APR FC yanganyije na Kiyovu Sports ubusa ku busa mu mukino wo kwishyura, iyisezerera ku giteranyo cy’ibitego 2-0 mu mikino yombi ya ⅛ cy’Igikombe cy’Amahoro, ikomeza muri 1/4 cy’irangiza.
Uyu mukino wo kwishyura wabereye kuri Kigali Pele Stadium, kuri uyu wa Gatatu tariki ya 4 Werurwe 2026.
Umukino ubanza wahuje amakipe yombi APR FC yari yatsinze Kiyovu Sports ibitego 2-0.
Watangiye ugenda gahoro, amakipe yombi akinira cyane mu kibuga hagati bituma n’uburyo bwo kurema igitego buba buke.
Mu minota 15, Kiyovu Sports yongereye imbaraga isatira cyane izamu rya APR FC harimo Koruneri eshatu zikurikiranya ariko bananirwa kuzibyaza umusaruro ngo batsinde igitego.
Mu minota 35, iyi kipe yakomeje gukina neza harimo uburyo bwiza Uwimana Yakubu yabonye ateye ishoti rijya hejuru y’izamu.
Ku munota wa 45, Uwineza Rene wa Kiyovu Sports yahushije uburyo bwabazwe ku mupira yanyujije ku munyezamu Hakizimana Adolphe, ariko ntiwajya mu izamu, uhita ufatwa na Niyomugabo Claude.
Igice cya mbere cyarangiye amakipe yombi anganyije ubusa ku busa.
Kiyovu Sports yakomeje gusatira mu igice cya kabiri ndetse ku munota wa 52, yafunguye amazamu ku mupira wavuye muri koruneri, ufatwa na Hakizimana Adolphe, ariko umukinnyi wa Kiyovu Sports aramugonga agwana na wo mu izamu nyuma yo kuwurekura, umusifuzi wo ku ruhande yemeza ko habayeho ikosa.
Ku munota wa 61, Umutoza wa APR FC yakoze impinduka enye William Togui, Djibril Ouattara, Memel Dao na Denis Omedi basimbura Hakim Kiwanuka, Mamadou Sy, Mugisha Gilbert na Lamine Bah.
Izi mpinduka zafashije iyi kipe kongera gusatira izamu rya Kiyovu Sports harimo umupira watewe na Memel Dao ushyirwa muri Koruneri itagize icyo itanga.
Mu minota 75, Kiyovu Sports yongeye kwiharira umupira isatira cyane izamu harimo umupira Ntwari Assouman yahinduye mu rubuga rw’amahina, Rivaldo ananirwa kuwukina ari mbere y’izamu wenyine.
Iminota 10 ya nyuma, Kiyovu Sports yakomeje gusatira bikomeye ishaka igitego, ariko ikagorwa kubyaza umusaruro uburyo yabonaga imbere y’izamu.
Umukino warangiye amakipe yombi anganyije ubusa ku busa, APR FC isezerera Kiyovu Sports ku giteranyo cy’ibitego 2-0 mu mikino yombi ya ⅛ cy’irangiza.
Indi mikino yabaye uyu munsi, Mukura VS yatsindiwe i Huye na Etincelles FC ibitego 3-2, iyisezerera ku kubera kwinjiza ibitego byinshi hanze kuko umukino ubanza yatsinze ibitego 2-1.
AS Kigali yanganyije na Marines FC igitego 1-1, iyisezerera kubera kwinjiza ibitego byinshi hanze, aho umukino ubanza banganyije ibitego 2-2.
Bugesera FC yanganyije na Amagaju FC ibitego 2-2, iyisezerera ku giteranyo cy’ibitego 4-3 mu mikino yombi.
Muri ¼, APR FC izahura na Gasogi United yasezereye Musanze FC, Bugesera FC izahura na Etincelles FC.
Ni mu gihe AS Kigali izahura n’izakomeza hagati ya Muhazi United na Gorilla FC.
