Umwaka wose urashize Abazarama Dancilla wo mu Kagari ka Nyagatovu, Umurenge wa kimironko, Umudugudu wa Buhoro Akarere ka Gasabo afunzwe ataraburana azira akarengane yatewe n’akagambane k’umukuru w’umudugudu Karima Sirilo wafatanyije n’uwitwa Ngendahimana Emmanuel Umuturanyi, bamuziza ubutaka bwa Metero eshatu bufatanye n’igipangu cye.
Iki ni ikibazo cyavuzwe mu itangazamakuru inshuro nyinshi, aho uyu Abazarama Dancilla yatakambiraga Umurenge n’Akarere, asaba gufashwa mu kibazo yavugaga ko aterwa n’uwitwa Ngendahimana Emmanuel na Karima Sirilo uyobora Umudugudu wa Buhoro babeshyaga ko agace cy’igisigara kometse ku gipangu cye atari ake ngo kaguzwe na Ngendahimana, akaguze na Kavukire ngo wari uhatuye.
Cyakora uwari umuyobozi w’umurenge wa Kimironko Dr Rwabukumba Mado, yaje kwemeza ko ako aho hantu ari igisigara ko hagomba kujya hakorerwa isuku na Abazarama hafatiye ku Gipangu, ndetse yazanabishobora akahashakira ibyangombwa.
Abazarama yakomeje gutegwa imitego na Bwana Karima Siliro uyobora Umudugudu wa Buhoro
N’ubwo Ubuyobozi bw’Umurenge bwari bumaze gutanga umurongo w’ikibazo cy’uko ako kabanza ka Metero 3 kaguma gukorerwa isuku na Abazarama, Karima we yahise azana imashini araharitugura, avuga ko ashaka umuhanda ujyana ibikoresho by’ubwubatsi bwe, bityo binyurana cyane n’ibyo yabeshyaga ko haguzwe na Ngendahimana kuko yari ahise ahigarurira.
Ubwo itangzamakuru nabyo byabisakuzaga, Umuyobozi w’Umurenge Rwabukumba Mado yategetse Sirilo gusubizaho butaka bwose yatenguye, nyamara akomeza kwinangira ahubwo akomeza gushaka uko bakwikiza abazarama mu bwenge buavnze n’ubugome bwinshi.
Bahisemo kumutega umutekamutwe
Abazarama Dancilla avuga nyuma gato y’ibyo bibazo yakomeje gukururwaho n’abaturanyi be Karima Siriro uyoboye Umudugudu wa Buhoro na Ngendahimana Emmanuel, ngo yagiye ku kiriyo cy’umuturanyi, ahahurira n’abantu batandukanye baraye baganira byinshi bagera no ku by’amarozi, aho uwitwa Ananias wari watumwe na Emmanuel na Sirilo yavuze ko azi abantu batanga umuti uwaba afite urubanza ngo rukaza gupfa.
Kubera ko Abazarama yari yaramaze kujyanwa mu nkiko na babaturanyi be, ngo yamubajije inzira bacamo ngo urubanza ruhagarare, umutekamutwe ngo amwemerera kuzamushakira umuti muri Tanzaniya amusaba ibihumbi 30 arabimuha.
Abazarama avuga ko kubera ko byari akagamabane yari arimo ariko atabizi, ngo Ananias yagiye amuhamagara kenshi amusaba andi mafaranga ngo Miliyoni n’igice (1,500,000) ngo azabashe no kumwicira Emmanuel baburanaga, cyakora byose ngo yabivugaga ari kumwe n’uwo Emmanuel bamufata amajwi, yahise ajyanwa muri RIB nayo yahise iza gufata Abazarama, ibintu atahwemye kwamgana no mu rukiko, avuga ko ari akarengane gashingiye ku kagambane.
RIB n’Urukiko bashingiye ku magambo n’ibihuha
Kuwa 03/04/2023, abazarama yatangiye kuburana ifungwa n’ifungurwa by’agateganyo ku cyaha cyo gushaka kwica umuntu akoresheje amarozi, ibiganiro ngo yakoreye kuri Telefoni.
Abunganizi be, ibyo babyamaganiye kure bavuga ko ari ikirego gishingiye ku magambo n’ibihuha cyane ko nta wapimye ibyavugiwe kuri telefoni, ikindi kandi icyaha cy’amarozi ngokikaba kitabaho mu mategeko ahana y’u Rwanda, byongeye Abazarama akaba ari ntawe yaroze ahubwo ko hafatwa umutekamutwe Ananias Nyirabayazanan’abamutumye bashatse kugusha mu mutego Abazarama, cyane ko yari yanabatsinze ntibabashe kumutwarira ubutaka bwometse ku gipangu cye bifuzaga mu buryo bw’amanyanga.
Kimwe n’abunganizi be, Abazarama yasabye gufungurwa akajya kurera abana be, cyane ko ntawe afite wabitaho kandi ko afite imyirondoro izwi, ariko bisozwa ajyanawe mu rukiko rwakomeje kumufunga imisi 30 y’agateganyo amazemo umwaka wose azira ubusa.
Abana ba Abazarama Dancilla baratakira Ubutabera.
Abazarama Dancilla bivugwa ko abamugambaniye bakomeje no kumukurikirana mu rukiko, bikagaragazwa n’uburyo Karima Sirilo uyobora Umudugudu wabo ashinja kumugambaniria, yitabiriye amaburanisha yose mu rukiko kandi ataragobokeshejwe.
Abana ba Abazarama yasize mu rugo bonyine b’abakobwa bato, umwe w’imyaka 13 n’undi w’imyaka 19, baravuga ko babayeho nabi kandi ko batizeye umutekano wabo, bakaba barabuze uko biga bagasaba ubutabera kurenganura umubyeyi wabo wazize Akagambane n’Akarengane.
Umukuru muribo aganira n’ikinyamakuru Igisabo, agira ati “ turasaba ubutabera gukurikiza amategeko umubyeyi wacu agafungurwa, amaze umwaka wose afunze azira ubusa ndetse n’ubutaka yaburanga Umukuru w’umudugudu yarabwigaruriye arundamo imicanga n’amabuye byo kubaka inzu ye.”
Ikinyamakuru Igisabo cyashatse kuvugisha Umuvugizi w’inkiko Harrison Mutabazi, icyaba gishingirwaho ngo umuntu amare umwaka wose afunze ataraburana, na cyane ko Abazarama Dancilla n’abamwunganira bavugako afunzwe n’icyaha cy’amarozi kitabayeho kitanabaho mu mategeko y’u Rwanda, cyakora ntiyabasha kwitaba.
Ni kenshi abantu bivugwa ko hari abantu bamara igihe bafunzwe bakamara igihe batarabona ubutabera ndetse hakaba hari n’abagaragara nyuma ko ari abere barenganaga.
Abazarama Dancilla arasaba kurenganurwa. Avuga ko nta kindi azira uretse akagambane ka Karima Sirilo uyobora Umudugudu wa Buhoro abifatanyije na Ngendahimana Emmanuel bagamije kumwambura ubutaka bwe, none nyuma y’uko afunzwe arengana ubwo butaka ngo bahise babwigarurira agasaba inzego z’ubutabera kubahagarika kuko babaye ba rusahurira mu nduru.
amwe mu mafoto agaragaza ubutaka bufatanye n’igipangu cya Abazarama ari kuzira akaba amaze umwaka afunze azira ubusa
NIYONKURU Edouardigisabo.rw/