Iryo ni rimwe mu ibango ry’ijambo, Minisitiri w’Ubumwe bw’Abanyarwanda n’Inshingano Mboneragihugu, Bizimana Jean Damascène yagejeje ku rubyiruko rw’abasore n’inkumi 381 basoje Itorero “Intagamburuzwa” ikiciro cya 8 i Nkumba, mu Karere ka Burera.
Itorero “Intagamburuzwa” ry’urubyiruko rw’abasore n’inkumi barokotse Jenoside yakorewe Abatutsi, ryamaze imins 7 ribera mu Kigo cy’Ubutore cya Nkumba, mu Karere ka Burera.
Insanganyamatsiko igira iti “UBUDAHERANWA, UMURAGE WACU “Iri torero ry’Intagamburuzwa ikiciro cya 8, abasore n’inkumi 381, baturutse mu mashuri makuru na za kaminuza, bigishijwe amasomo atandukanye, ay’ingenzi ni amateka y’u Rwanda, indangagaciro na kirazira by’umuco nyarwanda, banaganirizwa amahirwe bafite nk’urubyiruko n’uburyo bwo kuyabyaza umusaruro.
Bizimana yabahaye urugero rwa bamwe mu barokotse Jenoside yakorewe Abatutsi baba muri Canada n’ahandi i Burayi batatiye igihango bashinga ihuriro bise “Igicumbi” bifatanya n’abarwanya igihugu, kandi aricyo cyabigishije ;
Uru rubyiruko arusaba kujya ku mbuga nkoranyambaga bakabanyomoza, yagize ati : Buri wese akore byibura tuweti 2 buri munsi, imbuga nkoranyambaga muzijyeho, muvuge u Rwanda ibyiza”.
Yagize ati” Ni ukubarwanya no kubamagana,ibyo gusebya Igihugu cyacu, gusebya Umukuru w’Igihugu cyacu,kubeshyera ingabo z’ u Rwanda ,kudusiga icyasha tudafite,tugomba gufatanya kubirwanya.”
Bizimana yabasabye kandi gukomeza kuzirikana imihigo n’inyigisho bakuye mu itorero baba ba “Bandebereho” aho bari hose, mu gukora ibyiza.
Minisitiri Bizimana yakebuye uru rubyiruko agira ati:
”Bikunze kugaragara intore ziraza zigatozwa, zikigishwa, zigahiga, zikiyemeza ariko twasubira aho dusanzwe tuba, aho dukorera, aho twiga ugasanga ya mihigo iragenda igabanya umurego icika intege umunsi ku munsi; bamwe bakageraho bakanibagirwa ya mihigo bihaye mu butore bavanye hano. Nagira ngo rero icyo mukizirikare, uwo murego, umuvuduko, ibyemezo mufatiye aha, imihigo mwahize muzayizirikane muyikurikize munabitoze abandi.”
Minisitiri Bizimana yakomeje asaba urubyiruko gufata iyambere kuko ari rwo Rwanda rw’ejo ruzasigara rurinze igihugu kuko kimaze kugira aho kigera bakakirinda gusubira inyuma no gusenyuka,
Urubyiruko rwa ARG rugomba gufata iyambere mu kurengera igihugu yagize ati : “Mufite umwihariko yuko mwarokotse Genoside yakorewe Abatutsi, mufitanye igihango n’ababarokoye ni igihango cyo kurinda igihugu”.
Yakomeje abizeza ko nka Minisiteri bazafatanya n’ubuyobozi bwa AERG kureba uburyo imihigo bahize bayishyirwa mu bikorwa aho biga n’aho batuye, kugira ngo bye kuba amagambo gusa, anabasaba guharanira kuba ku isonga mu mashuri bigamo bakaba aba mbere mu gutsinda no kuba intarushwa mu masomo yabo, na cyane ko isoko ry’umurimo risaba ubumenyi n’ubuhanga
Umwe mu banyeshuri Kirenzi Umulisa Annick wiga muri Kaminuza y’u Rwanda, Université y’u Rwanda (UR), ishami ry’Ubuhanga n’Ikoranabuhanga, (Science et Technologie) yagize ati :
“Twigishijwe kugira ubupfura, ubunyangamugayo, gukunda igihugu..” akomeza avuga ko bakomereje aho biga, aho babarizwa hose gutanga umusanzu wabo nk’intore bigisha urubyiruko bagenzi babo ibyo bavanye mu itorero, by’umwihariko biyemeza ko bagiye guhangana n’abagoreka amateka y’igihugu.
Naho mugenzi we Bimenyimana Jean d’Amour wiga muri IPRC Huye, yateye mu rya mugenzi, avuga ko bigishijwe indangagaciro zirimo ubumwe, ubupfura, ubunyangamugayo, gukunda igihugu no kugikorera, kandi ko bagiye gutanga umusanzu wabo nk’intore bigisha urubyiruko bagenzi babo ibyo bavanye mu itorero.
Itorero Intagamburuzwa za AERG ikiciro cya munani, ryatangiye tariki 05 risozwa tariki 11 Gashyantare 2023, ryitabirwa n’abasore n’inkumi 381, bavuye mu mashuri makuru na za Kaminuza 37 yo hirya no hino mu gihugu.
Alphonse Uhagaze
