Mu rwego rwo gukomeza guha agaciro inzirakarengane zishwe zizira uko zaremwe muri jenoside yakorewe abatutsi mu 1994, mu karere ka Rwamagana bakomeje ibikorwa byo kwibuka mu ngeri zitandukanye.
Umurenge wa Muyumbu ni umwe mu mirenge y’Akarere ka Rwamagana ufite amateka yihariye bitewe n’ubukana Jenoside yakorewe abatutsi mu 1994 yagize muri uno murenge,ni muri urwo rwego Kuri iki cyumweru tariki ya 11/04/2021, Abayobozi b’Akarere ka Rwamagana, inzego z’umutekano, n’abaturage bifatanyije mu Kwibuka Abishwe muri Jenoside yakorewe Abatutsi muri Mata 1994, bakicirwa ku Muyumbu no mu nkengero zaho.
Mu buhamya bwatanzwe na Kayiranga Alexis warokokeye kuri uyu musozi wa Muyumbu , hagarutswe ku bugome n’ubukana Jenoside yakorewe Abatutsi muri Mata 1994 yakoranywe ku Muyumbu no mu nkengero zaho, uko Inkotanyi zitanze zikayihagarika ndetse zikagira n’abo zirokora.
Muri uyu muhango Kandi hanashyinguwe mu cyubahiro imibiri 5 yabonetse, harimo umubiri 1 wabonetse mu murenge wa Muyumbu, Umubiri 1 wabonetse mu murenge wa Nyakariro n’indi 3 yabonetse mu murenge wa Nzige. Byose byakozwe hubahirizwa amabwiriza yo kwirinda COVID-19 .
Imibiri 5 yashyinguwe mu cyubahiro mu rwibutso rwa Jenoside yakorewe Abatutsi rwa Muyumbu, ije yiyongera ku yindi 14304 yari isanzwe iharuhukiye, yose hamwe ikaba ari 14309.
Musabyeyezu Dative uhagarariye IBUKA mu karere yashimiye inkotanyi zitanze zigahagarika Jenoside, anasaba umuntu wese waba afite amakuru y’ahari imibiri y’abishwe muri Jenoside yakorewe Abatutsi muri Mata 1994 kubivuga, kugira ngo nabo bashyingurwe mu cyubahiro.
Umuyobozi w’Akarere ka Rwamagana Bwana Mbonyumuvunyi Radjab yasabye buri wese kuba hafi y’abarokotse Jenoside yakorewe Abatutsi muri Mata 1994, akabafata mu mugongo, akabahumuriza; kuko iki ari igihe cyo kurushaho gushyira hamwe, tugahuza imbaraga, dukorera hamwe, bityo tukibuka ariko tuniyubaka.
Meya Mbonyumuvunyi Radjab yabwiye abitabiriye uyu muhango ko kwiyubaka kw’igihugu bihera ku kwiyubaka k’umuntu ku giti cye, hakaza kwiyubaka k’umuryango n’abawugize hanyuma bikagera ku batuye igihugu bose.
Meya Mbonyumuvunyi yongeyeho ko iki ari igihe cyo gusubiza amaso inyuma tukareba mu mateka yacu tugakuramo amasomo avuga ngo Jenoside ntizongere kubaho ukundi, tugafata ingamba zo kubaka Umunyarwanda ufite icyerekezo n’icyizere cyo kubaho uyu munsi n’ejo hazaza.
ubuyobozi bwaboneyeho kongera kwibutsa abaturage ko bakwiye kurangwa n’umuco w’ubumwe ndetse n’ubuvandimwe bamagana uwariwe wese wakongera kuzana amacakubiri, kandi bakwiye kwamagana abagipfobya Jenoside yakorewe abatutsi mu 1994. no kurwanya abakiyihakana.
TWIBUKE TWIYUBAKA
SRC+PHOTO: Rwamagana District
Inkuru ya : NDAYISABA Eric
Tel: 0782511443