Dore Impamvu Umwana Wawe Agomba Guhabwa Ubumenyingiro Anyuze Muri Saint Patrick Tvet School

Church of God Saint Patrick TVET School  ni ikigo gishingiye ku itorero n’indagagaciro za Gikristo,  giherereye mu Karere ka Kicukiro mu gace kazwi nka Niboye. Saint Patrick TVET kikaba ikigo  gitanga ubumenyingiro ku banyeshuri barangije icyiciro rusange cy’amashuri yisumbuye. Saint Patrick TVET School  kandi  ikaba ifite umwihariko w’uko umunyeshuri wese uharangirije atsinda ikizamimi cya Leta  ku manota yo hejuru ku buryo ari naho hakunze kuva abanyeshuri ba mbere mu gihugu nk’uko Ubuyobozi bw’ikigo bubitangaza.

Ikinyamakuru Igisabo gisura iki kigo kirimo abanyeshuri barangwa n’ikinyabupfura kinshi,  kuri uyu wa 28 Gicurasi 2021, Umuyobozi  w’ishuri akaba n’umuyobozi w’Itorero Ngarambe George, avuga ko muri iki kigo ubusanzwe bigisha ibijyanye n’Amahoteli (Hotelerie), Ubukerarugendo (Tourism) n’Ikoranabuhanaga (Computer Software Development).

Agira ati “ iki ni ikigo cyatangiye imirimo yacyo mu 2005, abanyeshuri bakaba barangiza ari abahanga ahanini bitewe n’uburezi buhamye bafatira kuri iki kigo kuko dufite abarimu b’ababahanga kandi b’inararibonye. Dushimishwa n’uko abana barangiza hafi ya bose bahita basamirwa hejuru n’ibigo bitandukanye bitanga serivise zigendanye n’ibyo biga hano bityo bagahangana neza n’abandi ku isoko ry’umurimo. Abenshi na none bakaba bahita bakomeza muri Kaminuza ndetse hari na benshi barangije bafite imirimo ikomeye ni ibyo gukomeza.”

Pastor Ngarambe George umuyobozi mukuru w’ishuri, avuga ko “Ubumenyingiro baha abanyeshuri babo,  babikora bafite intumbero yo kugira ngo abanyeshuri barera bagire ubumenyi buhagije bityo bajye  ku isoko ry’umurimo  bazi neza ibyo bize bagamije guhangana n’abandi ariko kandi ngo banatanga serivise nziza kandi zihuse  zigamije kuzamura igihugu bifashishije ubwenge n’ubushobozi bakuye muri bwa bumenyi ngiro  bahawe muri St Patrick.”

Avuga ko Saint Patrick TVET School ari ishuri ryiza ry’ikitegererezo ritanga amasomo mu byiciro kuva kuri Level 3, Level 4 na Level 5 (Iyo umunyeshuri ashoje Level 5 akaba aba yemerewe kujya muri Kaminuza gukomeza amasomo ye mu urwego rwo kongera ubumenyi kurushaho. Bafite abanyeshuri 425 muri ibyo byiciro bitandukanye, aho bakurikiranwa n’abarezi bagera kuri 15 b’inararibonye kandi b’abahanga mubyo bakora byose.

Akomeza avuga kandi ko mu by’ukuri gutsindisha  no kugira abanyeshuri bazi ubwenge kandi bose ari imwe mu ntego n’ibigwi bya Saint Patrick TVET School bihaye kandi babigeraho uko bikwiriye.

Ikindi ashimira cyane Pastor Ngarambe ni icy’uko  nko mu mwaka wa 2014 umwana wabaye uwa mbere mu ishami ry’Ikoranabuhanga mu gihugu hose,  yari  yaturutse mu kigo cyabo kandi ngo na nyuma yaho kugeza uyu munsi iryo shyaka n’ubutwari  ngo riracyahari  kuko abanyeshuri bari gutsinda mu kigero cyo hejuru bityo hakizerwa ko  bizakomeza gutyo nta kabuza cyane ko ariyo ntego ihoraho ya St Patrick TVET School.

N’ubwo bwose abana biga neza kandi bagatsinda neza amasomo yabo, batabigeraho badafite indangagaciro zishingiye ku Ijambo ry’Imana, ari nayo mpamvu abana biga mu kigo cyabo banatozwa gusenga no kumenya Ijambo ry’Imana kugira ngo ribayobore kandi rinabamurikire muri byose.

Kubirebana n’uko abanyeshuri bimenyereza imyuga y’ibyo biga (stage), Pastor Ngarambe, avuga ko kubera icyorezo cya Covid 19, abanyeshuri babo bari gukorera Stage mu kigo kandi ngo bari kubikora neza kuko abarimu babo bari kubakurikirana mu buryo bwiza.

Asoza asaba abanyeshuri gukomeza kurangwa no gukunda amasomo biga bayatsinda uko bikwiriye, asaba kandi abarezi gukomeza kwigisha neza uko bisanzwe bityo intego bihaye yo gukomeza kuba ku isonga bikomeze bibarange.

Ashimira Abo bafatanya mu buyobozi bw’Itorero n’ishuri baba abari hanze no mu gihugu ishyaka bahora barwana kugira ngo ireme ry’uburezi ritangirwa muri St Patrick TVET School rikomeze rishinge imizi.

Aha niho ashimira cyane abo bakorana bo mu bihugu byo hanze bamaze koherereza mu minsi ya vuba imashini (Computer) z’abanyeshuri zije zisanga izindi zihari kugira ngo bakomeze bige neza bafite ibikoresho bihagije.

Ku bumenyi n’ubuhanga bw’abanyeshuri barererwa muri St Patrick TVET School, biranashimangirwa cyane na Bwana Habimana Francois Xavier, Umurezi kuri icyo kigo akaba yigisha mu ishami rijyanye n’amahoteli.

Avuga ko amaze imyaka 3 yigisha kuri iki kigo kandi ko ari ahantu yishimiye kubera ubufatanye buhaba hagati y’abarezi n’abayobozi b’ikigo ndetse n’abanyeshuri barangwa n’ikinyabupfura no gutsinda neza.

Agira ati “iki ni ikigo gifite indanga gaciro za Gikristo koko. Abakozi dufashwe neza kuburyo duhemberwa ku gihe birenze no ku gihe kuko kuri 25 za buri kwezi twese tuba twabonye ibitugomba byose. Abana nabo batsinda  ku kigero cyo hejuru kubera umuhate tuba twagaragaje mu kubigisha kandi nabo bagashyiraho akabo.”

Bwana Habimana avuga ko ibanga bakoresha kugira ngo St Patrick TVET School, abahiga baze mu myanya ya mbere ari uko bakora imyitozo ngiro kurusha amasomo ngiro.

Avuga ko yishimira ko abana babo bajya gukora stage hanze bagahita bahabona akazi kuko baba bagaragaje ubumenyi budasanzwe bituma bagereranywa n’abakozi baba bahasanze kuburyo ngo mu mahoteri afite inyenyeri eshanu akorera mu mujyi wa Kigali uhasanga abakozi benshi bize muri St Patrick TVET School, bikaba ngo ari ishema ryo kwishimirwa kuko bigaragaza ko baba  bareze neza.

Asoza asaba abana barera gukomeza kwiga neza kugira ngo bazigirire akamaro bazanakagirire igihugu cy’abo n’ababyeyi babatumye.

Asaba kandi  abarezi bagenzi be nabo,  gukomera ku ntego yo gukomeza gutanga ireme ry’uburezi rihamye nkuko babyiyemeje kandi banakomeza gukorera hamwe nka Ekipe uko bisanzwe.

Akeza Favorite ni Umunyeshuri wiga mu mwaka wa 6 mu ishami ry’ Ikoranabuhanaga (Computer Software Development).

Avuga ko  uburyo bwo kwimenyereza umwuga bari mu kigo bashyiriweho,  ari ingirakamaro kuri bo kubera ko abarimu babo babitaho, bakanamenya neza  aho bagomba kubafasha  ndetse bikabarinda kuba barangara  cyangwa ngo bateshuke ku nshingano  baba  bahawe.

Avuga ko ubushize yagize amanota  80% kandi ko intego ari ugukomereza muri Kaminuza kugira ngo ashimangire ibyo yize kurushaho.

Avuga kandi ko mu byukuri ibanga bakoresha rituma bagira amanota meza no mu kizamini cya Leta, ari uko bimenyereza cyane ibyo biga kandi bakaba batajya batakaza umwanya mubidafite akamaro,  ahubwo ngo bakaba bagendera ku nama nziza z’abayobozi b’ikigo n’iz’abarezi babo  bakanagendera ku ngero nziza  za bakuru babo bagiye baharangiza, bakaba baramaze kugera ku urwego rwo hejuru.

Nk’umunyeshuri uri gusoza, Akeza avuga ko ubumenyi akuye kuri Saint Patrick TVET School azabubyaza umusaruro ku buryo afite inzozi zo gukora “software ye akazayijyana ku isoko kandi akizera adashidikanya ko izakundwa na bose.

Akeza asaba bagenzi be kwiga bashyizeho umwete kugira ngo uyu mwaka basoza bazawutsinde neza nkuko bisanzwe by’umwihariko bagenzi be bitegura gukora ikizamini cya Leta.

St Patrick TVET School, ni Ishuri ry’ubumenyi ngiro mu kiciro cy’amashuri y’isumbuye, bakanagira n’amasomo y’inyigisho ngufi Short Courses, amara igihe cy’amezi  6  kubabyifuza.

Ni ishuri rigendera ku ndangagaciro za Gikristo, riherereye mu Karere ka Kicukiro, Umurenge wa Niboye munsi neza ya Paruwasi Gatolika ya Kicukiro.

Abifuza andi makuru mwahamagara kuri; +250788513527