Umwanditsi akaba n’umuhanga mu mateka,Murashi Isaïe yemeza ko u Rwanda abarwanya ubutegetsi bwa Perezida Kagame barimo na Padiri Nahimana Thomas bifuza rudashobora kuzongera kubaho, bitewe n’aho Abanyarwanda bageze basobanukirwa ukuri guhishe mu mateka yabo ndetse n’ikinyoma cy’amoko babeshywe n’abakoloni.
Ku bakurikiranira hafi Padiri Nahimana Thomas, iyo uvuze u Rwanda yifuza abenshi bahita barwumva kuko mu biganiro bye ntatana no kugaragaza mvugo zuje urwango, ivangura rishingiye ku moko n’ingengabitekerezo ya Jenoside, kwanga urunuka Abatutsi n’ubuyobozi buriho mu Rwanda.
Ibyo bitekerezo bye ntibigarukira k’u Rwanda gusa dore ko no mu minsi yashize yahimbye ikinyoma kivuga ko Perezida Kagame yapfuye ndetse aragikwirakwiza nubwo atatinze kubona ko yibeshye.
Ibi byifuzo n’ibitekerezo by’uyu mugabo nabyo bigaragaza u Rwanda yifuza uko ruteye, rurangwa n’ishyari n’urwango kuko nta Munyarwanda wakabye yifuriza mugenzi we gupfa n’iyo baba bafitanye ikibazo.
Mu rwego rwo gucengeza ibi bitekerezo bye mu bandi, uyu mugabo yashinze ikinyamakuru Le Prophete.fr gikwirakwiza ibi bitekerezo bye bipfuye.
Ingengabitekerezo y’urwango ivangura ndetse n’amacakubiri, ni byo byagiye biranga inyandiko za Nahimana zanyuze ku rubuga rwe rwa Le Prophete.fr. Ni nabyo byakunze kuranga imvugo z’uyu mupadiri mu biganiro yakunze kugirana n’ibitangazamakuru byo hanze. Ni nabyo ishyaka rye ryubakiyeho.
Muri Kanama 2016 mu kiganiro yagiranye n’igitangazamakuru cyitwa “Ikondera Infos”, Padiri Nahimana yashimangiye ko yanga urunuka Abatutsi n’ubuyobozi bwa FPR-Inkotanyi.
Yavuze ko ari “Ubutegetsi bw’agatsiko k’abasirikare bavuye i Bugande”. Ati “Ikibazo cy’u Rwanda ni ubutegetsi bw’agatsiko k’indobanure k’abasirikare b’Abatutsi baturutse Uganda akaba ari bo bikubiye ibyiza byose by’igihugu bagategekesha iterabwoba n’ikinyoma.”
Yakomeje agira ati “inzego zose z’ubutegetsi Kagame yahisemo kuzishyira mu maboko y’Abatutsi.”
Umugambi mubisha uyu mugabo afite k’u Rwanda yari yabanje kuwugaragaza kandi mu 2015 ubwo mu Rwanda hibukwaga abazize Jenoside yakorewe Abatutsi mu 1994.
Mu kiganiro yatanze kuri BBC,Nahimana yagarutse ku cyo yise ‘Kwibuka bose’, ashimangira ko ijambo Jenoside yakorewe Abatutsi ridakwiye gukoreshwa.
U Rwanda yifuza ntiruzagaruka
Isaïe Murashi yemeza ko u Rwanda abenshi mu barwanya ubutegetsi bwa Perezida Kagame barimo Padiri Nahimana Thomas bifuza rutazigera rugaruka bitewe n’aho abarutuye uyu munsi bageze bajijuka mu bijyanye n’amateka y’igihugu.
Murashi avuga ko uyu munsi nta muntu wari ukwiye kuba ashyira imbere amoko kurusha uko ashyira imbere inyungu rusange, cyane ko n’amako benshi bitwaza ari ikinyoma cy’abakoloni.
Ati “ Ntabwo Nahimana azakubwira igisekuru cye kigera kuri muhutu, ntabwo Ingabire Victoire azakubwira igisekuru cye kigera kuri muhutu, ntabwo Twagiramungu azakubwira igisekuru cye kigera kuri muhutu, ni ibihimbano bagenderaho gusa, ahubwo bave mu binyoma bajye mu kuri nta bwoko bwa Hutu, Tutsi buba mu Rwanda, ni ibihimbano by’abazungu.”
Murashi akomeza avuga ko abarwanya ubutegetsi bw’u Rwanda bakwiye kuva ku izima bagataha kuko u Rwanda bifuza rutazagaruka.
Ati “U Rwanda rwa ba Nahimana na bariya bandi bose ba Bagosora n’abo bose bavugira kuri radiyo babeshya ndetse n’abandi bahunze bakavuga ngo barashaka kongera gutahuka kandi baratashye kuba mu gihugu bikabananira […] ntabwo u Rwanda rwabo rushobora kugaruka igihe tuzaba tuvugishije ukuri tukagaragaza ku Banyarwanda bose ukuri aho kuri, ntabwo biriya bishoboka.”
Kugira ngo Abanyarwanda babashe gukumira uru Rwanda Padiri Nahimana yifuza ko rugaruka, Murashi avuga ko bakwiye kuba maso bakanga ikinyoma bakimakaza ukuri kandi bakigobotora umugozi w’amoko ndetse n’ibinyoma byigishwa namwe mu madini.
