Rubavu : Gutangira icyumweru cyo kwibuka 27,n’ubutumwa bwihariye ku baturage b’ Akarere ka Rubavu

Gahunda yo gutangira icyumweru cyo kwibuka Kimwe n’ahandi mu gihugu abatuye Akarere ka Rubavu bakurikiranye itangizwa ry’icyumweru cyo kwibuka ku nshuro ya 27 Jenoside yakorewe abatutsi muri 1994.

Hubahirijwe amabwiriza yo kwirinda no kurwanya covid 19, ubuyobozi bw’Akarere buri kumwe n’inzego z’umutekano ndetse n’abahagarariye ibyiciro bitandukanye bacanye urumuri rw’ikizere ndetse bashyira indabo ku nzibutso zitandukanye ziri mu karere mu rwego rwo gukomeza kunamira inzirakarengane zazize jenoside yakorewe abatutsi ziharuhukiye.

**Abayobozi b’akarere ka Rubavu hamwe n’izindi nzego bunamiye inzirakarengane ziruhukiye mu nzibutso zitandukanye ziri mu Karere**

Akarere ka Rubavu gafite amateka yihariye kuri Jenoside yakorewe abatutsi mu 1994, ashingiye ku Nzirakarengane ziciwe mu Bigogwe bazira uko bavutse, uyu ukaba ari umwanya wo kongera gusubiza amaso inyuma hagakosorwa amateka mabi yabaye mu gihugu cyose by’umwihariko mu Karere ka Rubavu.

**Ku rwibutso rwa Bigogwe rufite amateka yihariye, ni hamwe mu haruhukiye imibiri y’inzirakarengane zishwe zizira uko zaremwe, hashyizwe indabo, hacanwa n’urumuri rw’ikizere**

Mu gutangira icyumweru cyo kwibuka kandi Akarere ka Rubavu kaboneraho kwibutsa abaturage ko bakwiriye kwitwararika muri bino bihe byo kwibuka Jenoside yakorewe abatutsi mu 1994, abanyarwanda bose by’umwihariko abaturage b’Akarere ka Rubavu barasabwa kurangwa n’ubumuntu, kuba ku isonga mu bikorwa byose byo kwibuka jenoside yakorewe Abatutsi, gukomeza guhumuriza abarokotse jenoside yakorewe Abatutsi, kubarinda ihungabana, kwita ku bacitse ku icumu bafite ibibazo byihariye bakabona ubufasha bukwiriye, kurwanya ingengabitekerezo ,ihakana n’ipfobya bya jenoside yakorewe Abatutsi.

Mu rwego rw’igihugu gutangira icyumweru cyo kwibuka 27, byabereye muri Kigali Arena ariho Perezida wa Repubulika y’u Rwanda Paul Kagame yatangiye impanuro zitandukanye, abatuye Akarere ka Rubavu bari bakanguriwe kuza gukurikirana icyo gikorwa kuri Radiyo, Televisiyo na social Media

Birakwiye kandi kugaragaza aho abakehwaho gukora cyangwa gutegura jenoside yakorewe Abatutsi bihishe, gutanga amakuru ku hantu haba hari imibiri y’abazize jenoside yakorewe Abatutsi itarashyingurwa mu cyubahiro no kubungabunga amateka n’ibimenyetso bya jenoside yakorewe Abatutsi.

Akarere ka Rubavu kaboneyeho kwibutsa abaturage ko mu bihe byo kwibuka bakwiye gukomeza kwitwararika bubahiriza ingamba zo guhangana n’icyorezo cya covid 19, ndetse no kubahiriza andi mabwiriza yose.

**Abayobozi mu karere ka Rubavu bahaye icyubahiro, bunamira inzirakarengane zazize Jenoside yakorewe Abatutsi mu 1994**

**Akarere ka Rubavu gafite amateka yihariye kuri Jenoside yakorewe abatutsi, dore ko hari abatangiye kwicwa mu 1990. hubatse inzibutso zisigasiye amateka**

Nyakubahwa Perezida wa Repubulika y’u Rwanda Paul Kagame mu butumwa bwo gutangira icyumweru cyo kwibuka 27 Jenoside yakorewe abatutsi muri 1994, yongeye gusaba abanyarwanda kwirinda ingengabitekerezo ya jonoside no kwamagana abakiyipfobya, Abatuye Akarere ka Rubavu barasabwa kugendera ku mpanuro z’umukuru w’igihugu

Ikinyamakuru Igisabo.rw ku bufatanye n’ibindi binyamakuru tuzakomeza kubagezaho ibikorwa byose bijyanye no kwibuka yaba mu gihugu cyose by’umwihariko mu Karere ka Rubavu

“Twibuke twiyubaka” kandi twirinda COVID19