Taliki 24-08-2021
Tunizia-Guniea (Kigali Arena-10h30)
Central African Republic-Misiri (Kigali Arena-13h30)
Rwanda-RDC (Kigali Arena-18h00)
Angola-Cap Vert (Kigali Arena-21h00)
Kuri uyu wa Kabiri taliki 24 Kanama 2021 ni bwo hatangira imikino y’Afurika “FIBA Afrobasket Rwanda 2021” aho ikipe y’u Rwanda ikina na RDC mu gihe ikipe ya Tunizia ifite igikombe giheruka ari iyo iribufungure irushanwa ikina umukino wa mbere na Guinea.
Ku munsi wa mbere w’irushanwa hateganyijwe imikino 4 yo mu itsinda A na B. Umukino ufungura irushanwa urahuza ikipe ya Tunizia na Guinea saa yine n’igice (10h30) naho umukino wa kabiri uhuze ikipe ya Central African Republic na Misiri saa saba n’igice (13h30). Izi kipe zose zikaba ziri mu itsinda B.
Nyuma y’iyi mikino yo mu itsinda B hateganyijwe ibirori byo gufungura irushanwa ku mugaragaro kuva saa kumi n’iminota 45 (16h45).
Nyuma yo gufungura irushanwa ku mugaragaro, ikipe y’u Rwanda irakina na RDC saa kumi n’ebyiri (18h00). Izi kipe ziheruka guhura muri AfroBasket 2007 ubwo ikipe y’u Rwanda yitabiraga ku nshuro ya mbere. Ikipe y’u Rwanda yatsinze RDC amanota 89 kuri 87 mu guhatanira umwanya wa 9 kugeza 16. Uyu ni nawo mukino rukumbi ikipe y’u Rwanda yatsinze mu mikino 6 yakinnye.
Iyi kipe y’u Rwanda mu nshuro 2 ziheruka (2013 na 2017) yitwaye neza mu mukino wa mbere mu itsinda. Muri 2013, ikipe y’u Rwanda yatsinze Burkina Faso amanota 80 kuri 61 naho muri 2017, ikipey’u Rwanda itsinda Guinea amanota 75 kuri 55.
Izindi nshuro 3 (2007, 2009 na 2011), ikipe y’u Rwanda yatsinzwe umukino wa mbere mu itsinda. Muri 2007 yatsinzwe na Angola amanota 109 kuri 66, muri 2009 itsindwa na Maroc amanota 85 kuri 84 naho muri 2011 itsindwa na Central African Republic amanota 86 kuri 61.
Umukino usoza iy’umunsi wa mbere urahuza ikipe ya Angola Cap Vert saa tatu z’ijoro (21h00). Izi kipe zikaba ziri itsinda A.
Abafana bemerewe kureba iyi mikino ariko barasabwa kwipimisha COVID-19 (Rapid test) ndetse no kugaragaza igisububizo cy’uko batanduye kimara amasaha 48. Kuba barakingiwe nibura urukingo rwa mbere rwo kwirinda COVID-19 ku banyarwanda. Kwipimisha COVID-19 bikaba bibera kuri Sitade Amahoro i Remera (08h00-19h00) no ku Bitaro byigenga bibifitiye uburenganzira.
Ibiciro byo kwinjira kuri Sitade, mu cyubahiro (VIP) ni ibihumbi 15 by’amafaranga y’u Rwanda angana n’amadorali 15. Mu cyicaro cyo hasi hazishyurwa ibihumbi 10 (Amadolari 10) naho mu myanya yo hejuru bishyure ibihumbi 7 (Amadorali 7). Ibi biciro byose birebana n’imikino izajya iba ku munsi birimo n’ikiguzi cy’igipimo cya COVID-19, ku bifuza gupimirwa kuri Sitade Amahoro i Remera.
Amatike azajya agurwa mu buryo bw’ikoranabuhanga binyuze kuri “www.ticqet.rw”.
Iyi mikino ya AfroBasket ni inshuro ya 30 igiye kuba gusa ni inshuro ya mbere igiye kubera mu Rwanda. Ubwo iyi mikino iheruka muri 2017 yabereye muri Senegal na Tunizia aho ikipe y’igihugu ya Tunizia yegukanye igikombe.
