Inama idasanzwe y’Abakuru b’Ibihugu bigize ihuriro Troika ry’Umuryango w’Ubukungu muri Afurika yo mu Majyepfo (SADC), yemeje ubusabe bw’Umuryango w’Abibumbye bwo kongerera ingufu umutwe wa FID (Brigade d’intervention de la force), wo mu ngabo za Loni ziri muri Repubulika ya Demokarasi ya Congo.
Ibi ngo ni mu rwego rwo kwihutisha ibikorwa byo kugarura amahoro wakoraga, ndetse hemeranyijwe no kongeramo imitwe y’ingabo ibiri ihuriweho n’ingabo zikomoka mu bihugu bigize SADC.
Ibi byatangajwe mu itangazo ry’ibyemezo by’inama idasanzwe y’uyu muryango yabaye ku wa 27 Ugushyingo ikabera i Gaborone muri Botswana, ihuriwemo n’ibihugu bifite ingabo muri FID, Repubulika ya Demokarasi ya Congo na Mozambique.
Iyi nama idasanzwe yashimiye Umuryango w’Abibumbye ku bw’ubufatanye ukomeza kugaragaza ndetse n’ubufasha udahwema gutanga.
Mu ijambo rye muri iyi nama, Perezida wa Botswana, akaba n’Umuyobozi wa Troika, Dr Mokgweetsi Eric Keabetswe, yashimiye bagenzi be uruhare bakomeje kugaragaza mu kugarura amahoro muri RDC na Mozambique.