Makanyaga Abdul, umwe mu bahanzi bafite ubuhanga buhambaye mu muziki kandi ubirambyemo, yashyize hanze indirimbo nshya yise ‘Twirinde Coronavirus’ ivuga ku bubi bw’iki cyorezo ndetse inasaba abantu gukomeza kucyirinda.
Muri iyi ndirimbo nshya ya Makanyaga hari aho aririmba ati “Ukumira umwanzi amwima inzira, Coronavirus tuyirinde. Nta munsi w’ubusa tutaburirwa, Coronavirus ni icyorezo simusiga.”
Uyu muhanzi yabwiye IGIHE ko yatekereje guhimba iyi ndirimbo ngo atange umusanzu nk’umuhanzi, kuko hari bamwe bashobora kuba batafata umwanya ngo bakurikirane ibijyanye n’icyo cyorezo ariko akaba yabinyuza mu ndirimbo bakabyumva byoroshye.
Ati “Ni umusanzu mba natanze nk’umuhanzi, kuko hari benshi bakurikira ibihangano byanjye, byafashe guhita bumva ubutumwa nashatse gutanga bujyanye n’iki cyorezo.”
Abwira abantu ko bakwiriye kwigengesera bakirinda iki cyorezo cyugarije Isi yose muri iki gihe.
Makanyaga avuga ko COVID-19 yazanye ubumara bumaze abantu, agasaba buri wese kwinjira mu rugamba rwo kuyihashya.
Mu butumwa bwe akangurira buri wese gukomeza gukurikiza ingamba zashyizweho zo kwirinda Coronavirus zirimo gukaraba intoki neza kandi kenshi, kwambara agapfukamunwa igihe ugiye ahari abantu benshi.
Avuga ko iki ari atari igihe cyo gutuma abakiri bato, kuko bashobora guhura n’abayanduye COVID-19. Uyu muhanzi avuga ko COVID-19 ari indwara idasanzwe, kuko uyirwaye adasurwa bitewe n’uko ubwandu bwayo ari icyorezo.
Asaba buri wese wumva ufite ibimenyetso by’iki cyorezo kumenyesha inzego z’ubuzima mu rwego rwo kwirinda no kurinda ubuzima bw’abandi.
Makanyaga yasohoye amashusho y’indirimbo mu gihe aherutse kuririmba mu iserukiramuco rya Iwacu Muzika Festival, yakumbujemo benshi igisope.
Yaririmbye ibihangano bye bitandukanye byakanyujijeho birimo “Urukundo”, “Nshatse Inshuti” n’izindi.
Makanyaga Abdul yamamaye cyane mu muziki wo hambere [ukunze kwitwa ‘Igisope’] ndetse n’uyu munsi akaba akiri mu bahanzi bakunzwe na benshi.
Uyu muhanzi yavukiye ahitwa i Ngoma mu Karere ka Huye mu Majyepfo y’u Rwanda mu 1947, kugeza ubu ni umwe mu bakuze bakiriho bakora umwuga w’uburirimbyi.
Makanyaga arubatse afite abana n’umugore. Mu rugendo rwe rwa muzika yahereye ku ndirimbo “Urabeho Mariyana” yakoze mu 1971, ariwe uyiyandikiye akanayikorera injyana muri Orchestre “Les Copains” yaririmbiragamo.
