Chelsea yatsinze FC Barcelona ibitego 3-0 naho Manchester City itsindwa na Bayern Leverkusen ibitego 2-0 mu mikino y’Umunsi wa Gatanu wa UEFA Champions League yabaye mu Ijoro ryo ku wa Kabiri, tariki ya 25 Ugushyingo 2025.
Umukino wari utegerejwe Chelsea yari yakiriye FC Barcelona kuri Stamford Bridge.
Chelsea yakiniraga imbere y’abakunzi bayo yinjiye mu mukino mbere, igakina igana ku izamu rya FC Barcelone ndetse ku munota wa 24, Enzo Fernandez ashyiramo igitego cya mbere ariko amashusho ya VAR agaragaza ko yaraririye.
Ku munota wa 27 iyi kipe yabonye igitego cya mbere, ku mupira wahinduwe imbere y’izamu na Marc Cucurella, ubwugarizi bwa FC Barcelone bunanirwa kuwukuraho birangira Jules Koundé yitsinze.
Iyi kipe yo muri Espagne yagerageje gushaka uko yishyura igitego yifashishije impande zayo zakinagaho Lamine Yamal wasuzuguye Chelsea mbere yo guhura nayo akayigaragaza nk’ikipe idakomeye, na Ferran Torres.
Kapiteni wa FC Barcelone, Ronald Araújo, wari wahawe ikarita y’umuhondo kubera imyitwarire mibi, yakoreye irindi kosa Cucurella, ahita yerekwa ikarita itukura ku munota wa 44.
Igice cya mbere cyarangiye Chelsea iyoboye umukino n’igitego 1-0.
Mu igice cya kabiri, Chelsea yakomeje kurusha FC Barcelone ndetse ku munota wa 51 Andrey ashyiramo igitego cya kabiri, umusifuzi aracyanga avuga ko habayemo kurarira.
Igitego cya kabiri cya Chelsea cyatsinzwe na Estêvão Willian ku munota wa 55, ku mupira yazamukanye asiga Pau Cubarsí wananiwe kumuhagarika, atera ishoti rikomeye uruhukira mu izamu.
Enzo Fernandez yafashe umupira ku munota wa 73, abakinnyi ba FC Barcelone bagira ngo yaraririye, na we awuhereza Liam Delap wahise awushyira mu izamu arebana n’umunyezamu Joan García.
Umukino warangiye Chelsea yatsinze FC Barcelona ibitego 3-0.
Indi mikino, Manchester City yatsinzwe na Bayer Leverkusen ibitego 2-0. Byinjijwe na Alejandro Grimaldo na Patrik Schick.
Uko indi mikino yarangiye
FK Bodø/Glimt 2-3 Juventus
Borussia Dortmund 4-0 Villareal
Marseille 2-1 Newcastle
Napoli 2-0 Qarabag
Slavia Prague 0-0 Athletic Club
Galatasaray S.K. 0-1 Royal Union SG
Ajax 0-2 Benfica
Imikino ya UEFA Champions League irakomeza kuri uyu wa Gatatu saa moya n’iminota 45 z’umugoroba, aho FC Kobenhvan yo muri Dermark yakira Kariat Almaty yo muri Kazakhstan mu gihe Pafos Club yo muri Cyrus yakira AS Monaco yo mu Bufaransa.
Saa yine z’ijoro, Arsenal yo mu Bwongereza irakira FC Bayern Munchen yo mu Budage, Atletico Madrid yo muri Espagne irakira Inter Milan yo mu Butaliyani, Frankfurt yo mu Budage irakira Atalanta yo mu Butaliyani, Liverpool yo mu Bwongereza irakira PSV yo mu Buholandi, Olympiacos yo mu Bugereki irakira Real Madrid yo muri Espagne.
Kuri ayo masaha kandi, Paris Saint Germain yo mu Bufaransa irakira Tottenham yo mu Bwongereza, Sporting yo muri Portugal irakira Clubb Brugge yo mu Bubiligi.
