Kuri iki cyumweru tariki ya 12 Kamena 2022, urubyiruko ruhagarariye abandi mu murenge wa Gahara, Akarere ka Kirehe rwasuye urwibutso rwa jenoside yakorewe abatutsi rwa Kigali n’ Ingoro y’amateka yo guhagarika jenoside.
Urwibutso rwa Jenoside rwa Kigali rushyinguyemo imibiri y’abatutsi barenga 250,000 bishwe muri jenocide yakorewe abatusi mu 1994.
Nyuma yo gusura uru rwibutso, Bamwe mu baganiriye n’itangazamakuru, bagarutse ku masomo bahavanye ndetse n’icyo bagiye gukora.
Niyoyukuri Francine yiga mu mwaka wa 5 w’amashuri yisumbuye kuri GS Mugogo akaba na dean of students kuri iri shuri.
Yagize ati” Nagize amahirwe yo kumenya amateka ya Jenoside yakorewe abatutsi mu Rwanda ndetse n’uburyo FPR yagize uruhare rukomeye mukuyihagarika, nk’urubyiruko ni amahirwe kumenya amateka, nzafasha bagenzi banjye kubaka ubumwe bw’abanyarwanda bwasenyutse kubera ubuyobozi bubi.”
GANAYEZU Epaphrodite we ni Umuhuzabikorwa w’inama y’igihugu y’urubyiruko mu murenge wa Gahara, yagarutse ku mahirwe bahawe nk’urubyiruko ndetse agaragaza n’impamba batahanye ati” Twagize umwanya wimbitse wo gusobanukirwa amateka yaranze urwanda mbere y’abakoroni, mugihe cya gikoroni ndetse na nyuma yaho no kureba aho ubu igihugu kigeze. Impamba ururubyiruko tuhavanye twiteguye kuyisangiza abandi duhereye mubigo by’amashuri dore ko twajyanye na bamwe mu banyeshuri bahagarariye abandi muri buri kigo cya buri shuri ryisumbuye ribarizwa mu murenge wacu kugirango azaze asobanurire abandi. Twigire kumateka yacu twiyubakire igihugu imbaraga zacu zubake igihugu kizira jenoside. Tuzafasha ababyeyi bacu kujya bavugisha ukuri amateka yacu ntibayagoreke. Ibyo twize tugiye kubibwira abasigaye twubake indangagaciro zaranze abakurambere bacu.”
Nyuma yo gusura uru rwibutso, banakomereje ku Ngoro y’amateka yo guhagarika jenoside.
Iyi ngoro yubatswe mu Nteko Ishinga Amategeko, ahasanzwe hakorera abadepite ndetse n’aba senateri, ni nayo yari icumbikiye ingabo za RPF 600 zo muri Batayo ya Gatatu, zikaba ariho zari ziri kuva tariki 28 Ukuboza 1993 ubwo hari hategerejwe imyiteguro y’ishyirwaho rya guverinoma y’inzibacyuho. Aha ni naho urugamba rwo guhagarika Jenoside rwatangiriye. Ubwo Aba basirikare 600 nibo bahabwaga amabwiriza n’umugaba mukuru wa RPF General Major Paul Kagame, yo kuva aho bakajya gutabara inzirakarengane zarimo zicwa muri Jenoside
Mu butumwa bwe umunyamabanga nshingwabikorwa w’umurenge wa Gahara , Bwana MWENEDATA Olivier, yagarutse ku mpamvu zo kuzana urubyiruko kwigira ku mateka ashariye u Rwanda rwanyuzemo.
Ati” muri iki gihe cy’iminsi 100 yo kwibuka jenoside yakorewe abatutsi , kwigisha urubyiruko amateka ni bumwe mu buryo bwo kurushaho gusigasira ubumwe bw’abanyarwanda bwasenyutse kubera imiyoborere mibi. Jenoside yakozwe n’urubyiruko ihagarikwa n’urubyiruko rwa RPF, kubigisha amateka ni uburyo bwiza bwo kurinda ibimaze kugerwaho mukubaka u Rwanda nyuma ya Genoside “
Uru rubyiruko rwari rugizwe n’abahagarariye abandi banyeshuri biga mu bigo by’amashuri yisumbuye bibarizwa mu murenge wa Gahara ndetse n’abakorerabushake bo muri uyu murenge.
