Kwishyura ubwisungane mu kwivuza, kwizigama muri Ejo Heza, VUP, kurwanya isuri, isuku n’isukura, gukemura ibibazo by’abaturage mu butabera, kubaka ibikorwa remezo, guhanga udushya n’ibindi bikorwa biteza imbere umunyarwanda nibyo abanyamuryango ba FPR Inkotanyi mu murenge wa Gikondo bishimiraga ko bagezeho mu nteko rusange yateranye ku itariki ya 06 Ugushyingo 2022.
Umuyobozi w’umuryango FPR Inkotanyi mu murenge wa Gikondo, Chairperson Justine Umutoni mu kumurikira abanyamuryango ibyagezweho yashimiye abanyamuryango muri rusange uruhare rwabo mu iterambere ry’umurenge wa Gikondo. Yagarutse kuri bimwe mu bikorwa by’ingenzi umuryango wagezeho mu gihe cy’Imyaka ibiri ishize.
Yagize ati: “Turashima abanyamuryango ba FPR mu murenge wa Gikondo kuko mu myaka ibiri ishize babashije guhanga imirimo 1350 abanyamuryango n’abandi banyarwanda babona akazi. Ikindi cyo kwishimirwa twagezeho ni ukwitabira gahunda yo kuzigamira izabukuru ya Ejo Heza aho mu murenge wa Gikondo abaturage bamaze kwizigamira asaga miliyoni umunani, ku ijanisha rya 40% tukaba dukomeje ubukangurambaga ngo intego twihaye igerweho. Murwego rwo gufasha abatishoboye gukora imishinga ibateza imbere, hatanzwe inguzanyo ya miliyoni 32 ku mishinga 18 kandi abayahawe bagenda biteza imbere bakanishyura neza iyo nguzanyo. Twavuguruye inyubako z’ibiro by’imidugudu n’utugari hirya no hino mu murenge wa Gikondo bigizwemo uruhare n’abanyamuryango ba FPR Inkotanyi. Natanga urugero nk’umudugudu wa Rebero ufite ibiro by’ikitegererezo na Kamabuye ya mbere. Hari kandi inyubako z’imiturirwa zagiye zizamurwa mu murenge wa Gikondo haba izubatswe na leta ndetse n’abikorera zose zigizwemo uruhare rufatika n’abanyamurango ba FPR Inkotanyi.”
Uyu muyobozi kandi yagarutse ku nkingi y’imibereho myiza, aho yagarutse ku bwitabire mu gutanga umusanzu w’ubwisungane mu kwivuza, aho yavuze ko mu baturage ibihumbi 16,463; abafite ubundi bwishingizi ari ibihumbi 5,920, abagomba kwishyura mituweli ari 10,542, abo mu kiciro cya mbere bakaba 311, abamaze kwishyura mituweli ni ibihumbi 9,898 bingana na 91%, bivuze ko abatarabona ubwisungane mu kwivuza mu murenge wa Gikondo ari 875. Muri Gikondo bubatse amarerero mu tugari twose, bakaba bafite gahunda yo gushyira irerero muri buri mudugudu. yobngeyeho ko ubuvuzi n’uburezi muri Gikondo bwegerejwe abaturage.
Umutoni Justine yavuze ko ku bijyanye n’imiyoborere, mu murenge wa Gikondo ibibazo by’abaturage bikemukira ku rwego rw’umudugudu cyane ko bunganiwe n’akarere ka Kicukiro muri gahunda yako kise WIZARIRA aho kegera abaturage abayobozi bakumva ibibazo bakanabikemura abaturage batagomye kujya ku Karere. Ku birebana no gutanga imisanzu y’umuryango, umuyobozi yavuze ko abanyamuryango 14, 223 bo muri Gikondo bari ku rwego rushimishije mu kuyitanga bifashishije Intore Solution nubwo mu mezi ya Nzeri n’Ukwakira babangamiwe n’ikoranabuhanga ritakoraga neza bituma imisanzu idatangwa neza, gusa yizeza abanyamuryango ko bazarushaho kunoza uburyo umusanzu utangwa.
Muri iyi nteko rusange y’abamuryango ba FPR mu murenge wa Gikondo hanatanzwe raporo y’ubugenzuzi aho yagaragaje ko muri rusange umuryango uhagaze neza mu gushyira mu bikorwa intego zawo uhereye ku mudugudu kugeza ku rwego rw’umurenge.
Hanatanzwe ikiganiro nyunguranabitekerezo ku mateka yaranze igihugu hibandwa cyane ku cyatumye hashingwa umuryango FPR, uko u Rwanda rwabohowe, ndetse n’uko urubyiruko rwo mu muryango rukwiye kubakira kuri ayo mateka rukubaka umuryango usigasira ibyagezweho. Nyuma y’ikiganiro nyunguranabitekerezo, abanyamuryango bahawe urubuga rwo gutanga ibitekerezo no kubaza ibibazo. Umwe mu banyamuryango akaba na mutimawurugo asaba ko hakubakwa ibiro by’akagari ka Kinunga ndetse n’ibiro by’umurenge wa Gikondo bikagirwa umuturirwa.
Abanyamuryango ba FPR mu murenge wa Gikondo bemeranyije ku myanzuro yo gukomeza kwandika abanyamuryango mu Intore Solution, kurahiza no kwakira abanyamuryango bashya, gushyira imbaraga mu kwitabira Ejo Heza no gutanga mitueli, gukomeza gushyigikira gahunda za Chairman w’umuryango FPR ku rwego rw’igihugu Nyakubahwa Paul Kagame, Kubaka ibiro by’akagari ka Kinunga, kubaka ibyapa by’abagenzi, kubaka imihanda ya Marembo ya II n’uwo ku NkuruNziza n’iyindi.
Mporebuke Noel