Perezida Paul Kagame, Madamu Jeannette Kagame na Gen Muhoozi Kainerugaba uri mu ruzinduko mu Rwanda, bifatanyije n’abatuye Umujyi wa Kigali muri siporo rusange imenyerewe nka Car Free Day.
Ni mu ruzinduko bwite General Muhoozi – Umuhungu w’imfura wa Perezida Yoweri Museveni akaba n’Umujyanama mukuru wa Perezida mu bijyanye n’igisirikare n’umutekano – agiriye mu Rwanda ku nshuro ya gatatu, kuva uyu mwaka watangira.Mu bandi bitabiriye iyi siporo harimo Minisitiri wa Siporo Munyangaju Aurore Mimosa, Umuyobozi w’Umujyi wa Kigali Pudence Rubingisa n’umunyamakuru Andrew Mwenda wo muri Uganda.
Iyi siporo rusange yatangijwe muri Gicurasi 2016 iba inshuro imwe mu kwezi. Mu ntangiriro za 2018 ni bwo Perezida Kagame yasabye ko yajya iba kabiri mu kwezi.Yatangijwe hagamijwe gushishikariza abaturage kwirinda indwara zitandukanye zirimo izitandura zihangayikishije isi. Mu bihe bitandukanye, abayitabira bakomeje guhabwa inama bakanapimwa izi ndwara ku buntu.Imihanda itandukanye muri Kigali iba yafunzwe ku binyabiziga, igaharirwa abanyamaguru n’abakoresha amagare.Kuri iki Cyumweru, Perezida Kagame, Madamu Jeannette Kagame, Gen Muhoozi n’abo bari kumwe batangiriye urugendo kuri BK Arena, bakomereza ku Gishushu, ku Biro bya Minisitiri w’Intebe, aho basoreza kuri Kigali Heights.Muri iyi siporo rusange kandi hatangwaga n’ubutumwa bugira buti “Twirinde Kanseri y’Ibere, Tuyisuzumishe Hakiri Kare kuko Ivurwa Igakira.”Minisitiri w’Ubuzima, Dr Daniel Ngamije yasangije abitabiriye Car Free Day ibimenyetso bya kanseri y’ibere ko harimo kugira akabyimba mu ibere, imoko igatebera ndetse hakavamo ibintu bidasanzwe.Yabasabye abagore n’abagabo kujya bisuzumisha hakiri kare kuko ivurwa igakira.Muri iyi Siporo Rusange kandi hashyizweho umwihariko wo guha abana ahantu hihariye bagakina n’ababyeyi babo.Gen Muhoozi aheruka mu Rwanda muri Werurwe 2022, mu ruzinduko rw’iminsi itatu rwasojwe Perezida Paul Kagame amugabiye inka z’Inyambo. Yaje gutangaza ko inka Perezida Kagame yamugabiye ari 10.Ku wa 23 Nzeri nibwo yatangaje ko ateganya urundi ruzinduko mu Rwanda, yifashishije Twitter.Ati”Nishimiye gutangaza ko vuba aha nzasura data wacu, Nyakubahwa @PaulKagame, kugira ngo nige biruseho ibijyanye n’ubworozi bw’inka. Nizeye guhura n’inshuti nyinshi i Kigali. Imana ihe umugisha Uganda n’u Rwanda!”Yanatangaje ko ateganya gusura ibindi bihugu byinshi birimo Tanzania na Kenya. Izi ngendo zose zirimo gukorwa nyuma y’imyaka ishize umubano w’u Rwanda na Uganda utameze neza, kugeza ubwo mu 2019 u Rwanda rwafashe icyemezo cyo gufunga Umupaka wa Gatuna, runasaba abaturage kudasubira muri Uganda kubera ihohoterwa bakorerwaga.Benshi babaga bashinjwa ibyaha by’ubutasi, ariko ntibabiregwe mu nkiko ngo bisobanure.Ibyo bigahuzwa n’uko imitwe igamije guhungabanya umutekano w’u Rwanda yari imaze guca ingando muri Uganda, harimo nka RNC ya Kayumba Nyamwasa, FDLR, RUD Urunana n’indi mitwe ikahakoresha nk’igicumbi cy’icengezamatwara no gushaka abarwanyi bashya.Byageze aho iyo mitwe yivanga mu mikorere y’inzego z’umutekano za Uganda, by’umwiharizo Urwego rwa gisirikare rushinzwe ubutasi, CMI, ku buryo uwo idashaka yatotezwaga.Mu gushaka gukemura ibyo bibazo hitabajwe imishyikirano n’abahuza barimo Repubulika Iharanira Demokarasi ya Congo na Angola, hashyirwaho n’amatsinda y’ibiganiro akuriwe na ba Minisitiri b’Ububanyi n’amahanga, ab’umutekano n’abakuriye iperereza.Imyaka itatu yashize nta musaruro ufatika, uretse ko icyorezo cya COVID-19 nacyo cyadindije ukwihuta kw’ibiganiro.Nyamara byafashe ingendo ebyiri gusa za Muhoozi, ku wa Mbere tariki 31 Gashyantare 2022 umupaka wa Gatuna urafungurwa.Ni mu gihe benshi batamuhaga amahirwe kuko nta bunararibonye yakunze kugaragaza muri politiki cyangwa dipolomasi.Uruzinduko rwa mbere rwabaye ku wa 20 Mutarama 2022, rushimangirwa n’urwabaye muri Werurwe 2022 rugamije gukemura “ibibazo byari bisigaye” mu mubano. Nyuma yaho Perezida Kagame na Museveni bahuriye i Nairobi.Lt Gen Muhoozi yaje gutangaza ko ahura na Perezida Kagame yamwijeje ibintu bibiri.Ati “Icya mbere, nk’Umugaba w’Ingabo za Uganda zirwanira ku butaka, ingabo zanjye ntizizigera zitera u Rwanda, icya kabiri nta n’umwe mu bagize inzego z’umutekano za Uganda urwanya u Rwanda uzaguma mu mwanya w’akazi arimo, ibindi biraza mu kanya.”Akubutse mu Rwanda, Major General Abel Kandiho wayoboraga CMI yakuweho.Mu gushimangira izahuka ry’umubano, Uganda yaje kwirukana Robert Mukombozi usanzwe ari umuhuzabikorwa wa RNC muri Australia.Muhoozi yatangaje ko uwo mugabo yasubijwe aho yari aturutse, anaburira Kayumba Nyamwasa ko bamwoherereje “umuntu we.”Ati “Jenerali Kayumba, ndagusabye gerageza kubaha Uganda. Dufitanye amahoro na Afande Kagame n’u Rwanda. Gerageza kubyubaha.”Isura nshya muri uyu mubano yakomeje gushimangirwa ubwo muri Mata, Perezida Paul Kagame yitabiraga isabukuru y’imyaka 48 ya Lt Gen Muhoozi Kainerugaba.Yabwiye abari muri ibyo birori ko nubwo yari afitiye Muhoozi icyizere gikomeye ubwo bahuraga, yari azi ko ibyo amubwira abyemeranyaho na Museveni.Ati “Mu buryo ntashidikanyaho nubwo nari mfitiye icyizere gikomeye Muhoozi, niyumvishaga ko Perezida wa Uganda (Se) agomba kuba ari inyuma y’ubwo butumwa.”Kugeza ubu bikomeje kuvugwa ko Muhoozi ashobora kuzasimbura se ku butegetsi. Amatora ataha ya Perezida wa Uganda azaba mu 2026. Museveni azaba afite imyaka iri muri 80, Muhoozi afite 51.
