Ubuyobozi bw’Akarere ka Rubavu buri kumwe n’Ubuyobozi bw’Akarere ka Rutsiro,inzego z’umutekano, Ibuka,CNLG ndetse n’Abahagarariye abacitse ku icumu rya jenoside yakorewe abatutsi mu 1994 bitabiriye igikorwa cyo guhuza Urwibutso rwa Kivumu rwo mu Karere ka Rutsiro n’urwa Nyundo mu Karere ka Rubavu aho ku mibiri 892 y’inzirakarengane zazize jenoside yakorewe abatutsi mu 1994 yari isanzwe irushyinguyemo hiyongeraho imibiri 147 yari mu rwibutso rwa Kivumu.
Iki gikorwa cyahujwe n’itariki ya 9 Mata umunsi Nyundo isanzwe yibukaho by’umwihariko kuko aribwo mu 1994 abatutsi bari bahungiye muri Cathedral ya Nyundo bizeye kuhakirira kimwe n’abari mu nkegero zayo bishwe.
Haba uwatanze ubuhamya ndetse n’abafashe ijambo barimo Abayobozi b’Uturere twombi ndetse na Musenyeri wa Diyosezi ya Nyundo bongeye kugaya abateguye n’abakoze jenoside, bahumuriza abacitse ku icumu ndetse mu izina ry’Ubuyobozi babizeza gukomeza kubaba hafi ndetse no guharanira ko jenoside itazongera kubaho ukundi.
Ubuyobozi bw’akarere ka rubavu hamwe n’akarere ka Rutsiro bwaboneyeho gusaba abatuye muri utu turere gukomeza kwamagana umuco wo gukora ikibi, kwamagana abagipfobya Jenoside yakorewe abatutsi ndetse no kwamagana abakiyihakana.
Abaturage kandi bakanguriwe gukomeza kugira umuco w’ubufatanye, kwimakaza ubumwe yo nkingi y’iterambere rirambye kandi bakagira umuco w’ubufatanye ndetse no guharanira ikiza.
Muri bino bihe byo kwibuka kandi abaturage bakanguriwe no gukomeza kwirinda amagambo akomeretsa abarokotse jenoside yakorewe abatutsi mu 1994, kubaba hafi ndetse no gukomeza gukurikirana ibiganiro byose bizagenda bitangwa muri kino gihe cyo kwibuka Jenoside yakorewe abatutsi mu 1994.
Amafoto: Rubavu district
Inkuru : Ndayisaba eric
Tel: 0782511443
