Nyuma y’uko Mbonimana Gamariel waturukagaka mu mutwe wa politiki PL yeguye mu nteko ishingamategeko umutwe w’abadepite kubera kugaragarwaho n’ubusinzi undi mudepite wo muri FPR Inkotanyi bivugwa ko yari warakingiwe ikibaba ku makosa yakoze umwaka ushize nawe yahise yegura ku mirimo ye.
Habiyaremye Jean Pierre Celestin, ukomoka mu ishyaka FPR Inkotanyi, avuga ko nawe yeguye mu nteko ishingamategeko, ubwegurure bwe ngo bufitanye isano n’ubwegure bwa Mbonimana.
Depite Mbonimana Gamariel niwe uherutse kwegura nyuma yo gufatwa inshuro esheshatu atwaye ikinyabiziga yanyoye inzoza, ibi byari byaragizwe ibanga kugeza ubwo Perezida Kagame abimenye akabaza polisi y’Igihugu impamvu bafata umuntu atwaye ikinyabiziga yasinze bakamureka agakomeza agatwara. Nyuma y’ijambo rya Perezida Kagame Mbonama yahise yegura asaba imabazi avugako atazongera kunywa inzoga ukundi.
Habiyaremye weguye kuri uyu wambere avuga ko muri Weruwe umwaka ushize yarengeje isaha yo gutaha yari yarashyizweho mu bihe byo kwirinda ikwirakwira rya Covid-19, icyo gihe ngo yari yarabikemuye n’abari bamufashe ntibyamugiraho ingaruka ariko nyuma yaho Mbonamana avuzweho ubusinzi ikibazo cye nawe cyahise cyongera kubyutswa ahita afata umwanzuro wo “ kwegura ku mpamvu ze.”
Habiyaremye yabwiye ikinyamakuru Taarifa ko: “ Nyuma yo kubona ko ibintu bifashe indi ntera nanze gukomeza kuba intandaro y’impaka z’urudaca mpitamo kwegura.”
Kwegura kwa Habiyaremye ntikuremezwa n’inteko ishinga amategeko y’u Rwanda.
Uyu mudepite weguye arambye muri politiki kuko kuva mu mwaka wi 2010 yari umwe mu bakomeye mu kigo cy’igihugu gishinzwe ubutaka nyuma yaho ajya kuyobora komisiyo y’ubukungu mu Karere ka Burera mbere yaho yari umuyobozi wungirije w’inama y’Akarere ka Burera (Burera District council)
Habiyaremye kimwe na Mbonimana ntibazasimbuzwa mu nteko ishingamategeko umutwe w’abadepite kuko beguye habura igihe kitagera ku mwaka ngo manda y’inteko ishingamategeko irangire. Ibi bizangira ingaruka ku mashyaka ya PL na FPR kuko manda y’abadepite izarangira imyanya aya mashyaka yariyaratsindiye mu nteko ituzuye kubera iyegura ry’aba bombi.
