Guverineri wa Banki Nkuru y’u Rwanda, John Rwangombwa, yavuze ko u Rwanda kimwe n’ibindi bihugu rurimo gushaka ahandi rwatangira kuvana ingano zikoreshwa mu gihugu, aho mu masoko arimo gutekerezwaho harimo no muri Argentine.
Ni uburyo burimo gukoreshwa mu kugerageza kuziba icyuho kimaze guterwa n’intambara y’u Burusiya na Ukraine, ibihugu bimaze igihe bigaburira isi mu bijyanye n’ingano, ibikomoka kuri peteroli n’inyongeramusaruro.
Ibyo bihugu kandi bikungahaye ku bihwagari bivamo amavuta yo guteka.
Kuri uyu wa Kabiri nibwo Banki Nkuru y’u Rwanda yatangaje ko Politiki y’Ifaranga ihagaze mu gihugu, kimwe n’ibijyanye n’ubutajegajega bw’urwego rw’imari.
Guverineri Rwangombwa yavuze ko intambara yo muri Ukraine yatumye ibiciro by’ibikomoka kuri peteroli bizamuka cyane mu gihe gito, ku buryo kugira ngo biboneka bizasaba ko u Rwanda rurushaho kuzamura amafaranga rukoresha mu gutumiza ibintu hanze.
U Burusiya na Ukraine kandi ni ibihugu u Rwanda rutumizamo hafi 40% by’inyongeramusaruro zose rukenera, na hafi 60% by’ingano.
Yakomeje ati “Byatumye ibiciro bizamuka, ariko bishobora no kuzagorana kubona n’ibihagije. Ibyo rero bihita bigira n’ingaruka ku biciro byabyo, bikagira ingaruka ku biciro kuis oko muri rusange.”
Byongeye, ngo nk’ibikomoka kuri peteroli iyo bizamuye ibiciro bigira ingaruka ku bwikorezi, bityo bigatuma n’ibiciro by’ibindi bicuruzwa bizamuka.
Mu gihe ibi bicuruzwa bibuze, ngo icyihutirwa ni ugushaka ahandi bigomba kuva.
Rwangombwa yakomeje ati “Uravuga uti kuki nk’igano tutazihingira, ngira ngo byarageragejwe hano, ntabwo dushobora guhinga ingano zihagije inganda dufite hano. Uwo mwanya rero mu gihe bagishakisha ahandi bazikura, kandi ntabwo ari twebwe gusa, ni ibihugu bitadukanye byazikuraga muri ibyo bihugu byombi, ubu twese tugiye kongera tujye gushaka ahandi, ubu harimo kuvugwa Argentine.”
“Ubwo nitujya kurwanira muri Argentine n’ahandi, igiciro kirahita kizamuka. Ariko n’uwo mwanya bifata mu guhindura aho wakuraga ukajya gushaka ahandi, ingaruka zirahari ntabwo wazirinda.”
Rwangombwa yavuze ko kimwe n’inyongeramusaruro, u Rwanda rutaragera ku rwego rwo kwikorera inyongeramusaruro rukenera, mu gihe hari ibihugu bifite ibikenerwa byose ngo bizitunganye ku bwinshi, bizohereze mu mahanga.
Gusa avuga ko izi ngaruka nubwo zizaba zikomeye byoroshye kuzibamo, bitandukanye n’uko byari bimeze muri COVID-19 kuko yo yahagaritse ubuzima ku isi yose.
Yakomeje ati “Ariko ntabwo twavuga rwose ngo nta ngaruka iriya ntambara izatugiraho, kubera ibyo byose by’ibikomoka kuri peteroli, inyongeramusaruro n’ingano. Inyongeramusaruro zo rero zirakomeye cyane kubera ko zifasha guteza imbere ubuhinzi bwacu. Uko igira icyo kibazo rero ari ukuzamura igiciro no kuboneka nabo, birahita bigira ingaruka ku bihinzi.”
Yavuze ko muri iki gihe binagoye ko ingano zaboneka muri Afurika hafi, hahita haboneka umusaruro waziba iki cyuho.
Gusa ngo iyi ntambara iratuma ibihugu bitekereza ibisubizo birambyuye, byatuma bihinga ingano zihagije umugabane.
