Sosiyete y’Itumanaho ya Airtel Rwanda yafunguye amashami mashya arindwi atangirwamo serivisi zayo hirya no hino mu Mujyi wa Kigali n’amaduka 30 azajya atangirwamo serivisi za Airtel Money.
Aya mashami mashya asanga andi umunani iyi sosiyete yari ifite mu Mujyi wa Kigali byatumye igira amashami 44 hirya no hino mu gihugu.
Amashami mashya n’amaduka azajya atanga serivisi za Airtel Money yafunguwe harimo irya Artne, Downtown, Zindiro, Masaka, Kisimenti, Kimisagara, Kagarama, Gasanze, Gatenga, Masoro, Busanza, Nyabisindu, Kabuga, Murambi, Bumbogo, Ndera, Nyabugogo, Biryogo, Gikomero, Miduha, Giporoso, Kicukiro Centre , Rusheshe, Ziniya n’irya Gakinjiro.
Ni igikorwa Airtel Rwanda yakoze mu gukomeza kwegereza abakiliya serivisi nziza no kubafasha gukemura ibibazo bahura nabyo mu buryo bwihuse.
Aya mashami ya Airtel Money azajya yunganira n’ubundi abari basanzwe batanga iyi serivisi hirya no hino ariko yo by’umwihariko akazibanda ku babikuza amafaranga menshi bajyaga bagorwa no kuyabonera ku ba-agent
Umukozi ushinzwe gufata neza abakiliya muri Airtel, Ruginakabanda Pacifique, yavuze ko bahisemo gushyiraho aya mashami kugira ngo begereze abakiliya babo serivisi aba-agent batabashaga kubaha.
Ati “Turashaka kwegereza serivisi zuzuye abakiliya bacu ku buryo umuntu ushaka serivisi za Airtel Money ahita azibona ndetse n’izindi serivisi dutanga ku buryo nta muntu uzongera gukora urugendo rurerure ajya gushaka serivisi zacu kure.”
Kuba hafunguwe amashami azajya atangirwamo serivisi zose za Airtel Money byakiriwe neza n’aba-agent bayo kuko bavuga ko hari serivisi batabashaga guha abakiliya ariko bazajya bifashisha aya mashami.
Ibi byemezwa na Kubwimana Celestin, wavuze ko aya mashami agiye gusubiza bimwe mu bibazo bahuraga nabyo cyane nko kubura amafaranga ahagije yo guha abakiliya.
Ati “Aya mashami yafunguwe adufitiye umumaro munini kuko hari igihe haza umukiliya ushaka miliyoni kandi ufite nk’ibihumbi 500 Frw gusa ntayafite nkabura uko mbigenza ubu nzajya nza aha bahite bayampa umukiliya muhe serivisi nziza.”
“Kandi si ukubura amafaranga gusa ko hari n’abantu baza bashaka kohereza amafaranga mu bihugu byo hanze kandi twe ntabwo twabashaga gukoresha E-Money, aha naho izajya iba ihari ubwo ibi bibazo byakemutse ni ibyishimo kuba twabonye ishami rizajya ridufasha gutanga serivisi nziza.”
Muri gahunda yagutse Airtel Rwanda iteganya ko mu minsi iri imbere izaba ifite amashami 70 hirya no hino mu Mujyi wa Kigali.
NIYONKURU Edouard
