Ikipe ya Patriots BBC yimanye u Rwanda imbere ya perezida wa Repubulika y’u Rwanda Paul Kagame na Emmanuel Macron w’ubufaransa

Ni kuri uyu wa kane ubwo hari hategerejwe umukino wa ¼ cy’irangiza mu irushanwa rya Basketbal African League (BAL) riri kubera mu Rwanda (Kigali Arena), aho ikipe ya Patriots bbc ihagarariye u Rwanda yagombaga gukina na Ferroviário de Maputo yo muri Mozambique uyu mukino ukaba waje kurangira ikipe ya Patriots BBC itsinze Ferroviário de Maputo ku manota 73 kuri 71ya Ferroviário de Maputo.

**Keneth Gasana wa patriots niwe watsinze amanota menshi muri uno mukino**

Uyu mukino wagaragayemo guhangana kuri ku rwego rwo hejuru, waje kuba injyana muntu ubwo nyakubahwa perezida wa Repubulika y’u Rwanda yinjiraga muri Kigali Arena ari kumwe na perezida w’ubufaransa Emmanuel Macron ndetse n’abandi banyacyubahiro batandukanye, maze abakinnyi ba patriots BBC bahita bamera nkabariye amavubi.

**Perezida wa Repubulika y’u Rwanda Paul Kagame na Emmanuel Macron w’ubufaransa bihereye ijisho uno mukino w’indyankurye**

Umukinnyi GASANA Keneth na kapiteni we Mugabe Aristide bombi ba Patriots BBC ni bamwe mu bakinnyi bigaragaje maze bafasha ikipe yabo kwimana u Rwanda imbere ya perezida wa repubulika.

**Kapiteni wa Patriots BBC Mugabe Aristide yitwaye neza muri uno mukino afasha ikipe ye kubona itsinzi ku munota wanyuma**

Perezida w’u Bufaransa, Emmanuel Macron, uri mu Rwanda mu ruzinduko rw’iminsi ibiri kuva kuri uyu wa Kane, yitabiriye uyu mukino wa ¼ cya Basketball Africa League ari kumwe na Perezida Kagame.

Nyuma yo kugera muri Kigali Arena mu gace ka mbere k’umukino, Perezida Kagame na Macron, bombi bicaye mu myanya isanzwe yicarwamo n’abafana hafi y’ikibuga, bari kumwe na Masai Ujiri uyobora Toronto Raptors yo muri NBA.

**Masai Ujilii uyobora Toronto Raptors yo muri NBA. aganira na perezi Paul Kagame**

Nk’uko bimeze kuri VISIT RWANDA, Ikigo cy’Abafaransa gishinzwe Iterambere (Agence Française de Développement, AFD) ni kimwe mu bafatanyabikorwa icyenda b’irushanwa rya Basketbal Africa League riri kuba ku nshuro ya mbere.

Patriots BBC yari imbere y’abafana bagera ku 1700 bitabiriye uyu mukino muri Kigali Arena, yatsinze agace ka mbere ku manota 24-15 ibifashijwemo n’abarimo Kenneth Gasana wakinnye neza uyu munsi.

**Patriots BBC yarifite abafana bari bayishyigikiye, bakayitera ingabo mu bitugu**

Ferroviário de Maputo ifite abakinnyi igenderaho bakomeye barimo Álvaro Masa, Demarcus Holland na Myck Kabongo, n’ubundi bongeye kuyifasha mu mukino wo kuri uyu wa Kane, itsinda agace ka kabiri ku manota 24-18, amakipe yombi ajya kuruhuka harimo ikinyuranyo cy’amanota atatu (42-39).

Nubwo Patriots BBC yigeze gushyiramo ikinyuranyo cy’amanota 11 (51-40) mu minota ya mbere y’agace ka gatatu, Ferroviário de Maputo yayoboye umukino habura iminota ibiri ngo karangire (54-55) mu gihe iminota 10 ya nyuma yatangiye harimo ikinyuranyo cy’amanota atatu (54-57).

**Myck Kabongo wa Ferroviário de Maputo na Sagamba Sedar wa Patriots BBC**

Nk’uko byagenze ku mukino wa GNBC wahesheje Patriots BBC kurenga icyiciro cy’amatsinda, iyi kipe ihagarariye u Rwanda yitwaye neza mu gace ka nyuma.

Amanota icyenda ya Mugabe Aristide watsinze atatu inshuro eshatu yikurikiranya, yafashije Patriots BBC kongera kuyobora umukino (66-61) habura iminota itanu ngo umukino urangire.

**Patriots BBC yongeye gutanga ibyishimo ku banyarwanda ndetse no kuri Perezida wa Repubulika y’u Rwanda nabo bari barikumwe**

Álvaro Masa wa Ferroviário de Maputo, Aristide Mugabe na Kenneth Gasana ba Patriots BBC, bagize uruhare mu gutuma amakipe yombi ajya mu minota ibiri ya nyuma anganya amanota 70-70.

**Byarinze bigera mu minota yanyuma nta kipe n’imwe irizera intsinzi**

Habura amasegonda atatu ngo umukino urangire, Adjehi Baru wa Ferroviário de Maputo yahawe lancer franc ebyiri, ahushamo imwe, byatumye ikipe ye inanirwa gukuramo amanota abiri yarushwaga na Patriots BBC mbere y’uko Kenneth Gasana yongeramo irindi nota kuri lancer franc, umukino urangira ari 73-71.

**Masai Ujili wabaye umukinnyi ukomeye ku rwego rw’isi yanyuzagamo agasobanurira abayobozi bakuru uko umukino wifashe**

Kenneth Gasana watsinze amanota 23 muri uyu mukino, ni we winjije menshi, akurikiwe na kapiteni we, Mugabe Aristide, watsinze 18.

Gutsinda uyu mukino byatumye Patriots BBC igera muri ½ cya BAL 2021, aho izahura na US Monastir yo muri Tunisia, yo yatsinze AS Douanes yo muri Sénégal amanota 86-62 mu mukino wabanje kuri uyu wa Kane.

**Perezida wa repubulika Paul kagame yitegereza aho amanota ageze n’iminota isigaye ngo umukino urangire**

Patriots na US Monastir zari kumwe mu itsinda A, aho iyi kipe yo muri Tunisia yatsinze iyo mu Rwanda.

Undi mukino wa ½ na wo uzakinwa ku wa Gatandatu, uzahuza Zamalek yo mu Misiri na Petro de Luanda yo muri Angola, zombi zatsinze imikino yazo ya ¼ ku wa Gatatu.