Kigali, ku wa 13 Ukuboza 2025 — Ba rwiyemezamirimo bo muri Tanzaniya, Kenya na Afurika y’Epfo ni bo begukanye imyanya ya mbere mu muhango usoza ku mugaragaro irushanwa rya Africa’s Business Heroes (ABH) Prize Competition, ryabaye ku nshuro ya 7 ribera i Kigali.
Igihembo cya mbere cyegukanywe n’Umunya-Tanzaniya Diana Orembe, washinze sosiyete NovFeed, ikora mu rwego rwa biotechnology. Uyu mushinga ukora intungamubiri zitunganyijwe mu buryo bugezweho zigaburirwa amatungo n’amafi, hagamijwe kugabanya igihombo abahinzi bahuraga na cyo mu kugura ibiryo by’amatungo, no kurengera ibidukikije. Abacamanza bagaragaje ko NovFeed ari umushinga ufite ingaruka nziza ku bukungu bw’abahinzi no ku iterambere rirambye.
Umwanya wa kabiri wegukanywe na Adriaan Kruger wo muri Afurika y’Epfo, washinze nuvoteQ, ikigo cy’ikoranabuhanga mu by’ubuzima (healthtech) cyifashisha ibisubizo by’ikoranabuhanga mu koroshya igeragezwa ry’imiti (clinical trials) n’ubushakashatsi mu buvuzi.
Ku mwanya wa gatatu haje Abraham Mbuthia wo muri Kenya, uyobora Uzapoint Technologies, itanga ibikoresho by’ikoranabuhanga bifasha ibigo bito n’ibiciriritse gukura, gucunga neza imirimo yabyo no kongera umusaruro.
Irushanwa rya ABH ritegurwa na Alibaba Philanthropy, rihumekewe n’uwashinze Alibaba, Jack Ma. Muri uyu mwaka, ni bwo ryitabiriwe n’abantu benshi kurusha indi myaka, aho abarenga 32,000 baturutse mu bihugu 54 bya Afurika biyandikishije basaba guhatana.
Nyuma y’ibyiciro bikomeye by’amarushanwa, birimo n’aya kimwe cya kabiri yabereye i Dakar muri Senegal, imishinga 10 yo mu bihugu 7 ni yo yageze ku musozo wabereye i Kigali. Umuhango usoza irushanwa wabanjirijwe n’inama yamaze iminsi ibiri, yari ifite insanganyamatsiko igira iti “Gusobanura ejo hazaza ha Afurika uyu munsi”. Iyi nama yahuje abantu barenga 1,000, barimo ba rwiyemezamirimo, abashoramari n’abayobozi b’inzego zitandukanye, baganira ku iterambere rya Afurika binyuze mu mahugurwa yihariye (masterclasses), ibiganiro mpaka, kumurika imishinga n’amahirwe yo kwagura imikoranire.
U Rwanda rwakiriye iki gikorwa ku nshuro ya gatatu rwikurikiranya, ku bufatanye n’Urwego rw’Igihugu rw’Iterambere (Rwanda Development Board – RDB), bikomeza gushimangira Kigali nk’igicumbi cy’ibikorwa bikomeye by’ubucuruzi n’ishoramari ku mugabane wa Afurika.
Ku bijyanye n’ibihembo, abegukanye imyanya itatu ya mbere bahawe inkunga igizwe na 300,000$ ku mwanya wa mbere, 250,000$ ku mwanya wa kabiri na 150,000$ ku mwanya wa gatatu. Abandi bahataniye imyanya irindwi basigaye buri wese yahawe 100,000$, ku buryo muri rusange hatanzwe inkunga ingana na miliyoni 1.5 z’amadolari ya Amerika yo gushyigikira imishinga mishya y’Abanyafurika.
Abandi bari mu bahataniye imyanya 10 ya mbere barimo ba rwiyemezamirimo baturutse mu Rwanda, Senegal, Misiri, Cameroun, ndetse n’abandi bo muri Kenya na Tanzaniya. Imishinga yabo yibandaga ku nzego zitandukanye zirimo ubwikorezi, imirire y’abana bato, imyenda n’inganda z’imyambaro, itangwa ry’ibiribwa, na telemedicine. Mu bacamanza harimo Jerry Yang, umwe mu bashinze Yahoo, washyimye Kigali nk’umujyi uri gutanga icyerekezo cy’ejo hazaza ha Afurika, avuga ko uyu mugabane utari ugukurikirana gusa ahandi ku isi, ahubwo uri kwihangira inzira nshya z’iterambere.
