Perezida Paul Kagame yakiriye mu biro bye, Village Urugwiro, Igikomangoma cy’u Bwongereza Henry Charles Albert David uzwi nka Prince Harry uyobora umuryango African Parks ubungabunga ibidukikije.
Ubutumwa bwanyujijwe kuri konti ya Twitter y’Ibiro by’Umukuru w’Igihugu, buvuga ko Perezida Kagame yakiriye Igikomangoma Harry mu rwego rw’akazi nka Perezida wa African Parks.
President Kagame received Prince Harry, The Duke of Sussex, who visited Rwanda as part of his work as President of African Parks. The Government of Rwanda has agreements with African Parks to manage Akagera and Nyungwe National Parks. pic.twitter.com/P1WPIYSyVg
— Presidency | Rwanda (@UrugwiroVillage) August 22, 2022
Guverinoma y’u Rwanda isanzwe ifite amasezerano na African Parks yo gucunga Pariki y’Akagera mu Ntara y’Iburasirazuba na Pariki ya Nyungwe iri mu Ntara y’Iburengerazuba.
Mu 2009 nibwo African Parks yasinyanye amasezerano n’Ikigo cy’Igihugu cy’Iterambere (RDB) ashyiraho ikigo Akagera Management Company (AMC) gicunga Pariki y’Igihugu y’Akagera, maze mu 2010 gitangira imirimo gikuriwe n’inama y’ubutegetsi ihuriweho na RDB na African Parks.
Tariki ya 7 Ukwakira 2019 RDB yasinyanye na African Parks andi masezerano y’imyaka 20 yo gucunga Pariki y’Igihugu ya Nyungwe.
Prince Harry w’imyaka 37 ni umwe mu bagize Umuryango w’ibwami mu Bwongereza, umuhungu muto w’ibikomangoma, Charles na Diana, akaba uwa gatanu ku ruhererekane rw’abashobora kuragwa ubutware mu Bwongereza. Mu Ukuboza 2017 nibwo yagizwe Perezida wa African Parks.
Prince Harry ategerejweho gukorana na African Parks mu gucunga pariki zitandukanye mu izina rya Guverinoma z’ibihugu no guteza imbere ibungabungwa ry’urusobe rw’ibinyabuzima muri Afurika no ku Isi hose.
