Kuri uyu wa Kabiri tariki 2 Nyakanga, abagize ishyaka riharanira demokarasi no kurengera ibidukikije ‘Democratic Green Party’ bayobowe n’umukandida ku mwanya wa Perezida wa Repubulika Dr Frank Habineza n’abakandida depite babarizwa mu ishyaka biyamamarije mu Karere ka Nyabihu na Karere ka Rubavu.
Mu gitondo cyo kuri uyu wa Kabiri, nibwo umukandida watanzwe n’ishyaka rya Green Party ku mwanya w’umukuru w’igihugu Dr Frank Habineza yageze mu Murenge wa Kanjongo mu Karere ka Nyabihu arikumwe n’abakandida depite 50 bahatanira imyanya mu Nteko inshingamategeko.
Dr Frank Habineza yabanje guca mu Mujyi wa Nyabihu ari nako agenda asuhuza imbaga y’abaturage y’abari bahagaze ku mihanda bifuza kureba umukandida uhatanira umwanya wo kuyobora u Rwanda mu myaka itanu iri mbere.
Umuyobozi w’Akarere ka Nyabihu, wungirije ushinzwe imibereho myiza, Simpenzwe Pascal, niwe wahaye ikaze Ishyaka Democratic Green Party rirangajwe imbere n’umuyobozi mukuru waryo Dr Frank Habineza umukandida-Perezida.
Frank Habineza yasabye ab’i Nyabihu kuzamutorera kuyobora u Rwanda kuko hari byinshi yifuza kuzabagezaho.
Ati “Njyewe tariki ya 15 Nyakanga 2024, muzazinduka mujya gutora, muzahitemo Frank Habineza ku ikarita y’itora muzahasanga ifoto yanjye. Naho ku Badepite muzahasanga Inyoni ya Kagoma.”
Dr Frank Habineza yagarutse ku kibazo cy’abana bagwingiye bo mu karere ka Nyabihu, aho yavuze ko bikwiriye gucika muri aka Karere mugihe cyose bazaba bamugiriye icyizere.
Yagize ati: “Mufite ibiribwa ariko mukagira ikibazo cyo kugwingiza abana, ngira ngo Nyabihu iza mu turere tw’imbere dufite abana benshi bagwingiye. Ingeso yo guhingira isoko muyigabanye, mwite ku bana bave mu mirire mibi kubera ko ntacyo mwabuze. Mweza ibirayi mufite ibiryo sinumva uburyo abana bo muri aka karere bagwingira. Turifuza nk’ishyaka ryacu guca burundu ingwingira muri aka Karere.”
Ubushakashatsi ku buzima n’imibereho y’abaturage DHS, bugaragaza ko mu Karere ka Nyabihu ibipimo by’igwingira mu bana bigera kuri 34% nk’uko byagaragajwe mu mwaka 2023.
Dr Frank Habineza yaje gukomereza ibikorwa bye byo kwiyamamaza ku gicamunsi mu Karere ka Rubavu aho naho wabonaga ko yakiriwe ku buryo budasanzwe n’abarwanashyaka b’ishyaka rya Green Party ndetse n’abaturage baturiye Akarere ka Rubavu by’umwihariko kuri site ya Mahoko ahabereye igikorwa cyo kwiyamamaza.
Dr Frank Habineza umukandida-Perezida ushaka amajwi yo kuyobora u Rwanda yasabye abaturiye ako karere ko bakwiye kubyaza umusaruro amahirwe bafite bagura ishoramari rishingiye mu buhinzi n’ubworozi ahanini cyane cyane ku musaruro uva mu kiyaga cya kivu ari nako bihaza mu biribwa, ariko ngo ibyo biazaba nibatora Ishyaka Green Party kuko ibyo rivuze ritabeshya.
