Mu minsi itatu ishize nibwo hamenyekanye inkuru uvuga ko umuhanzi Makanyaga Abdul yafashwe n’uburwayi butunguranye bwatumye ajyanwa mu bitaro bya Kaminuza bya Kigali (CHUK) kugeza ubu abamuri hafi batangaza ko akeneye ubufasha kugira ngo abone uko avurwa.
Bivugwa ko ubu burwayi bwafashe uyu muhanzi akiri mu rugendo rw’ibitaramo yari afite mu minsi ibanziriza Noheli bwatewe n’umunaniro ukabije.
Umuyobozi w’umuryango Vangingazo CBC ibungabunga inyungu n’ibikorwa by’uyu muhanzi, Jane Uwimana, yabwiye IGIHE ko uyu muhanzi n’ubu akiri mu bitaro.
Jane Uwimana avuga ko iyi nkunga atari iyo kumufasha kwivuza gusa ahubwo ari iyo kumufasha mu buzima busanzwe no gutegura igitaramo azakora muri Kamena.
Ati “Iyi nkunga ni iyo kumufasha mu buzima bwe bwa buri munsi harimo no kwivuza, aracyari mu bitaro bya CHUK ariko twemeranyijwe ko agiye kugabanya ibitaramo bimunaniza cyane akazakora igitaramo kimwe gusa nko muri Kamena ya 2023.”
“Kugira ngo ibyo bishoboke, hakenewe ubufasha bw’abakunzi be bose tukaba dusabwa kumutera inkunga y’amafaranga yo kumufasha gusunika iminsi akabasha kwitegura neza icyo gitaramo kimwe kinini.”
Uyu muhanzi ukundwa n’abatari bake yaba abakuru n’abato yashakiwe MoMo code, iri mu mazina ye no kuri simcard ye isanzwe; ni we ubwe wakira iyo nkunga.
“Kumwoherereza iyo nkunga ni ugukanda *182*8*1*353495*amafaranga*umubare w’ibanga# uhita ubona ubutumwa bugufi bw’uko wohereje ayo mafaranga kuri Makanyaga Abdallah.
Ku wa Gatanu tariki 23 Ukuboza 2022, Makanyaga n’abandi bahanzi babarizwa mu ihuriro rya Vanginganzo bataramiye mu Karere ka Musanze.
Uyu muhanzi yaririmbiye i Musanze agomba guhita yerekeza i Rubavu ku wa 24 Ukuboza 2022 aho yari afite igitaramo i Mahoko.
Nyuma y’iki gitaramo yaje gufatwa n’uburwayi IGIHE itahise imenya biba ngombwa ko yoherezwa mu bitaro bya Gisenyi, nyuma yo kwitabwaho n’abaganga bahita bamwohereza mu bitaro bya Kaminuza bya Kigali (CHUK) ari naho kugeza ubu arwariye.
Ubu burwayi bwatumye Makanyaga asubika n’akazi yari afite i Rusizi, aho yagombaga gutaramira ku wa 25 Ukuboza 2022.
