Mu gikorwa cyo gusoza umwaka w’amashuri 2023-2024 hatangwa impamyabumenyi ku bana basoje ikiburamwaka Nursary n’abo mu mwaka wa gatandatu ubanza Primary, ababyeyi baharereshereza bashimiye iki kigo ubuhanga n’ubwenge abana babo bahakura, bityo bahamya badashidikanya ko bahisemo neza, basaba n’abandi batarahamenya kuhagana ari benshi.
Ni igikorwa cyabereye ku kicaro gikuru cy’Ishuri Mpuzamahanga rya Mother Mary Interantional School Complex giherereye i Kibagabaga mu murenge wa Kimironko Akarere ka Gasabo, kuri uyu wa 27 Kamena 2024, imbere y’ababyeyi benshi bari baje kureba uburyo abana babo batsinze amasomo n’impano n’ubuhanga bagenda bunguka buri munsi.
Umuyobozi Mukuru wa Mother Mary International School Complex Rwabigwi Cyprien, ashima cyane ababyeyi barereshereza ku kigo abereye Umuyobozi mukuru uburyo baba hafi y’abana babo babakurikirana kenshi mubyo biga, bikagaragazwa ahanini n’uburyo abana bakurikira neza mu ishuri bagatsinda hafi ya bose ku kigero cyo hejuru, baba abanyamahanga cyangwa abanyarwanda muri rusange bose ngo ni abahanga cyane.
Agira ati “dusoje umwaka w’amashuri neza, abana bize neza uko bikwiriye cyane ko nta myitwarire idasanzwe twavuga ko yaba yaragaragaye. Mu by’ukuri Ibi byose tubikesha ubufatanye n’imikoranire myiza y’ababyeyi, tukaba twizera tudashidikanya ko bizakomeza gutya, tugahora turangwa no kugira abana b’ababahanga biga neza bagatsinda, ndetse bagera no mu bindi bigo na za Kaminuza bagakomeza guhesha isura nziza ikigo bizeho. Abana rero bize neza haba hano I Kibagabaga nedetse no ku rindi shami riri I Gahanga”.
Avuga ko umwaka washize yari yabwiye ababyeyi ko Mother Mary igomba kuba ku urwego rw’amashuri y’i Burayi, ibyo bikaba ngo byaratangiye kuko hatangiye kubakwa inzu nini y’amagorofa atanu izaba ifite ibyumba bigari 15 byo kwigishirizamo, ibyo bikazatuma umubare mwinshi w’abana bakomeje kuza babagana ubona aho uzigira mu buryo bworoheje.
Ni muri urwo rwego Bwana Rwabigwi ahamagarira ababyeyi kuza kwandikisha abana ari benshi, cyane cyane abasanzwe baharereshereza bakazana abandi, abanyamahanga ngo bari kugana ikigo ari benshi, ku buryo mu gihe gito hakiriwe abanya Sudani barenga 25, abo muri Eriteriy nka 20, muri Kenya nabo ni uko n’ahandi benshi ngo bari kuza kwandikisha abana babo babyitayeho.
Asaba ababyeyi na none, gukomeza gushyigikira ikigo cyabo cyane nko muri kino gihe hari gukorwa ivugururwa mu myubakire, kugira ngo Mother Mary ikomeze ijyane n’iterambere igihugu kifuza kugeraho.
Ni ibirori byari binogeye ijisho bitewe ahanini n’imyireko n’indirimbo abana bagejeje ku babyeyi babo, bagamije ahanini kubereka ko babakoreye ibintu byiza kuba barabazanye ku kigo gifite abarimu b’abahanga babigisha babitayeho nk’abana babo.
Umwe mu babyeyi uhafite abana batatu bahiga, ni Mujyambere John avuga ko we na bagenzi be bahisemo neza kuba baraje kurereshereza muri Mother Mary bitewe n’uko ari isoko y’uburezi buhamye akurikije uko yabonye abana babo kandi batoya, bavuga indimi neza abantu bakuru benshi batapfa gushobora.
Agir ati “Maze kumenya iki kigo navuze ko nta handi umwana wanjye yakwiga. Umva uzi ko abana bavuga indimi ntumenye ko ari banyarwanda? Amasomo yose barayatsinda, bakatubwira ko babikesha abarimu n’ubuyobozi bw’ikigo bubafata neza kandi natwe turabyibonera. Abaturerera ni abarezi kandi ni n’ababyei beza turabashima.”
Ahamagarira ababyeyi kuzana abana kuri Mother Mary ari benshi, akabizeza ko bazahasanga itandukaniro rinini cyane, ugereranyije n’ahandi bari basanzwe bazi.
Ku rundi ruhande, avuga ko umwana we mukuru, yahasoje umwaka wa gatandatu w’amashuri abanza arahakomereza. Umwana ubu ngo ageze mu mwaka wa kane. Kuba ngo hari undi nawe wasoje amashuri abanza uyu munsi, ngo nawe azahita ahakomereza kimwe na mukuru we.
Abanyeshuri barashimira ababyeyi babazanye kwiga ku kigo cy’Intangarugero
Mu gihe ababyeyi bishimira ko bahisemo neza, abana babo nabo barabashimira ko babazanye ku kigo kigisha neza kandi gitsindisha abana bose.
NEZEHOSE Lincoln, asoje umwaka wa gatandatu ubanza, yishimira ko ababyeyi be bamuzanye ku kigo cyiza atangira aba uwa mbere kugeza ubu, bityo agahamya ko agomba no kuhakomereza mu mashuri yisumbuye agiye kwinjiramo.
Agira ati “Iki ni ikigo cyiza cyane, ndashimira ababyeyi bahanzanye nkaba mbasaba ko nakomereza no mu kiciro gikurikiyeho kandi Imana izabimfashamo nzakomeze nitware neza ntsinde amasomo uko nayatsindaga.”
Asaba bagenzi be gukomeza gukunda kwiga batiyigishije kuko inzira ikiri ndende, akaboneraho gusaba abandi bakiri mu myaka yo hasi kurangwa n’ishyaka ryo kwiga bashyizeho umutima kuko ababyeyi baba babohereje ku kigo cyiza.
Ibyo Lincoln avuga abihuriyeho na mugenzi we Irakoze Trix nawe usoje amashuri abanza. Avuga ko ari umunyarwanda wavukiye mu Rwanda, ariko ngo kenshi iyo ari kumwe n’abazungu akavuga indimi, ntawabyemera ko avuka mu Rwanda bitewe n’uburyo azivuga neza.
Agira ati “Twize byinshi. Dusoje amashuri abanza turi abahanga kandi nidukomereza hano, nabwo tuzakomeza dutsinde amasomo kubera ko dufite abarimu babishoboye.
Asaba ababyeyi bagishidikanya aho bagomba kurereshereza abana babo, ko ari ntahandi hatari muri Mother Mary.
Akavuga ko nk’uwabonye uburyo bigaragaje imbere y’ababyeyi berekana ubuhanga butandukanye mu byo bize, ngo ntiyaba agishidikanyije guhitamo ikigo cyujuje ibisabwa byose.
Kuri iki cyo kugira abana b’Abahanga, Umuyobozi Mukuru w’ikigo Rwabigwi Cyprien, ahereye nawe kumyiyereko n’impano abana bagaragaje, avuga ko banishimira ko ko n’abana b’abanyamahanga bahiga, nabo ngo bamaze gukunda ikinyarwanda, ku buryo babyinana n’abandi imbyino gakondo ukabona bizihiwe.
Ikigo cya Mother Mary International School Complex, ni ishuri rikomeje kwerekana ubudasa mu mashuri yo mu Rwanda, bitewe ahanini no kurera abana b’abahanga bivugwa ko bagera no mu bindi bigo bagakomeza kuza mu myanya y’imbere.
Ni ikigo kigisha kigendeye kuri gahunda y’Abongereza ya Cambridge n’iy’abafaransa, ku buryo abana baharangiza bari ku urwego rw’abize I Burayi nk’uko ubuyobozi bw’ikigo bubivuga.
Ababyeyi babishoboye, bakaba bakangurirwa ko muri iki gihe cy’isozwa ry’umwaka w’amashuri, bakagombye no gutangira kwandikisha abana babo ku ishami ry’i Gahanga abahegereye, ndetse no ku cyicaro gikuru gikorera I Kibagabaga.
