Ni Paruwasi nshya ya Kamabuye yo mu Karere ka Bugesera, yuzuje umubare wa Paruwasi 39 w’izigize Arkidiyosezi ya Kigali, yafunguwe ku mugaragaro na nyiricyubahiro Cardinal Antoine Kambanda kuri iki cyumweru Tariki ya 30 Ukuboza 2022.
Umubare mwinshi w’Abakristu Gatolika bo muri Paruwasi ya Ruhuha yabyaye Paruwasi nshya ya Mutagatifu Elizabeti-Kamabuye yahoze ari Santarari yayo.
Abasaseridoti , bihaye Imana n’abashyitsi bo mu byiciro bitandukanye bari bakubise buzuye, bazinduwe no gutaha Paruwasi nshya ije kunganira Abakristu bakoraga urugendo bajya gushaka Umupadiri cyangwa se izindi serivise kuri Paruwasi ya Ruhuha.
Umushumba w’Arkidiyosezi ya Kigali Antoine Cardinal Kambanda, ayifungura ku mugaragaro ashimira cyane Abakristu ashinzwe, umuhate bagize mu bikorwa bya buri munsi, bagambiriye kubona Paruwasi yabafasha kwitagatifuza mu masakaramentu atandukanye bafite hafi yabo Abasaseridoti mu buryo butabafata urugendo rwa kure.
Agira ati “ mubonye Paruwasi nziza ya Kamabuye yitiriwe Umubyeyi Elizabeti-Kamabuye, uyu ni wa mubyeyi wahaye Icyubahiro gikomeye Mariya nyina wa Jambo, ubwo yamusuraga akamusanganiza indamukanyo yabaye Umurage w’isengesho ry’Abakristu Gatolika ibihe byose rya DAKURAMUTSA MARIYA.”
Asaba abakristu gufata Paruwasi yabo neza maze imico n’urugero rwiza rwaranze Elizabeti Mutagatifu buri wese akabigira ibye.
Avuga ko yizera neza ko Mutagatifu Elizabeti azakomeza kubabera urumuri rw’iminsi yose, bityo abasaba gukomeza kurera abana babo Gikristu, babarinda kwishora mu ngeso mbi nk’ubusinzi n’ibiyobyabwenge, ahubwo bakabafasha kuzavamo abagabo n’abagore bashyitse bazagirira Kiliziya akamaro n’igihugu muri rusange.
Ikindi avuga ni uko muri rusange Ubukristu , butangirira mu muryango ubwawo , Santarari na Paruwasi bikaza bibunganira.
Yishimira ko muri Arkidiyosezi ya Kigali, hamaze kuboneka amaparuwasi 39 arigufasha Abakristu kubonera hafi Serivise bakeneye bitabasabye urugendo, ari na byo byari muri gahunda yihaye ubwo yatangiraga kuba Umushumba w’Arkidiyosezi mu mwaka wa 2019.
Padiri Mukuru wa Paruwasi ya Ruhuha Musemakweri Elyvenus yibarutse Paruwasi ya Mutagatifu Elizabeti-kamabuye yahoze ari santarari, avuga ko bashimishijwe no kuba Abakristu ba Santarari ya Kamabuye, bararwanye ishyaka rikomeye ryo gushyira imbaraga zabo hamwe bagamije kubona Paruwasi, kuri uyu wa30 Ukwakira 2022 inzozi bamaranye igihe zikaba zibaye impamo Nyiricyubahiro Antoine Cardinal Kambanda akayibamurikira ku mugaragaro.
Agira ati “ turanezerewe kandi birashimishije nk’iyo Umubyeyi yibarutse undi mwana mushya. Twari dufite Paruwasi imwe ya Ruhuha igizwe n’amasantarari atandukanye, kuba Santarari ya Kamabuye ihindutse Paruwasi kandi igashingwa umwe mu ba Padiri twakoranaga uhazi neza, bizafasha abakristu gukorana nawe neza, bungurane ibitekerezo muri byose, bito Ijambo ry’Imana rikomeze ricengere mu mitima ya bose.”
Padiri Mukuru wa Paruwasi nshya ya Kamabuye Evariste BIRAMAHIRE Ashimira cyane Nyiricyubahiro Antoine Cardinal Kambanda, wamugiriye icyizere cyo gushingwa Paruwasi nshya ya Mutagatifu Elizabeti-Kamabuye, avuga ko agiye gushyiraho ake afatanyije n’Abakristu kugira ngo mu minsi itari myinshi, Paruwasi izabe imaze kugera ku urugero rushimishije izaba yafatiye kubabanjirije, by’umwihariko Paruwai ya Ruhuha yabibarutse.
Agira ati “tuzafatanya n’Abakristu gushyigikira no guteza imbere iyi Paruwasi yacu. Mu byukuri n’ubwo ari nshyashya bwose, ntidutangiriye kuri zero, cyane ko Santarari yari isanzwe ikora neza inafite ibikorwa bigaragara.
Mu byukuri, dutangiranye Abakristu basaga ibihumbi 6 bibumbiye mu ma Santari atatu, turizera kandi ko hakiri benshi bafite inyota yo kwigishwa bakabatizwa, bityo n’umubare w’abakristu ukaziyongera, tugakomeza gushimira no gusingiriza Imana hamwe, yo muremyi dukesha kubaho.”
Nkeshimana Vital, ni Umukristu uhagarariye bagenzi be muri Paruwasi ya Kamabuye, avuga ko kubwe atabona uburyo asobanura ibyishimo we na bagenzi be bafite, ibyishimo byo kuba bagiye kujya basengera muri Paruwasi yabo ya bagizemo uruhare muguharanira ko yashingwa.
Agira ati : byadutwaraga amasaha n’urugendo byo kujya gusengera ku Ruhuha, cyangwa se kujya muri gahunda z’amasakaramentu no muzindi Serivise zikenerwamo Umusaseridoti. Iyi Paruwasi rero tugiye kuyibyaza umusaruro dufatanyije n’Abayobozi bayo baduhaye kandi tuzabigeraho nta kabuza.
Umuyobozi w’Intara y’Iburasirazuba CG Gasana Emmanuel, wari Umushyitsi Mukuru, ashimira cyane Arkidiyosezi ya Kigali iyobowe na Nyiricyubahiro Antoine Cardinal Kambanda, uburyo ikomeje kwegereza Abakristu bashinzwe za Paruwasi hafi, kugira ngo be kujya bakora urugendo rurerure.
Avuga ko ibyo Kiliziya bigendanye cyane na gahunda za Leta zo kwegereza abaturage Ubuyobozi buri hafi yabo, cyane cyane mu nzego z’ibanze.
Agira ati Leta ishyigikira kenshi ibikorwa by’Amadini n’Amatorero cyane ko dufatanya muri byinshi. Ndavuga nk mu burezi, amavurio, ibitaro n’ibindi.
Muri iyi mikoranire myiza rero , tuboneyeho kubasaba gukomeza gushishikariza abayoboke banyu, na cyane ko babumvira iyo mwabatumyeho, gukomeza kuba Abakristu beza bitabira gahunda za Leta, birimo gutangira ubwisungane mu kwivuza ku gihe, gukomeza kwirinda no gukumira icyorezo cya Covid 19, Kujyana abana bose mu ishuri, ndetse n’izindi gahunda zose zigamije gufasha umuturage kugera ku iterambere rirambye.”
Paruwasi ya Mutagatifu Elizabeti-Kamabuye yatashywe ku mugaragaro na Nyiriycubahiro Cardinal Antoine Kambanda, ije yuzuza umubare wa Paruwasi 39 ya zigize Arkidiyosezi ya Kigali kugeza ubu.
Paruwasi 8 muri zikaba zagiyeho mumyaka itatu gusa Cardinal Antoine kambanda, amaze ashinzwe kuba Umushumba wa Arkidiyosezi ya Kigali na Nyirubutungane Papa Francis, agatangaza ko intego igamijwe muri rusange, ari ukwegereza Abakristu aho babonera Serivise zigendanye n’ibikenerwa byose muri Kiliziya mu buryo buboroheye.
Yanditswe na Turatsinze Emmanuel
