukerarugendo buhamye mu iterambere ry’ubukungu budaheza’’.

Ni intego yashyizweho mu gihe mu mwaka ushize wa 2020, Akarere kagize igabanuka rya 70% ry’abakerarugendo mpuzamahanga, bigira ingaruka ku madovise yinjizwa ndetse n’akazi gatangwa mu bukerarugendo.

Iri murikagurisha ry’iminsi itatu ryitabiriwe n’abamurika barenga 100, abaguzi mpuzamahanga 41 bavuye mu bihugu 19 birimo Israel, Pologne, u Butaliyani, u Buholandi, Suède, Kuwait, Finland, Ukraine, Qatar, Bulgaria, Ethiopia, Misiri, Ghana, Rwanda, Botswana, Afurika y’Epfo, Nigeria, Zambia na Uganda.Perezida wa Zanzibar, Dr. Hussein Ali Mwinyi, aganira na Depite Makame Mbarawa wa EAC basura ibikorwa bya RDB aho basobanuriwe Visit RwandaJohn Kizito aganira na Claudine Rubagumya wari uhagarariye Urwego rw’Igihugu rw’Iterambere (RDB) muri iri murikagurishaPerezida wa Zanzibar, Dr. Hussein Ali Mwinyi, yashimiye abaryitabiriye, avuga ko rikwiye kuba buri mwakaRwandAir igana mu byerekezo 30 mu Burengerazuba, Iburasirazuba, Amajyepfo no muri Afurika yo Hagati, Uburengerazuba bwo Hagati, Aziya n’u BurayiUmuyobozi wa RwandAir muri Arusha-Moshi na Mwanza mu Majyaruguru ya Tanzania, Jimmy Mitali (hagati), yavuze ko bishimiye gusangiza abitabiriye imurika, intambwe iyi sosiyete imaze guteraSonga Africa iri mu bigo Nyarwanda byitabiriye iri murikagurisha ry’ubukerarugendoVisit Rwanda yakuruye benshi bashaka kumenya ibyiza nyaburanga bitatse u RwandaIri murikagurisha ry’iminsi itatu ryabereye mu Mujyi wa Arusha muri TanzaniaU Rwanda rwaserutse neza mu Imurikagurisha rya mbere ry’Ubukerarugendo muri EACAbaganaga aho u Rwanda rwamurikiye ibikorwa byarwo basobanurirwaga ibyiza nyaburanga bakwiye gusuraAbantu benshi bari bafite amatsiko yo kumenya no gusobanukirwa byimbitse ubukerarugendo bw’u RwandaG-Step Tours itembereza ba mukerarugendo na yo yamuritse ibikorwa byayoPerezida wa Zanzibar, Dr. Hussein Ali Mwinyi, yashyizeho umusingi ahatangirijwe imurikagurisha ry’ubukerarugendo mu Karere ka Afurika y’Iburasirazuba