Donald Trump aheruka kuboneka agaruka muri White House kuwa gatandatu avuye i Sterling muri Virginia aho yariho akinira golf, amaze kubwirwa ko Joe Biden amaze gutsinda, kuva ubwo kugeza ubu ntarongera kuboneka mu ruhame.
Hagati aho, umushinjacyaha mukuru wa Amerika ari nawe ukuriye ibiro bishinzwe ubutabera bya Amerika, yasabye abashinjacyaha gukora iperereza ku buriganya buvugwa mu matora ya perezida yabaye.
Kuri Bwana Trump, biraboneka ko muri iyi minsi ari gukorera mu biro bye ‘Oval Office’ muri White House kuko abamurinda baboneka imbere y’umuryango, byumvikanisha ko ari ho ari, nk’uko amakuru aturuka ku biro bya White House abivuga.
Perezida Donald Trump yanze kwemera ibigaragazwa ko Joe Biden yatsinze amatora, ndetse yatangije ibirego mu mategeko ko habaye uburiganya.
Ni umuco muri Amerika ko ibyavuye mu matora bivugwa n’ibinyamakuru bikomeye, uwatsinzwe akavuga ijambo ryemera ibyo.
Gusa mu buryo bw’amategeko, ibyavuye mu matora bya nyuma byemezwa n’inteko y’abatora (electoral college), ibyo biteganyijwe tariki 14 z’ukwezi gutaha muri buri leta.
Nubwo hatangajwe intsinzi ya Joe Biden haracyari za leta zikibara amajwi. Ibyavuye mu matora yo kuwa kabiri ushize biracyari kubarwa muri leta za Georgia, Arizona, North Carolina na Alaska.
Muri leta ya Georgia, aho Biden akiri imbere ya Trump, ushinzwe ububanyi n’amahanga yasubije ku byanenzwe n’Abarepubulikani bagenzi be ku buryo ari kwitwara mu matora.
Uyu witwa Brad Raffensperger, ibiro bye nibyo bishinzwe amatora muri Georgia, yagize ati: “Habaye gutora kunyuranye n’amategeko? Yego byarabaye, kandi ibiro byanjye biri kubigenzura byose.
“Bizazamura ikinyuranyo gikenewe mu guhindura aho Perezida Trump ubu ari, dushingiye ku majwi y’intumwa (16) za Georgia? Ibyo bisa n’ibidashoboka.”
