Perezida wa Repubulika Iharanira Demokarasi ya Congo, Félix Tshisekedi, yakoze impinduka mu bayobozi bayobora operasiyo za gisirikare zishinzwe kurandura burundu imitwe yitwaje intwaro muri Kivu y’Amajyaruguru.
Yagize Brigadier General Mwehu Lungu Evariste komanda w’ingabo zishinzwe kurwanya FDLR.
Izi mpinduka zakozwe kuwa Gatandatu tariki 8 Mata, Brig Gen Mwehu Lungu agirwa Umuyobozi Mukuru wa Operasiyo yiswe Sukola 2 ishinzwe kurwanya imitwe yitwaje intwaro irimo FDLR na Nyatura.
Uyu mwanya yari uwasenzweho ariko ibiro bya Perezida bitarabyemeza, kuko yawugiyeho asimbuye Brig Gen Yamba Willy witabye Imana mu mwaka ushize azize uburwayi.
Sukola 2 igizwe n’ingabo za Congo, FARDC, yashyizweho mu 2019, igamije kurandura imitwe yitwaje intwaro yigize kagarara mu duce twa Kivu y’Amajyaruguru turimo Masisi, Nyiragongo, Rutshuru na Walikale.
Umuyobozi mushya wa Sukola 2, Brig Gen Mwehu Lungu, azaba yungirijwe na Colonel Botongo Isuka uzajya ugenzura ibikorwa bya gisirikare by’iyo operasiyo.
Undi wahawe inshingano nshya ni Brig Gen Mulamba Tshinkobo Guylain, wagizwe umuyobozi w’ingabo z’agace ka 34 ka gisirikare gaherereye muri Kivu y’Amajyaruguru nako gashinzwe kurwanya FDLR, Nyatura n’umutwe w’iterabwoba wa ADF wavukiye muri Uganda umaze kuyogoza iyi ntara.
Kivu y’Amajyaruguru imaze kuba isibaniro ry’imitwe y’iterabwoba, aho ibikorwa bihonyora uburenganzira bwa muntu biturutse ku nyeshyamba byazamutseho 8%.
Hari n’abandi basirikare bakuru bashyizwe mu myanya y’ubuyobozi harimo Brig Gen Mputela Bertin wagizwe Umuyobozi w’ingabo ziyobora Operasiyo ya Sukola 1 ishinzwe kurwanya umutwe wa ADF mu duce twa Beni, Lubero na Butembo.
Congo ibarirwamo imitwe yitwaje intwaro irenga 100. Impamvu zituma hari iyi mitwe hari ukuba ari igihugu kibamo amashyamba menshi y’inzitane ku buryo byorohera inyeshyamba kwihishamo.
Agace ka Kivu y’Amajyaruguru gakungahaye ku mutungo kamere, aho usanga abanyagihugu n’abanyamahanga baba barwanira kuyobora ibirombe by’amabuye y’agaciro bivamo akayabo.
Imwe mu mitungo kamere iherereye muri iyi ntara harimo Coltan zikunda kwifashishwa mu gukora telefone cyangwa ibindi bikoresho by’ikoranabuhanga, aho ikilo kimwe kigura amadolari arenze 100. Muri Congo kandi haboneka zahabu, diamant, cuivre, uranium, amavuta, cobalt n’ibindi.
