Abaturage bo muri Liberia barakariye Perezida wabo, George Weah, nyuma yo gutangaza ko azamara iminsi icyenda muri Qatar mu mikino y’Igikombe cy’Isi cya 2022.
Perezida George Weah wakanyujijeho nk’umukinnyi wa ruhago yavuye mu gihugu mu cyumweru gishize agiye mu ngendo zitandukanye ariko gahunda ze ntizigezwe zitangazwa.
George Weah yakiniye amakipe akomeye ku Mugabane w’u Burayi arimo AC Milan yo mu Butaliyani na Chelsea FC yo mu Bwongereza.
Uyu Mukuru w’Igihugu w’imyaka 56 nyuma yo gusoza gukina ruhago yinjiye muri politiki ndetse atorerwa kuyobora Liberia mu 2017.
Amakuru ya gahunda nshya y’ingendo za George Weah hanze ya Liberia yarakaje abenegihugu ndetse bamwe bajya kuri radio no ku mbuga nkoranyambaga baramunenga.
Mu byo bavuga bagaragaje ko bidakwiye ko perezida ajya muri Qatar mu gihe abaturage benshi bafite inzira ndetse hari n’ibibazo bishingiye ku ibarura rusange ry’abaturage riheruka gusubikwa ku nshuro ya gatandatu.
Abayobozi bo muri Perezidansi ya Liberia ntacyo batangaje ku bibazo babajijwe bijyanye n’ikiguzi cy’urugendo rwe ndetse bashimangiye ko ingendo ze hanze y’igihugu zifitiye inyungu igihugu.
Igikombe cy’Isi kizatangira ku wa 20 Ugushyingo, gisozwe ku wa 20 Ukuboza 2022. Kizitabirwa n’amakipe y’ibihugu 32 bizakinira kuri stade umunani.
Kugeza ubu amatike arenga miliyoni yaragurishijwe mu gihe ubusabe burenga miliyoni 40 bwatanzwe n’abifuza kureba Igikombe cy’Isi.
Perezida wa Liberia, George Weah yarakariwe nyuma yo gutangaza gahunda ye mu Gikombe cy’Isi
