Gisaka Open Volleyball Tournament ni irushanwa ryateguwe n’Akarere ka Kirehe , ryasojwe kuri iki Cyumweru, ubuyobozi busezeranya ko rigiye kuba ngarukamwaka.
Gisaka Open Volleyball Tournament yatangiye ku wa Gatandatu, igamije kuzamura impano z’uyu mukino mu Karere ka Kirehe n’utundi bihana imbibi.
Mu bagabo ryitabiriwe n’amakipe arindwi, mu bagore ryitabirwa n’amakipe atandatu yiganjemo asanzwe akina shampiyona ya Vellyball mu Rwanda.
Mu bagabo, igikombe cyegukanwe na Gisagara VC nyuma yo gutsinda REG VC amaseti atatu ku busa, ikipe ya Kirehe VC itahana umwanya wa gatatu itsinze IPRC Ngoma.
Mu bagore, RRA VC yegukanye umwanya wa mbere nyuma yo gutsinda APR VC amaseti atatu kuri imwe, umwanya wa gatatu wegukanwa na Ruhango VC itsinze IPRC Huye.
Perezida w’Ishyirahamwe rya Volleyball mu Rwanda, Ngarambe Raphael, yashimiye ubuyobozi bw’Akarere ka Kirehe bwahisemo guteza imbere uyu mukino, avuga ko irushanwa ryagenze neza.
Yijeje ubufatanye mu kuzamura impano z’abakiri bato muri uyu mukino.
Umuyobozi w’Akarere ka Kirehe, Rangira Bruno, we yavuze iri rushanwa ryaherukaga kuba mu 2019, bagiye kujya baritegura buri mwaka, mu rwego rwo gufasha abakiri bato kuzamura impano zabo.
Ati “Turashimira abitabiriye irushanwa rya Gisaka Open Volleyball Tournament 2022. Wari umwanya mwiza wo guteza imbere impano ziri mu mukino wa Volleyball no gushimisha abaturage. Iri rushanwa rizakomeza gutegurwa buri mwaka.”
Amakipe yegukanye ibikombe yahembwe 600,000 Frw kuri buri imwe, aya kabiri ahembwa 500,000 Frw, aya gatatu ahembwa 400,000 Frw.